Read tetala Mateu 28 Bible Online

Mateu 28 - tetala bible

Mateu 28

¹Lʼokongo a lushi lʼekila, ia hyutshihutshi ya lushi la ntundu la lubingu, Mamya usi Mangadala la Mamya ukina wakayi la ndjendia diumbu.

²Nyulungi, kete yakadidima efula, ne dia ondjelo wa Khumadiondjo akahulo uma lʼulungu, akayi. Ndi akangitula dive, akadjase ladiku adio.

³Lowa landi laki uku dingadimu dia ndjadi. Ahondo andi waki wema uku pembe.

⁴Alami wakasaki lukumba ndu wakayala uku antu wambuvo, ne dia woma andi.

⁵Keli ondjelo akatela amantu ati: Tanyukaki woma; ne dia dimi mbeyaka ndi: Nyu nyambuyanga Jesu, lakawadiaki lu utamba a mpeketanya.

⁶Ndi kema lane, ne dia ndi ambulo uku akandati. Nyuyi, nyuyendi dihuli diakandetami.

⁷Nyutshu esadi, nyututeli ambeki andi nyati: Ndi ambulo uma lu nyoi. Endia, ndi ayeta la ntundu kanyu utsha la Ngalili; leko kayunyutuwena. Endia, dimi lambunyutela.

⁸Vo wakamo esadi uma la diumbu la woma ndu la ongenongeno a wuki, wakalawo dia ntutela ambeki andi.

⁹Nyulungi, Jesu akahumana la wo; akawaemula ati: Moyo! Ku vo wakayi, wakukimela lʼekulu, wakotemola.

¹⁰Ku Jesu akawatela ati: Tanyukaki woma. Nyutshu, nyututeli analingu, watshu la Ngalili; vo wayutomena leko.

¹¹Lamʼakawatatshokaka, nyulungi, alami amotshi wakayi lʼusumba, wakatela elombedi a waki akambu tshe wakatshama.

¹²Lamʼakawasangana la dikumanyi, vo wakasangi lulimi, wakasha alimbi falanga efula.

¹³Vo wakawatela vati: Kanyuteli antu nyati: Ambeki andi wakayi lʼutshu, wakayosa udu andi lamʼakisu lu djo.

¹⁴Naka dikambu ne diayukuma le umbuledi, shu tayuwetawuya, tayunyamela uma lʼunungu.

¹⁵Okone alimbi wakose falanga, wakatshi uku akawawatela. Dikambu so diakadiangana lʼatei wʼasi Juda edja ndu elo.

¹⁶Ambeki dikumi la otoi wakatshu la Ngalili,[268] lʼukungu wakawatela Jesu.

¹⁷La mʼakawawenyi, vo wakotemola, keli amotshi wakadji tamu.

¹⁸Jesu akayi le wo, akawatela ati: Wakambisha wulu tshe ndu lʼulungu ndu la kete.

¹⁹Okone nyutshu, nyete wedja tshe ambeki,[269] nyabatiza lu lukumbu la Papa ndu lʼOna ndu la Nyuma kʼOlolo.

²⁰Nyuwaetshaki dia ntsha akambu tshe wamumunyutela. Nyulungi, dimi leko la nyu nshi tshe, edja ndu ekumelu kʼandja.