Read tetala Mateu 3 Bible Online

Mateu 3 - tetala bible

Mateu 3

¹Lu nshi sho, Joani Ubatizanyi akayi. Ndi akasambisha lʼusui wa Judiya, ata ati:

²Nyukadimuli etema, ne dia diulelu dia lʼulungu diaya suki.[11]

³Ndi kakataka umvutshi Isaya ati: Diui dia untu lahangohango lʼusui ati: Nyolongosole mbuka ka Khumadiondjo, Nyusimbuli esese andi.[12]

⁴Joani ndiame aki la dihondio dia diosa ma kamelo, la uya wʼekuhu lu lukindi landi.[13] Mbu ya nde yandi yaki endijo la usanga.

⁵Ku asi Jerusalema, la asi Judiya tshe, ndu wa lu beke tshe diaki lasuki la Jorodana wakatshu le ndi

⁶Ndi akabatiza lʼokedi wa Jorodana washula kolo yawo.

⁷Keli lamʼakandenyi Afarise la Asaduke efula wayayi dia ndijubatizama le di, ndi akawambula ati: Nyu ana wʼakhuha![14] akanyewula dia ndiawo kele kayayi?

⁸Nyoto elua uku ukadimudinyu etema.

⁹Tanyukanaki lʼetema anyu nyati: Shu teko la tshesu Abarahama.[15] Dimi lambunyutela ndi: Unyashungu mbeyaka mbulwela Abarahama tukanula uma lu ave ane.

¹⁰Kakiane kenge yambukitshama la tshina diʼetamba. Okone utamba tshe wahato elua wʼololo ayokotama, ayukadjema lu dja.[16]

¹¹Dimi lambunyubatiza lʼashi dia ekadimwelu kʼetema. Keli layayi lʼokongo ami, ambundeka wulu: dimi kema ololo wukukimi memba sabata yandi. Ndi ayunyubatiza la Nyuma kʼOlolo la dja.

¹²Ndi eko la ledi lu lunya landi. Ndi ayedia efufwelu kandi ololo: ayusanganya epunga andi lu dipenge, Keli ndi ayutshumba puhudi lu dja yahadimala.

¹³Jesu akayi uma la Ngalili uya la Jorodana le loani, dia ndi ndijubatizama le ndi.

¹⁴Keli Joani kunanga; ndi akawutela ati Dimi kahumba mbatizama le ye, kayayaye le mi na?

¹⁵Keli Jesu akûkaluya diui ati: Utukutetawi ntsha okone, ne dia dio diambusungana dia shu nshidiya akambu wʼololo tshe. Ku ndi aketawo.

¹⁶Lamʼakabatizama Jesu, kemʼedja ndi akatumbi uma lʼashi. Nyulungi, ulungu akadihwama, ku ndi akenyi Nyuma ka Unyashungu ayahulo uku fudu kʼinga, akayuwahema.

¹⁷Ku diui diakayi uma lʼulungu ati: Onʼami la ngandji one, ndi atongenyangenyaka ololo.[17]