Read tetala Mateu 9 Bible Online

Mateu 9 - tetala bible

Mateu 9

¹Jesu akoto lu watu, akateho, akayi lʼusumba awo.

²Nyulungi, vo wakawela kanga ekusi etami lu tangi. Lamʼakenyi Jesu mbetawo kawo, ndi akatela kanga ekusi ati: Onʼami, ongenengene, kolo yaye yambudimanyema.

³Ku afundji amotshi wakati lʼetema awo vati: Untu one ambotenga Unyashungu.

⁴Jesu akeyi tukanyi tawo, akawambula ati: Okoko wana wakananyu tukanyi ta kolo lʼetema anyu?

⁵Uleki dikambu dia tshitshe, mvuta ati: Kolo yaye yambudimanyema; kana mvuta ati: Eto, okendekende?

⁶Keli dia nyu mbeya nyati: Onʼa untu eko la wulu la kete wa nyimanya kolo — ku ndi akatela kanga ekusi ati: — Eto, osa tangi kaye, utshu lakaye.

⁷Ndi aketo, akatshu lakandi.

⁸Keli lamʼakenyi elui wʼantu dikambu so, vo wakuki woma, wakatemola Unyashungu lakasha antu wulu wa wuhu oso.

⁹Lamʼaketi Jesu uma leko, ndi akenyi untu omotshi lakawetaka vati: Mateu, udjashi lu dihuli diʼelambwelu. Ndi akawutela ati: Undijeli. Ku ndi akunela, akuyeli.

¹⁰Lamʼakadjashi Jesu lu mesa lu luudu, elungudi wʼelambu efula la antu wa kolo wakayi, wakayudjase la ndi kame la ambeki andi.

¹¹Lamʼakenyi Afarise dikambu so, vo wakambula ambeki andi vati: Dikambu kuna diale Umbetsha anyu la elungudi wʼelambu la antu wa kolo?[72]

¹²Keli lamʼakuki Jesu diui so, ndi akati ati: Wane weli la wulu hawuhumbi wetshi, paka wane weli la kandiji.

¹³Keli nyutshu, nyuteki kitshimudi ya diui ne,[73] ati: Ketshi kalangami aha ulambu.[74] Ne dia dimi kundja dia ndijeta antu wʼololo, keli lakayi dia ndijeta antu wa kolo.

¹⁴Lʼokongo diku, ambeki wa Joani wakayi le Jesu, wakawumbula vati: Okoko wana shu la Afarise nkilaka mbu ya nde, keli ambeki aye hawukili?

¹⁵Jesu akawatela ati: Engenyi wʼutshuki a wadi mbeyaka ndela lamʼeki utshuki a wadi la wo uka? Keli nshi yayuyala, lamʼayuwakosola utshuki a wadi, ku vo wayukila mbu ya nde.

¹⁶Nduku untu atotelaka etshi ka dihondio diʼuyuyu lu dihondio diʼumusu. Ne dia etshi ka dihondio diʼuyuyu atukata etshi uma lu dihondio diʼumusu, ku ushu ndjala wuki.

¹⁷Ntu, antu hawutudjaka wanu wʼuyuyu lu atapa wa dikuhu diʼedjedja. Naka wayutsha osoku, wanu wayata dikuhu, wayutshulo, ku dikuhu diayulana. Keli watudjaka wanu wʼuyuyu lu dikuhu diʼeyuyu. Ku diango diako pendi diayulamema ololo.

¹⁸Lamʼakatelaka Jesu antu aui aso, umbuledi omotshi akayi le ndi, akakhusama la ntundu kandi; akati ati: Onʼami a umuntu ambuvo kakiane. Uyeti, tutshu, utuwahe lunya. Ku ndi ayuyala la lumu.

¹⁹Jesu akunela, akuyeli ndi la ambeki andi.

²⁰Umuntu laki la ekelelo ka dikila deku dikumi la pendi akayi lʼokongo andi, akanandia uhimbu wa dihondio diandi.

²¹Ne dia ndi akati lʼutema andi ati: Naka dimi layunandia kuyanga dihondio diandi tu, layokono.

²²Keli Jesu akasikiso, akawenyi. Ndi akawutela ati: Onʼami a umuntu, ongenengene; mbetawo kaye kambukokonoya. Lu unya ako, umuntu oso akakono.

²³Lamʼakakumi Jesu lu luudu lʼumbuledi, ndi akenyi amvudi wa pungi, la ului wʼantu wadja lufungusu.

²⁴Ndi akawatela ati: Nyumo; ne dia ona umuntu havwi, lu djo kendi. Vo wakawole sali.

²⁵Keli lamʼakawatundja ului wʼantu, Jesu akoto. Ndi akakimela ona umuntu lu lunya, ku ona umuntu aketo.

²⁶Lukumu la dikambu so lakadiangana lu leke lako tshe.

²⁷Lamʼaketi Jesu uma leko, akanga a tutshungu ahendi wakuyeli, wayahangohango vati: We kanula ya Davidi, utuki ketshi!

²⁸Lamʼakandioto lu luudu, akanga a tutshungu wakayi le ndi. Ku Jesu akawambula ati: Nyu mbetawoka nyati: Dimi mbeyaka ntsha dikambu ne? Vo waketawo vati: Elu, Khumadiondjo.

²⁹Ku ndi akawanandia lu ashu; akati ati: Diatshami le nyu uku mbetawo kanyu.

³⁰Ku ashu awo wakasene. Jesu akakokomiya ati: Untu teyaki dikambu ne.

³¹Keli vo wakatumbi, wakadianganya lukumu landi lu leke loso tshe.

³²Lamʼakawayatumbaka, nyulungi, wakela kanga lumi laki la odienge le Jesu.

³³Lamʼakandiatundja odienge, kanga lumi akateketa. Ku elui wʼantu wakambi, wakati vati: Dikambu dia wuhu one diatenama nduku lushi lu Isamyele.

³⁴Keli Afarise wakati vati: Ndi atutundjaka edienge uma lu wulu wʼuwandji wʼedienge.[75]

³⁵Jesu akakindula lu esumba tshe ndu lu ngelu. Ndi aketsha antu lu temwelo diawo, akasambisha lukumu lʼololo la diulelu. Ndi akatakonoyaka wehu tshe wʼelandu la wehu tshe wa hemo.[76]

³⁶Lamʼakandenyi elui wʼantu, ndi akawauki ketshi, ne dia vo wakahenyahenyama, ndu kundjala la ekimanyelu, uku ekoko waha la ulami.[77]

³⁷Ku ndi akatela ambeki andi ati: Diango dia dinela dieko efula, keli ekambi mbeli tshitshe.

³⁸Okone nyolombe Khumadiondjo, kanga dinela, keli ndi atumi ekambi lu dinela diandi.[78]