Read tetala Mako 14 Bible Online

Mako 14 - tetala bible

Mako 14

¹Dikambu so diakayala, eki nshi hyendi, la ntundu ka dambu diʼElekanelu[98] ndu ka dambu dia Ma Diaha la Edya. Elombedi a waki la afundji wakayangaka wuhu wa munda Jesu la lukesu, dia mbudiaka.

²Ku vo wakati vati: Hakuki lu nshi ya dambu, ne dia lundju latukuyala lʼatei wʼantu.

³Lamʼaki Jesu la Betaniya lu luudu la Simona, kanga sudi, ale ma, umuntu omotshi akayi la olondo waki la malashi wʼushinga a wulu. Ndi akuli olondo ako, akawutelawo lʼote.[99]

⁴Keli amotshi wakuki yenyi, wakambwana vati: Dikambu kuna dialanyandi malashi okone na?

⁵Aki ololo nsundja malashi one lʼushinga wuleki denariyo kama shatu, dia mbisha akanga a weula. Vo wakangunangunela umuntu ako.

⁶Keli Jesu akawatela ati: Nyuwete. Okoko wana wohenyahenyanyu? Ndi ambuntshela dikambu diʼololo.

⁷Akanga a weula weko lʼatei anyu nshi tshe.[100] Tena tshe dialanganyu, nyu mbeyaka mbatshela ololo, keli nyu kema la mi lʼatei anyu nshi tshe.

⁸Ndi akatshi uku akandeyi ntsha. Ndi akamvutedi malashi dia nongosola dimba diami utsha lu diumbu.

⁹Mete kanyutelami nti: Lu ahuli tshe wa la kete wayuwutasambishaka lukumu lʼololo lone, wayutataka ndu dikambu diutshendi, dia ndjala euhwelu kandi.

¹⁰Judasi Isakariyote, omotshi la lu dikumi la ahendi, akatshu le elombedi a waki dia ntufunga Jesu.

¹¹Lamʼakawuki dikambu so, vo wakangenangena, wakulaki dia mbusha falanga. Ku ndi akayangi etena kʼololo ka mbakimwelandi.

¹²Lu lushi la ntundu la Ma Diaha la Edya, lushi latuwulambulaka ulambu wa lutshumba wʼElekanelu, ambeki andi wa-kawumbula vati: Lendi alangaye shu ntukolongoswela dia we ntole dambu diʼElekanelu?

¹³Ndi akatumi ambeki andi ahendi ati: Nyutshu lʼusumba, ku nyu nyayutuhumana la pami kemotshi ayembe mbaka kʼashi. Kanyuyeli.

¹⁴Kanyumbuli kanga luudu layundoto nyati: Umbetsha ati: Lendʼeli luudu layuyala pangu kami, dia dimi ndjole la ambeki ami dambu diʼElekanelu?

¹⁵Ndame ayunyenya luudu la wuki la ladiku, leli la diango diambolongoswamaka. Kanyututolongoswele dambu loko.

¹⁶Ambeki wakatumbi, wakatshu utsha lʼusumba, ku vo wakatani uku akandawatela. Vo wakalongosola dambu diʼElekanelu.

¹⁷La dikolo, Jesu akayi la ambeki andi dikumi la ahendi.

¹⁸Lamʼakawadjashi wale ma, Jesu akawatela ati: Mete kanyutelami nti: Omotshi uma lʼatei anyu, lale la mi ma,[101] ayunfunga.

¹⁹Vo wakatatela ndjala la lunyangu la wulu; wakawumbula untu lʼuntu ati: Dimi?

²⁰Ndi akâkaluya diui ati: Ndi eko otoi anyu omotshi wʼuma lu dikumi lʼahendi, ladja la mi lunya lu lukinga,

²¹ne dia Onʼa untu ayumo uku akawafundi lu dikambu diandi. Keli mananu kayali le untu lafunga Onʼa untu! Utuleka ololo untu ako kumbuto.

²²Lamʼakawalekaka ma, ndi akose ukama omotshi, akotshokola, akawatula, akawasha ata ati: Nyose; dimba diami ne.

²³Lʼokongo diku, ndi akose dikoho. Lamʼakanduki lusaka, ndi akawashadio, ku vo tshe wakano.

²⁴Ndi akawatela ati: Dikila[102] diami dia sheki[103] yʼuyuyu diku. Dio diambutshulwama dikambu diʼantu efula.

²⁵Mete kanyutelami nti: Dimi handjono ashi wʼelua wa vinyo ntu, edja ndu lamʼayukuka lushi layumono ashi wʼelua wʼeyuyu lu diulelu dia Unyashungu.

²⁶Lamʼakawimbi usambu, vo wakatshu utsha lʼUkungu wʼEweli.

²⁷Jesu akawatela ati: Nyu tshe nyayutakana; ne dia akafundama ati: Dimi layudiaka ulami wʼekoko, ku ekoko wayudiangana.[104]

²⁸Lamʼayumulwama, dimi layutsho la ntundu kanyu utsha la Ngalili.[105]

²⁹Petero akawutela ati; Kuyanga akina tshe wayutakana, dimi halutakana.

³⁰Jesu akûkaluya diui ati: Mete kakutelami nti: Elo, kʼutshu one, ntundu lekeka ateke tena pendi, we ayumanguna tena satu.

³¹Ndi akatamanya mvuta diui wulu ati: Naka dia mvo, dieli la mi mvo la ye, dimi hakanguna. Ndu ambeki tshe wakati pupu.

³²Vo wakayi lu dihuli diakawetaka vati: Ngetesemane. Jesu akatela ambeki andi ati: Nyudjase lane, ntukutolomba Unyashungu.

³³Ndi akatshu la Petero, Jakoba, la Joani, akatatela mundama la lokonyo ndu la sasi wulu.

³⁴Ndi akawatela ati: Utema ami ambuyala la lunyangu, edja ndu lu nyoi! Nyutshikali lane, nyosenaki.

³⁵Ndi akamutsho yema, akayakosha la kete, akalombe Unyashungu ati: Naka we mbeyaka ntsha okone, etenyi ka unya kene kandekani.

³⁶Ndi akati ati: Aba, Papa, we mbeyaka ntsha akambu tshe; uminyia dikoho ne. Keli aha uku alangami, paka uku alangaye.

³⁷Ndi akayi, akayatana wuladi djo. Ndi akambula Petero ati: Simona, we ambulala djo? We heyi nsena ushidi otoi?

³⁸Nyosenaki, nyolombaki, nyutokoko lʼehimba. Mete, utema nangaka, keli dimba mbeli wodu.

³⁹Ndi akatshu ntu, akatolomba aui pupu.

⁴⁰Ndi akayi ntu, akayatana wuladi djo, ne dia ashu awo waki wetshu efula. Vo kumbeya mbukaluya diui.

⁴¹Ndi akayi le wo etena ka satu; akawambula ati: Nyakalali djo, ndu nyakumuya? Ambukuka: unya ambedima la lokendo! Onʼa untu ambukimwama lu anya wʼantu wa kolo.

⁴²Nyuneli, tutatshokaka. Nyendi, ufungi ami aya suki!

⁴³Diui kunshila unyo, ku Judasi, omotshi a lu dikumi la ahendi, akayi la ului wʼantu wukimedi tombo la tukalimba uma le elombedi a waki, afundji la dikumanyi.

⁴⁴Ufungi andi akawasha djimbitelu ati: Until layononana la mi, keti ndʼuku. Kunyuwundi, kanyutshu la ndi ololo.

⁴⁵Kamʼakandakumi, ndi akayi le Jesu; akaweti ati: Umbetsha, akanonana la ndi.

⁴⁶Ku vo wakawundi, wakukimela.

⁴⁷Keli otoi a wane wakemala lasuki, akasomola yombo yandi, akahimbula ukambi wʼolombedi a wuki tui.

⁴⁸Jesu akawambula ati: Nyu nyambuya la tombo la tukalimba dia ndjumunda, uku atuwundaka opotodi uka?

⁴⁹Dimi laki lʼatei anyu la lushi la lushi, laketshaka antu lʼetemwelo,[106] nyu kumundami. Keli nyete afundelu washidiyami.

⁵⁰Ku ambeki andi tshe wakutshiki, wakalawo.

⁵¹Olongo a pami omotshi akuyeli, olote paka dihondo dia linene tu wengenyembe. Vo wakawundi,

⁵²ku ndi akatshiki dihondo diandi dia linene, akalawo utakataka.

⁵³Vo wakatshu la Jesu le olombedi a ladiku. Elombedi a waki tshe, dikumanyi, la afundji wakasangana leko.

⁵⁴Petero akatuyelaka tshalula, edja ndu lamʼakandoto lu lukumbu lʼolombedi a ladiku. Ndi akadjase la elami, uka dja.

⁵⁵Elombedi a waki la embadi tshe wakayangi dikambu dia nsongwela Jesu, dia mbudiaka, keli vo kumbutana la dikambu.

⁵⁶Antu efula wakosongwela, keli aui awo kombedima.

⁵⁷Amotshi wakemala, wakumamanyia vati:

⁵⁸Shu takawuki ata ati: Dimi layuhandjula etemwelo kene kakahikama lʼanya, ku layuhika kekina lu nshi shatu, kahuhikama lʼanya.[107]

⁵⁹Kuyanga lu dikambu so, aui awo kundjala pupu.

⁶⁰Olombedi a ladiku akemala lʼatei awo, akambula Jesu ati: We hakaluyanduku diui? Dikambudiakosongwela antu ane, ukundi wedio?

⁶¹Keli ndi akatshikala ki, kunkaluya nduku diui. Olombedi a ladiku akawumbula ntu ati: Kristu keye, Onʼa Kanga-Etshoko?

⁶²Ku Jesu akûkaluya diui ati: Dimʼone. Nyu nyayena Onʼa untu udjashi lu lunya la pami la Wulu, ayayi lu wangi wa lʼulungu.[108]

⁶³Ku olombedi a ladiku akatshatsha ahondo andi, ata ati: Akatahumbi emenyi ntu?

⁶⁴Nyu aso wuka lotengo, latengandi Unyashungu. Akananyu na? Ku vo tshe wakawamia vati: Ndi nkukaka mvo.[109]

⁶⁵Akina wakatatela mbohongwela soi, mbukumba elundji, la mbokomola, wata vati: Uta diui! Ku elami wakulungula, wakuhakula tombo.

⁶⁶Lamʼaki Petero lʼesi lʼetei a lukumbu, umuntu omotshi, ukambi wʼolombedi a ladiku, akayi.

⁶⁷Ndi akenyi Petero uka dja, akawendi tee; akawutela ati: Ndu we kaki kame la Jesu yʼusi Nazareta.

⁶⁸Keli ndi akanguna ati: Dimi haleyi kuyanga nimbitela kene kataye. Petero akamo laawo, akatshu utsha la suku dia lukumbu, ku lekeka lakeki.

⁶⁹Umuntu omotshi, ukambi wʼulimu, akawenyi, akatatela mvutela wane wakemadi laawo ati: Omotshi one!

⁷⁰Ndi akanguna ntu. Kemʼedja wane wakemadi laawo, wakatela Petero vati: Mete, we eko otoi awo, ne dia usi Ngalili keye.

⁷¹Ndi akatatela ntshika tunyi, la ntshiba ati: Dimi haleyi untu oso latanyu!

⁷²Kʼetena kako, lekeka lakeki etena ka hendi. Ku Petero akuho diui diakawutela Jesu ati: Lekeka lateki tena pendi, we ayumanguna tena satu. Ku ndi akasunguto, akaleli.