Read tetala Mako 15 Bible Online

Mako 15 - tetala bible

Mako 15

¹Kʼolomo la pindju, elombedi a waki, dikumanyi, afundji, la ului wʼembadi tshe wakasangi lulimi. Vo wakakeleka Jesu, wakatshu la ndi, wakukimo le Pilata.

²Ku Pilata akawumbula ati: We keli Khumʼekanga kʼasi Juda? Jesu akûkaluya diui ati: Wemʼoso ata.

³Elombedi a waki wakosongwela akambu efula.

⁴Pilata akawumbula ntu ati: Undi, we hakaluya nduku diui? Uhulunga efula kʼakambu keso kakosongwelawo!

⁵Keli Jesu kumbukaluya nduku diui ntu. Okone Pilata akambi.

⁶Lu dambu Pilata aki la etshelu ka nkimwela antu usi lukanu omotshi lalombawo.

⁷Untu omotshi, lakawetaka vati: Barabasi, aki lu lukanu, ukelekami la akina wakatomboko kame la ndi. Vo wakadiaki antu lʼetombokwelo kawo.

⁸Ului wʼantu wakatshu, wakôlombe vati: Ututsheli uku atuyututshelaka.

⁹Ndi akawambula ati: Undi, nyu hanyulangi dimi nyutshungwela Khumʼekanga kʼasi Juda?

¹⁰Ndi akeyi ati: Uma lu kandjema mbakukimo elombedi a waki.

¹¹Keli elombedi a waki wakatombosha ului wʼantu, dia vo mvuta vati: Ututshungweli Barabasi,

¹²Pilata akâkaluya diui ati: Ku ntsheli one letanyu nyati: Khumʼekanga kʼasi Juda na?

¹³Vo wakahangohango ntu vati: Udiaki lʼutamba a mpeketanya.

¹⁴Pilata akawambula ati: Dikambu diakona, kolo kakona kutshendi? Keli vo vakatamanya mpangohango vati: Udiaki lʼutamba a mpeketanya!

¹⁵Pilata akalangi munduya saki kʼului wʼantu. Okone ndi akatshungwela Barabasi. Ku ndi akakomola Jesu, akukimo dia vo mbudiaka lʼutamba a mpeketanya.

¹⁶Alimbi wakatshu la ndi lʼetei a luudu lʼumbadi (letawo vati: Luudu lʼelumbwelu); waketana ului awo tshe.

¹⁷Vo wakalotsha Jesu ukutu wa tilili, wakele lufule lʼatende, wakulimbelo.

¹⁸Vo wakawemula vati: Moyo, Khumʼekanga kʼasi Juda!

¹⁹Vo wakokomola uhamba lʼote, wakohongwela soi, wakakhuse adui dia mbolemia.

²⁰Lamʼakawashili mbosoka, vo wakukulula ukutu a tilili, wakolotsha ahondo andi. Ku vo wakatshu la ndi dia ntudiaka lʼutamba a mpeketanya.

²¹Simona, usi Kurene shi Alesandere la Rufu,[110] akayetaka, ayayi uma lʼusui. Vo wakutshutshiya dia ntemba utamba a mpeketanya wa mpane Jesu.

²²Vo wakakumi la Jesu lu dihuli dietawo vati: Ngolongota (nkadimula ati: Dihuli dia lombo).

²³Vo wakawusha wanu wosohanyimi la kundju, keli ndi akaseke.

²⁴Vo wakuhane lʼutamba a mpeketanya. Vo wakuki uwali lu dikambu dia ahondo andi, dia mbeya dihondo diayuyala le untu lʼuntu.[111]

²⁵Lamʼakakumi unya lʼeshidi divwa la pindju, vo wakuhane lʼutamba a mpeketanya.

²⁶Vo wakafundi aui ane wa mbosongwela ladiku ati: “KHUMʼEKANGA KʼASI JUDA.”

²⁷Vo wakahane ndu apotodi ahendi laawo: omotshi lu lunya la landi la pami, la ukina lu lunya landi la lomoso. [112]

²⁸Ku afundelu wakashidiyama ati: Ndi akalema kame lʼandjaki wʼelembe,[113]

²⁹Ambetshi a mbuka wakotenge, wasutsha ete[114] vati: Ya! We lahandjula etemwelo ndu lakahika lu nshi shatu,[115]

³⁰uyashimbeli, ukiti uma lʼutamba a mpeketania

³¹Ndu elombedi a waki la afundji wakosoke vati: Ndi akashimbela akina, keli ndame heyi ndjashimbela.

³²We Kristu, Khumʼekanga ka Isariyele, ukiti kakiane uma lʼutamba a mpeketanya, dia shu mena, keli shu tuketawo! Ndu waku wakahanemi la ndi, wakukanula.

³³Lamʼakakuki unya lʼatei ote, udjima akayala lu kete tshe, edja ndu lʼeshidi esatu.

³⁴Lamʼakakuki unya lʼeshidi esatu, Jesu akawelela diui wulu ati: Eloi, Eloi, lama sabakatani? nkadimula ati: Unyashungu ami, Unyashungu ami, ukundi ansekaye na?[116]

³⁵Lamʼakuki antu amotshi wakemadi laawo diui so, vo wakati vati: Nyulungi, Elidja oso undeta.

³⁶Omotshi akalawo, akatambiya dimbu lu wanu wʼukayi, akadji lu danga, akawusha dia ndi mpiha;[117] akati ati: Nyutukete, tutukenda kan Elidja ayuyuhanula.

³⁷Jesu akawelela diui wulu, akakitshiya.

³⁸Ku dihondo[118] diakahanemi lʼetemwelo, diakate betshi pendi, uma ladiku pulu ndu lʼesi.

³⁹Lamʼakenyi olombodi wʼalimbi, lakemadi lasuki la ndi, ati: Ndi ambukitshiya, ndi akati ati: Mete, untu one aki onʼa Unyashungu!

⁴⁰Ndu amantu amotshi wakendaka uma la tshalula, lʼatei wʼamantu ako, kaki Mariya, usi Mangadala, Mariya, nyangu Jakoba ya dikenda la Jose, ndu Salome.

⁴¹Lamʼaki Jesu la Ngalili, amantu ako wakuyeli, wakukimanyiaka.[119] Amantu akina efula wakayi la ndi la Jerusalema, waki laawo.

⁴²Lushi lako, laki lushi lʼElongoswelo, laid lushi la ntundu ka lushi lʼekila. La dikolo dia lushi lako,

⁴³Josefu yʼusi Arimatiya, umbadi a lukumu, lakalungamelaka ndu ndame diulelu dia Unyashungu, akatshu la dihunga le Pilata, akolombe udu wa Jesu.

⁴⁴Pilata akambi wuhu wakandavu esadi. Ku ndi aketi olombodi wʼalimbi, akayuwumbula etena kakandavu.

⁴⁵Lamʼakulimbitshiya olombodi wʼalimbi dikambu diako, ndi akasha Josefu udu andi.

⁴⁶Josefu akasumbi dihondo dia linene, akahanula udu wa Jesu uma lʼutamba a mpeketanya. Ndi akawombe dihondo diako; akatuwetamia lu liumbu diakawatunguna lu dive. Ku ndi akangitula dive, akadidihi lu suku dia diumbu.

⁴⁷Mariya wʼusi Mangadala, la Mariya nyangu Jose wakenyi lene akawawetamia.