Read tetala Mako 2 Bible Online

Mako 2 - tetala bible

Mako 2

¹Lʼokongo a nshi motshi, Jesu akakalula la Kaperenauma. Lukumu lakadiangana ati: Ndi eko lu luudu.

²Antu efula wakamote laawo, edja ndu nduku hyuli yakiko kuyanga la suku. Ndi akasambisha.

³Antu wakayi le ndi la kanga ekhusi, lakawayembaka antu anei.

⁴Lamʼakiwo kumbeya nkuma lasuki la Jesu ne dia ului wʼantu, vo wakunyia kumbi ka luudu lone akindi. Lamʼakawunyia kumbi, wakahuluya tangi kaketami kanga ekhusi.

⁵Lamʼakenyi Jesu mbetawo kawo, ndi akatela kanga ekhusi ati: Onʼami, kolo yaye yambudimanyema.

⁶Keli afundji amotshi wakadjashi laawo, wakayambula lʼetema vati:

⁷Ukundi wata untu one osoku na? Ndi ambotenga Unyashungu. Akona eya nyimanyia kolo, naka aha Unyashungu ndame?

⁸Jesu akeyi lu utemʼandi uku akawayakananyaka. Ku ndi akawambula ati: Okoko wana wayakananyanyu lu etemʼanyu okone na?

⁹Dikambu diakona diuleki tshitshe: mvutela kanga ekhusi ati: Kolo yaye yambudimanyema, kana mvuta ati: Eto, osa tangi kaye, okendekende?

¹⁰Keli dia nyu mbeya nyati: Onʼa untu eko la wulu wa nyimanyia kolo la kete — ndi akatela kanga ekhusi — ati:

¹¹Dimi lambukutela nti: Eto, osa tangi kaye, utshu lakaye.

¹²Kʼetena kako, ndi aketo, akose tangi kandi, akatumbi lu ashu wʼantu tshe. Ku antu tshe wakambi, wakatumbula Unyashungu, wata vati: Shu tatenyi dikambu dia wuhu one.

¹³Jesu akatshu ntu lʼumamu wʼuduwa. Ului tshe wʼantu wakayi le ndi, ku ndi akawaetsha.

¹⁴Lamʼakandatetaka, ndi akenyi Lewi, onʼa Alafeyo, udjashi lʼelambwelu. Jesu akaweti ati: Undjeli, ku ndi akunela, akuyeli.

¹⁵Lamʼakadjashi Jesu la ambeki andi lu luudu la Lewi wale ma, elungudi wʼelambu efula la antu wa kolo wakayudjase kame la wo. Wane wakatuyelaka, waki efula.

¹⁶Lamʼakenyi afundji wa Afarise Jesu ale la antu wa kolo la elungudi wʼelambu ma, vo wakambula ambeki andi vati: Dikambu kuna dialendi la dianondi la elungudi wʼelambu la antu wa kolo?

¹⁷Lamʼakuki Jesu dikambu so, ndi akawatela ati: Akanga a wulu hawuhumbi wetshi, paka akanga a hemo. Dimi kundja dia ndjeta antu wʼololo, lakayi dia njeta antu wa kolo.

¹⁸Ambeki wa Joani la Afarise wakakilaka mbu ya nde. Antu wakayi le Jesu, wakawumbula vati: Ambeki wa Joani la ambeki wa Afarise nkilaka mbu ya nde. Dikambu kuna diahakili ambeki aye?

¹⁹Jesu akawambula ati: Engenyi wʼutshuki a wadi mbeyaka nkila mbu ya nde, lamʼeki utshuki kame la wo? Lamʼeki utshuki la wo, vo haweyi nkila mbu ya nde.

²⁰Keli nshi yayuya, yayuwakosola utshuki. Lushi lako, mbayuwukila mbu ya nde.

²¹Nduku untu atotelaka daka dia dihondo diʼuyuyu lu dihondo diʼumusu, ne dia daka dia dihondo diʼuyuyu atukata etshi ka dihondo diʼumusu, ku ushu ndjuyala wuki.

²²Ndu nduku untu ayudja wanu wʼuyuyu lu atapa wa dikuhu diʼedjedja. Naka wayutsha osoku, wanu wayata dikuhu, wayutshulo, la dikuhu diayulana. Keli watudjaka wanu wʼuyuyu lu atapa wa dikuhu diʼeyuyu.

²³Lamʼakatetetaka Jesu lu dikambo diʼasami lushi la mumuya, ambeki andi wakatatela muna nanula.[9]

²⁴Afarise wakawumbula vati: Enda, ukundi atshawo dikambu diʼekila lushi lʼekila?

²⁵Ndi akawambula ati: Undi, nyu nyatali dikambu diakatshi Davidi, ndi la wane waki la ndi, lamʼakiwo la uhumba ndu la ndjala?

²⁶Nyu nyatali okone akandoto lu luudu la Unyashungu lamʼaki Abiyatara olombedi a ladiku? Uku akandali ma dia Eyalelu, dieli ekila nde, diakalekaka paka elombedi etu,[10] ndu uku akandasha wane waki la ndi?[11]

²⁷Ndi akawatela ati: Lushi lʼekila lakatungama ne dia antu, keli antu kuntungama ne dia lushi lʼekila.

²⁸Onʼa untu eko uwandji ndu wa lushi lʼekila.