Read tetala Mako 4 Bible Online

Mako 4 - tetala bible

Mako 4

¹Jesu akatatela mbetsha antu ntu lʼumamu wʼuduwa. Ului a wuki wʼantu wakudingi. Ku ndi akoto lu watu waki lʼuduwa,[15] akadjase. Ului tshe wʼantu wakemala lʼumamu wʼashi.

²Ndi akawaetsha akambu efula la wela. Ndi akawatela lu wetshelu andi ati:

³Nyulungi! Umbuki akatshu la ntuka wuhu.

⁴Lamʼakandatukaka wehu, emotshi wakako lʼumamu a mbuka. Fudu yakayi, yakekomola.

⁵Wehu ekina wakako lu kete yʼave, lene aki kema kete kambi. Kemʼedja vo wakatumbi, ne dia kete yaki kunune.

⁶Lamʼakandi unya, vo wakalengela. Vo wakalungula, ne dia tawaki la ediu.

⁷Wehu ekina wakako lʼatei wʼatende. Atende wakuli, waketshidia, ku vo kumbidja tongo.

⁸Wehu ekina wakako lu kete yʼololo, wakuli, wakangone. Vo wakato tongo; wakayifudia: emotshi akumi asatu akumi asatu, akumi asamalu akumi asamalu, ekina lukama lukama.

⁹Ndi akati ati: One leli la atui a mbuka, uki.

¹⁰Lamʼakawatshikala la ndi ndame, waku waki lasuki la ndi la ambeki andi dikumi la ahendi, wakawumbula dikambu dia wela ako.

¹¹Ku ndi akâkaluya diui ati: Wakanyusha ewu ka mbeya akambu wakashama wa diulelu dia Unyashungu Keli le antu akina, akambu mvutamaka la wela.

¹²Okone menda wayenda, keli hawenyi; mbuka wayuka, keli hawushihudia, ne dia vo watukukadimula etema dia kolo yawo nyimanyema?[16]

¹³Ndi akawambula ati: Nyu hanyulimbitela wela ene? Naka kema, ukundi ayunyulimbitela wela tshe?

¹⁴Umbuki a wuhu one, eli one latutaka aui wa Unyashungu.

¹⁵Wehu wakako lʼumamu a mbuka weli wane watukaka diui, ku kemʼedja Satana ambakosola diui diakawuki.

¹⁶Wehu wakako lu ave, weli wane watukaka diui, ku kemʼedja watudietawoka lʼongenongeno.

¹⁷Keli vo waha la ediu lʼetema awo, watuyalaka etenyi ketu. Lʼokongo diku, lamʼayuya fono la asui, vo wayutakana esadi.

¹⁸Wehu wakako lʼatei wʼatende, weli wane watukaka aui,

¹⁹keli tukanyi tʼakambu wa lʼetena kene, lukesu lʼekundji, la saki ka diango dikina wamboto, wambutshidia diui, ku dio diambuyala aha la wuhu.

²⁰Wehu wa kako lu kete yʼololo, weli wane watukaka diui la watudietawoka. Vo watotokaka elua: emotshi akumi asatu akumi asatu, akumi asamalu akumi asamalu, ekina lukama lukama.

²¹Jesu akawambula ati: Watelaka tala dia diotshiya la tshina dia kidunda, kana lʼukilingu a tangi? Hawutudikitshaka ladiku diʼekitshelu ka tala?[17]

²²Nduku dikambu diambushama, diahashwama. Ntu nduku dikambu diambukumbama, diahenama.[18]

²³Naka untu la atui wa mbuka, ndi uki.

²⁴Ndi akawatela ati: Nyudji tukanyi lu wehu wʼaka-mbu wukanyu. Wayunyedikela diango, uku awaedikelanyu[19] Wayunyusha ndu diango dikina ladiku.

²⁵Untu tshe leli la diango, wayuwusha dikina. Untu tshe laha la diango, wayokosola ndu kene keli la ndi.[20]

²⁶Jesu akati ati: Diulelu dia Unyashungu diambufana la untu lakuki wuhu lu kete.

²⁷Untu ako aketamaka, aketoka lʼutshu ndu la yanyi. Wehu wakatumbi, wakuli, ku ndi kumbeya okone akawuli.

²⁸Kete yame mbatuyatungelaka wehu: ntundu dikatshi, lʼokongo uhundu, ku tongo yʼetshundju lu asha.

²⁹Lamʼayela wehu, ku ndi muna la lukuwa, ne dia nshi ya dinela yambukuka.[21]

³⁰Jesu akambula ati: La na ayutufanya diulelu dia Unyashungu? Wela akona wayutuwauka lu dikambu diadio?

³¹Dio dieko uku lotongo la lohodia, latuwukaka lu kete, kuyanga lo ndeka wehu tshe wa la kete tshitshe.

³²Lamʼalukawo lu kete, ku lamʼatumbalo, utamba alo atulekaka mbu ya nde tshe wuki, atutundjaka tahi ya waki. Okone fudu ya lʼulungu mbeyaka mbidjase lu dedi diawo.

³³Ndi akawaetshaka diui dia Unyashungu la wela efula wa wuhu one, wuhu wakaweyi nimbitela diui.

³⁴Ndi kumbaetsha diui, tshikima ndu wela. Keli lamʼakandayalaka ndi la ambeki andi atu, ndi akamanyaka akambu tshe fundu.

³⁵Lushi lako la dikolo, Jesu akawatela ati: Tutshu la wedi.

³⁶Lamʼakawakimo ului wʼantu, vo wakoto la ndi kaku lu watu. Ndu watu ekina waki la wo.

³⁷Ngimbi ka wuki kakayi. Asukhu wʼashi wakoto lu watu, ku watu akayangi ndula lʼashi.

³⁸Jesu aki la kuma ka watu, etami djo lu weko. Vo wakawemula; wakawutela vati: Umbetsha, we ambetawo dia shu mvo?

³⁹Ndi akemo, akahangwela loheledi, akatela uduwa ati: Olembohali! Ku loheledi lakanyukama, lakalembohala yoo.

⁴⁰Ndi akawambula ati: Ukundi ukanyu woma na? Nyu nyatayala la mbetawo?

⁴¹Ku wakatamanya mbuka woma; wakambwana vati: Akona one na? Ndu loheledi ndu uduwa wambukitanyia diui diandi!