Read tetala Mako 5 Bible Online

Mako 5 - tetala bible

Mako 5

¹Vo wakakumi la wedi wʼuduwa, lu kete yʼasi Ngadara.

²Jesu akatumbi uma lu watu. Kemʼedja kanga odienge akayayakaka uma la waumbu, akahumana la ndi.

³Untu ako akadjaseka la waumbu. Nduku untu akeyi mbukeleka kuyanga la molola,

⁴ne dia wakukelekaka ekeleka efula la wulu la kata la molola, keli ndi akahimbulaka molola, akahandjulaka kata. Nduku untu aki la wulu wa mbolembia.

⁵Ndi akahangohangoka nshi tshe, ndu lʼutshu ndu la yanyi, la waumbu ndu lʼekungu. Ndi akayakotaka ave.

⁶Lamʼakandenyi Jesu tshalula, ndi akalawo, akotemola.

⁷Ndi akahangohango la diui dia wulu ati: Dikambu diakona diasami la ye, we Jesu, we Onʼa Unyashungu KhumʼUlungu? Dimi lambukutshiba lu lukumbu la Unyashungu nti: Tunsuyaki!

⁸ne dia Jesu akawutela ati: We odienge, utumbi uma le untu one.

⁹Jesu akawumbula ati: Lukumbu laye na? Ndi akûkaluya diui ati: Lukumbu lami leli “Ului a Wuki,” ne dia efula kesu.

¹⁰Ndi akôsengasenga efula ati: Tututshanyaki uma lu wudja one.

¹¹Limba la wuki la sumbu lakalekaka lʼuhulula wa dikuna.

¹²Vo wakôsengasenga vati: Ututumi le sumbu ku, tutuyôto

¹³Ndi akawasha wulu wa ntsho. Keli edienge ako wakatumbi, wakatoto sumbu. Limba lako lakakhunguso lʼuhulula utsha lʼuduwa. Sumbu yako yaki eiula uku nunu pendi. Yo yakoto lʼuduwa, yakavu.

¹⁴Elami ayo wakalawo, wakatuta dikambu diako lʼusumba ndu lu tusamba. Ku antu wakayi dia ndjenda dikambu diakayala.

¹⁵Vo wakayi le Jesu, wakenyi kanga odienge, one laid la Ului a Wuki wʼedienge, udjashi, olotshi ahondo, ndu aya la yimba, ku vo wakuki woma.

¹⁶Emenyi wa dikambu diako wakawatelaakambu tshe wakayala le kanga odienge, ndu dikambu dia sumbu.

¹⁷Vo wakatatela nsengasenga Jesu, dia ndi mumo uma lu leke lawo.

¹⁸Lamʼakandoto lu watu, kanga odienge akosengasenga dia ndi ntsho la ndi,

¹⁹keli Jesu kumbetawo. Ndi akawutela ati: Utshu lakaye, le engenyi aye. Utasanyia akambu a waki wukutshedi Khumadiondjo, la ketshi kakandakuki.

²⁰Ndi akatshu, akatatela nyanganya lukumu lʼakambu a waki wakutshela Jesu la Dekapoli. Ku antu tshe wakambi.

²¹Lamʼakateho Jesu ntu lu watu utsha la wedi ukina, ului a wuki wʼantu wakudingi. Ndi aki lʼumamu wʼuduwa.

²²Umbuledi omotshi wʼetemwelo, lukumbu landi Jayiro, akayi. Lamʼakandenyi Jesu, ndi akukhusamela.

²³Ndi akosengasenga wulu ati: Onʼami a umuntu a tshitshe uyanga mvo: uyeti, utuwahe anya, keli ndi akono, atshikali la lumu.

²⁴Ku Jesu akatshu la ndi. Ului a wuki wʼantu wakuyeli, watukumana.

²⁵Umuntu omotshi aki la hemo ka dikila deku dikumi la pendi.

²⁶Ndi akasuwi wulu lu anya a wetshi efula. Ndi akamani diango diandi tshe le wo. Keli kandji kunkitakita nduku yema; to kakaleki wulu.

²⁷Ndi akuki lukumu la Jesu, akayi lʼului wʼantu lʼokongo andi, akananda dihondo diandi;

²⁸ne dia ndi akati lʼutema ati: Naka layunanda kuyanga ahondo andi atu, dimi layokono.

²⁹Kʼetena kako, dikila diakahimbo, ku ndi akayauki lu dimba diandi ati: Dimi lambokono hemo kami kene.

³⁰Jesu akayauki esadi ati: Yema ya wulu yambutumba uma le mi. Ku ndi akasikiso lʼatei wʼului wʼantu, akambula ati: Unandji ahondo ami?

³¹Ambeki andi wakûkaluya diui vati: We uku ena ului wʼantu one wukudingi, ku we mumbula wati: Umunandji na?

³²Ndi akakesakesa dia mena umuntu lakatshi dikambu diako.

³³Keli umuntu ako akeyi dikambu diakatshama le ndi, akuki woma, akadidima. Ku ndi akayi, akukhusamela, akawutela aui tshe mete.

³⁴Jesu akawutela ati: Onʼami, mbetawo kaye kambukokonoya; utshu la ki, okono tshe uma lu hemo kaye.

³⁵Lamʼakindi lu nteketa, antu amotshi wakayi uma laka umbuledi wʼetemwelo, wakawutela vati: Onʼaye a umuntu ambuvo. Ukundi asuyaye umbetsha ntu?

³⁶Lamʼakuki Jesu aui aso, ndi akatela umbuledi wʼetemwelo ati: Tukaki woma; dikambu otoi, etawo.

³⁷Ndi kumbetawo nduku untu mbuyela, tshikima Petero, Jakoba, la Joani, onangu Jakoba.

³⁸Vo wakakumi laka umbuledi wʼetemwelo. Ndi akatani lufungusu efula, antu walela, wada tukuku.

³⁹Lamʼakandoto, ndi akawambula ati: Dikambu kuna diadjanyu lufungusu lʼalelu wuhu one na? Ona havwi, lu djo kendi.

⁴⁰Vo wakawole sali, ku ndi akatundja antu tshe. Ndi akose shi la nyangu ona la wane wakayi la ndi, akoto la wo lone aki ona.

⁴¹Ndi akakimela ona lu lunya, akawutela ati: Talita kumi, nkadimula ati: Ona umuntu, lambukutela nti: Eto.

⁴²Lʼetena kako, ona umuntu aketo, akakendakenda. Ndi aki la deku dikumi la pendi. Ku antu wakatamanya mamba.

⁴³Jesu akakokomiya wulu ati: Tanyutelaki untu dikambu ne. Ku ndi akawatela ati: Nyusha ona one engo ka nde.