Read tetala Mako 6 Bible Online

Mako 6 - tetala bible

Mako 6

¹Jesu akamo uma leko, akatukuma lu leke lawo. Ambeki andi wakuyeli.

²Lu lushi lʼekila, ndi akatatela mbetsha antu lʼetemwelo. Antu efula wakuki aui andi, wakambi, wata vati: Uma lendi ambuyala untu one la akambu aso? Yimba yakona nye yambundukundja? Ndi akambu wa mamba wambutshama lu anya andi li!

³Aha utshudi mbendi, onʼa Mariya, onangu Jakoba, Jose, Judasi, la Simona? Akadiendi waha lʼatei asu uka? Ku vo wakatakana lu dikambu diandi.

⁴Jesu akawatela ati: Umvutshi ndjalaka aha la kenemo, tshikima lu leke lawo,[22] lu khumbu kawo, la lu luudu lawo.

⁵Ndi kumbeya ntsha nduku dikambu dia wulu leko, tshikima akanga a hemo atoi mbakandahe anya, mbakandakonoya.

⁶Ndi akambi, ne dia uhedia awo. Jesu akakindula lu ngelu ya lʼutshimba atetsha antu.

⁷Ndi aketi ambeki dikumi la ahendi, akatatela mbatuma ahendi ahendi. Ndi akawasha wulu wa mbahamela edienge.

⁸Ndi akawadjangela ati: Tanyotolaki engo lu lokendo, tshikima danga tu. Tanyotolaki ma, tapa, kuyanga falanga lu eya.

⁹Kanyudjaki tupapa lʼekulu, tanyolotaki shiwawu pendi.

¹⁰Ndi akawatela ati: Lamʼayunyoto lu luudu kanyutshikali loko, edja ndu lamʼayunyunela.

¹¹Naka antu wa lu leke lomotshi hawunyulungula, ndu hawuki aui anyu, lamʼayunyumo uma leko, kanyuhumeli ditshu dia lʼekulu anyu uku omenyi le wo.[23] [24]

¹²Ku vo wakatshu, watasambisha antu dia vo nkadimula etema.

¹³Vo wakatundja edienge efula, wakakiti efula waki la hemo iso, wakakonoya.[25]

¹⁴Khumʼekanga Herode akuki wata dikambu dia Jesu, kanga lukumu lakayala wuki. Antu amotshi wakati vati: Joani Ubatizanyi oso ambulo uma lu diumbu. Diako mbendi la wulu wa ntsha akambu aso wa mamba.

¹⁵Akina wakati vati:[26] Elidja oso. Akina vati: Umvutshi omotshi oso.

¹⁶Lamʼakuki Herode dikambu so, ndi akati ati: Joani lakamahimbula ote oso, ndi kambulo uma lu nyoi.

¹⁷Herode ndame kakatumi antu wakandi Joani. Vo wakukeleka, wakawudji lu lukanu. Dikambu so diakayala uma lu dikambu dia Herodiyasi, wadi a Filipo onangu, ne dia Herode akutshuki.

¹⁸Joani akatela Herode ati: Eko ekila dia we ndjala la wadi a onanyo.[27]

¹⁹Uma lu dikambu so, mbakahetsha Herodiyasi Joani. Ndi akalangi mbudiaka, keli ndi kumbeya ntsha,

²⁰ne dia Herode akukaka Joani woma. Ndi akeyi ati: Pami kʼololo kʼekila kendi, ku ndi akulami ololo. Kuyanga ndi akakanana lamʼakanduki aui andi, ndi akawaukaka lʼongenongeno.

²¹Lamʼakakuki lushi la mbuto ka Herode, ndi akakatela asi mbalasa andi, elombodi andi wʼalimbi, la antu a waki wa la Ngalili dambu.

²²Ona umuntu a Herodiyasi akoto lu luudu, akano wenye, akangenyangenya Herode, ndi la wane waki la ndi lu dambu. Khumʼekanga akatela usekaseka a umuntu ako ati: Onombe engo tshe kalangaye, ku layukushato.

²³Ndi akutshibela ati: Engo tshe kayuyonomba, layukushato, kuyanga etenyi ka hendi ka diulelu diami.

²⁴Usekaseka a umuntu akatumbi, akatumbula nyangu ati: Engo kakona katumolomba? Nyangu akûkaluya diui ati: Ote wa Joani Ubatizanyi.

²⁵Ku ndi akoto esadi le khumʼekanga, akawutela ati: Umbisha ote wa Joani Ubatizanyi kakiane lu donga, mbalangami.

²⁶Khumʼekanga akanyangi efula, keli uma lu tshibelu diandi la ne dia wane waki la ndi lu dambu, ndi kunanga mbudima.

²⁷Lʼetena kako, khumʼekanga akatumi dimbi dimotshi uma lʼatei a waku wakulamaka; akawutela ati: Utela ote andi. Ku ndi akatuhimbula ote lu luudu la lukanu,

²⁸akela ote andi lu donga. Ndi akawusha usekaseka a umuntu, ku usekaseka akatuwusha nyangu.

²⁹Lamʼakuki ambeki wa Joani Ubatizanyi dikambu diako, vo wakayosa udu andi, wakatukhunde.

³⁰Atumami wakasangana kame la Jesu; wakawutela akambu tshe wakawatshaka ndu akambu tshe wakawaetshaka antu.

³¹Ndi akawatela ati: Nyuyeti utsha lu dihuli dia dieta, lu usui wa shenga, nyutumuya yema leko. Ne dia antu efula waketetaka: wane waya, wane watsho, ku vo kundjala la etena ka nde ma.

³²Okone vo wakatshu lu watu utsha lu dihuli dia dieta, lʼusui wa shenga.

³³Antu efula wakawaenyi lamʼakawatatshokaka, wakawaeyi. Vo wakasamanya lʼekulu uma lu esumba tshe, ku wakatukuma ntundu lu dihuli diakawatatshokaka.

³⁴Jesu akatumbi uma lu watu, akenyi ului a wuki wʼantu. Ndi akawauki ketshi, ne dia vo waki uku ekoko waha la ulami;[28] akatatela mbaetsha akambu efula.

³⁵Lamʼakaselama unya, ambeki andi wakayi le ndi; wakawutela vati: Dihuli ne dieko dieta la unya utsha mbidja;

³⁶ukimo antu ane, vo watshu lu tusamba la lu ngelu ya lasuki, watuyasumbeli mbu ya nde.

³⁷Keli ndi akâkaluya diui ati: Nyame, nyuwasha mbu ya nde. Vo wakawumbula vati: Shu mbeyaka ntusumba ma la denariyo kama hyendi, ku dio nkuka dia ndjuwasha dia vo nde?

³⁸Ndi akawambula ati: Ekama engana weli la nyu? Nyutshu, nyutendi. Lamʼakawateya, wakûkaluya diui vati: Ekama etanu, la nsi hyendi.

³⁹Ndi akawatela ati: Antu tshe wadjase lu elui lʼadiyu.

⁴⁰Vo wakadjase lʼelui, lukama lukama, akumi atanu akumi atanu.

⁴¹Ndi akose ekama wa ma etanu la nsi hyendi; akalela lʼulungu, aketshokola, akawatula. Ku ndi akasha ambeki dia vo nkitsha la ntundu kʼantu. Ndi akakahanya ndu nsi hyendi.

⁴²Vo tshe wakali, wakaluti.

⁴³Ku vo wakatongona betshi diakatshikala asaka dikumi la ahendi ndu nsi.

⁴⁴Wane wakali ma, waki apami nunu tanu.

⁴⁵Kemʼedja ndi akotshiya ambeki andi lu watu, dia vo ntatela ntsho la ntundu kandi utsha la wedi, la Betesayida. Ndame akatshikala dia nkimo elui wʼantu.

⁴⁶Lamʼakandakimo antu, ndi akatshu lu dikuna dia ntolomba.

⁴⁷La dikolo, watu aki lʼatei wʼuduwa. Lʼetena kako Jesu ndame aki lʼumamu wʼuduwa.

⁴⁸Ndi akenyi ati: Ambeki ami wambusuwa lu ndjuka, ne dia lopepe lakâkaluyaka. La kokʼa ntundu, ndi akayayakaka uya le wo, ayakendakenda ladiku diʼashi. Ndi akayangi mbalekana.

⁴⁹Lamʼakawawenyi ayakendakenda ladiku diʼashi, vo wakakani vati: Edimu keku, wakawana.

⁵⁰Vo tshe wakawenyi, wakakasana. Ndi akawatela esadi ati: Nyongenengene, dime one; tanyukaki woma.

⁵¹Ndi akoto le wo lu watu; lopepe laka-lembohala. Ku vo wakaleki mamba.

⁵²Vo kumana dikambu dia ekama wa ma fundu; etema awo wakayala lunyu.

⁵³Lamʼakawateho, vo wakayi lu kete ya Ngenesareta, wakasukana lʼumamu.

⁵⁴Lamʼakawatumbi uma lu watu, antu wakeyi Jesu esadi.

⁵⁵Vo wakakindula lu leke lako tshe, wakatatela memba akanga a hemo lu tangi yawo; wakatshu lene akawuki vati Leko kendi.

⁵⁶Lu dihuli diakandakumaka lu ngelu, lʼesumba kana lu tusamba, vo wakakitshaka akanga a hemo lu tuka. Vo wakosengasengaka dia ndi mbetawo vo munanda kuyanga uhimbu wa dihondo diandi tu. Ku wane tshe wakawunanda, wakakono.