Read tetala Mako 8 Bible Online

Mako 8 - tetala bible

Mako 8

¹Lu nshi sho, ului a wuki wʼantu wakamote ntu. Vo tawaki la mbu ya nde. Jesu aketi ambeki andi, akawatela ati:

²Dimi lambuka ului one wʼantu ketshi, ne dia vo wambutshikala la mi nshi shatu. Vo kema la mbu ya nde.

³Naka dimi layakimo utsha la wakawo la ndjala, vo wayutokomo lu mbuka, ne dia amotshi wakayi uma lʼetali.

⁴Ambeki andi wakawumbula vati: Lendi ukuki untu nkundja ekama wa ma lu dihuli ne dia shenga, dia ndutsha antu ane?

⁵Ndi akawambula ati: Ekama engana weli la nyu? Vo wakûkaluya diui vati: Esambeli.

⁶Ndi akadjasha ului wʼantu la kete. Ndi akose ekama ako esambeli, akuki lusaka, akawatula. Ndi akasha ambeki andi dia vo nkitsha la ntundu kawo, ku vo wakekitsha la ntundu kʼului wʼantu.

⁷Vo waki ndu la tusisi. Lamʼakandatotshokola, ndi akawatela ati: Nyutukitsha ndu to la ntundu kawo.

⁸Antu wakali, wakaluti. Vo wakatongona betshi diakatshikala asaka esambeli.

⁹Vo waki antu uku nunu nei. Ku Jesu akakimo.

¹⁰Kemʼedja ndi akoto la ambeki andi lu watu, wakatshu utsha lu beke dia Dalamanuta.

¹¹Afarise wakayi le Jesu; wakatatela mama la ndi, wayanga djimbitelu yʼuma lʼulungu,[33] dia mbuhimba.

¹²Ndi akakitshakitsha lumu, akambula ati: Okoko wana wayanga wa lolonga lone djimbitelu?[34] Mete kanyutelami nti: Hawenya wa lolonga lone djimbitelu.

¹³Ndi akatshiki, akoto ntu lu watu, akatshu utsha la wedi ukina.

¹⁴Ambeki andi wakuhela ntola ma. Paka ukama otoi utu mbaki la wo lu watu.

¹⁵Ndi akakokomiya ati: Nyendi ololo, nyewo edya kʼAfarise[35] ndu edya ka Herode.

¹⁶Vo wakatanela vati: Shu kema la ma.

¹⁷Jesu akeyi tukanyi tawo; akawambula ati: Ukundi wadjanyu lundju ne dia nyu nyaha la ma? Nyu nyatalimbitela, kuyanga mana fundu? Etema anyu wambuyala lunyu?

¹⁸Nyu la ashu, ku nyu hanyenyi? Nyu la atui, ku hanyuki?[36] Undi, nyu hanyuho?

¹⁹Lamʼakamatula ekama etanu wa ma lʼatei wʼantu nunu tanu, asaka angana wa betshi dia ma diakatshikala wakanyatongona? Ku vo wakûkaluya diui vati: Dikumi la ahendi.

²⁰Ndu lamʼakamatula ekama wa ma esambeli lʼatei wʼantu nunu nei, asaka angana wa betshi dia ma diakatshikala wakanyatongona? Vo wakûkaluya diui vati: Esambeli.

²¹Ndi akawambula ati: Nyu nyatamani fundu utu?

²²Vo wakakumi la Betesayida. Antu amotshi wakayi la kanga tshungu le ndi, wakosengasenga vati: Uwunandi.

²³Ndi akakimela kanga tshungu lu lunya, akamo la ndi uma lu ngelu. Ndi akawutela losoi lu ashu, akawahe anya; akawumbula ati: We menaka engo kemotshi?

²⁴Ndi akedia ashu, akati ati: Dimi lambena antu, keli lambuwaena wakendakenda uku etamba.

²⁵Jesu akananda ashu andi ntu, ku ndi akendi tee, akakono, akenyi diango tshe ololo,

²⁶Ndi akutumi lakandi; akawutela ati: Tutshokaki la ngelu.

²⁷Jesu akatshu, ndi la ambeki andi, utsha lu ngelu ya la Kayisariya Filipi. Ndi akambula ambeki andi lu mbuka ati: Akona amvuta antu, emi?

²⁸Vo wakûkaluya diui vati: Joani Ubatizanyi; akina vati: Elidja; akina vati: Umvutshi omotshi.[37]

²⁹Ku ndi akawambula ati: Ya nyu, amvutanyu, emi na? Petero akûkaluya diui ati: Kristu keye.[38]

³⁰Ku ndi akakokomiya ati: Tanyutelaki untu dikambu diami.

³¹Jesu akatatela mbaetsha ati: Dieli la Onʼa untu dia nsuyama efula. Dieli la mi dia ntunama le dikumanyi, la le elombedi a waki, ndu le afundji. Ndu dieli la mi dia ndjakema, la dia mbulo lamʼayeta nshi shatu.

³²Ndi akawatela aui aso hwe. Petero akawose, akatatela mbushimba la mbulaka.

³³Keli Jesu akasikiso, akenyi ambeki andi. Ndi akahangwela Petero ati: Satana! utshimbi Pokongo ami. We hadji yimba lu akambu wa Unyashungu, paka lu akambu wʼantu.

³⁴Ndi aketi ului wʼantu la ambeki andi, akawatela ati: Naka untu alanga ndjelami, ndi ayaseke, embe utamba andi a mpeketanya, andjeli.[39]

³⁵Ne dia untu tshe lalanga mamela lumu landi, ayulushisha; keli one lashisha lumu landi dikambu diami la dia lukumu lʼololo, ayulamela.[40]

³⁶Waho akona wayuyala le untu lakundja kete tshe, naka ndi ambushisha lumu landi lu dikambu diako?

³⁷Engo kakona kukuki untu mengonya la lumu landi?

³⁸Untu tshe lʼatei a lolonga lone la luseka ndu lʼakambu wa kolo layumbuka dimi la aui ami sonyi, ndu dimi, Onʼa untu, layuwuka sonyi lamʼayumuya lu lutumbu la Papa, kame la andjelo wʼekila.