Read tetala Luka 1 Bible Online

Luka 1 - tetala bible

Luka 1

¹Antu efula wambutatela nkondola okondo one wʼakambu wakatshama lʼatei asu,

²uku akatutela wane waki emenyi la ekambi wa diui uma lʼetatelu.

³Ndu dimi lakakani yimba nti: Ololo dimi nkufundela lʼonondji wʼololo, we Teofilo, ne dia dimi lakeyi akambu ane tshe ololo uma lʼetatelu,

⁴dia we mbeya mete ka aui wakawakulakanyaka.

⁵Lu nshi ya Herode, khumʼekanga ka Judiya, olombedi omotshi akiko, lukumbu landi Zekariya[1]. Ndi aki lʼonongo wa Abidja[2] Wadendi aki kanula ya ana amantu wa Arona, lukumbu landi Elisabete.

⁶Vo ahendi waki ololo lu ashu wa Unyashungu. Vo wakakendakendaka lu elembe la lu adjangu tshe wa Khumadiondjo aha la unungu.

⁷Vo tawaki la ona, ne dia Elisabete aki ekumba. Vo ahendi waki esumbi.

⁸Lamʼakandatshaka ulimu andi wʼolombedi la ntundu ka Unyashungu la lushi la lushi,

⁹uku aki ulimu wʼolombedi, diaki la ndi dia mboto lʼetemwelo ka Khumadiondjo la ntutshumba tsho.

¹⁰Ului tshe wʼantu wakalombaka lʼandja lu unya wakawatshumbaka tsho.

¹¹Ondjelo wa Khumadiondjo akene le ndi, emadi lu lunya landi la pami lʼediakelu ka ntshumba tsho.

¹²Zekariya akakasana lamʼakandawenyi. Woma akawundi.

¹³Keli ondjelo akawutela ati: Zekariya, tukaki woma, dombelo diaye diambukema. Wadeye Elisabete ayuta la ye ona pami, kuwole wati: Joani.

¹⁴We ayuyala la ongenongeno, ndu la diese. Antu efula wayongenangena dia eutwelu kandi.

¹⁵Ndi ayuyala wuki lu ashu wa Khumadiondjo. Ndi hono wanu kana enono ka wulu.[3] Ndi ayuludiama la Nyuma kʼOlolo uma lʼutema a nyangu.

¹⁶Ndi ayukadimula asi Isariyele efula Le Khumadiondjo, Unyashungu awo.

¹⁷Ndi ayokendakenda la ntundu ka Unyashungu Lu nyuma ndu lu wulu wa Elidja, Dia nkadimula etema wa washi le anʼawo[4] La dia nkadimula akanga wa uhedia lu yimba yʼantu wʼololo, Ne dia ntanya Khumadiondjo antu wolongoswami.

¹⁸Zekariya akambula ondjelo ati: Ukundi ayumeya dikambu ne? ne dia dimi laya usumbi, wademi ambutshunda.

¹⁹Ondjelo akâkaluya diui ati: Dimi, Ngabiriyele,[5] latemalaka la ntundu ka Unyashungu, lambutumama dia ndjukutela, ndu dia nkela lukumu lʼololo lone.

²⁰Ulungi, we ayuyala lumi. We heya nteketa edja ndu lushi layuyala akambu ane, ne dia we hetawi aui ami ane wayushidiyama lʼetena kawo.

²¹Antu wakakungelaka Zekariya, wakambi ne dia ndi akabiya lu etemwelo.

²²Lamʼakandatumbi, ndi kumbeya nteketa la wo. Vo wakeyi vati: Ndi akenyi enelo lu etemwelo. Ndi akateketa la wo lu anya; ndi akatshikala lumi.

²³Lamʼakashili nshi yʼekambelu kandi, ndi akatshu utsha lakandi.

²⁴Lʼokongo a nshi sho, wadendi Elisabete akatshu diemi. Ndi akayashe ngondo tshanu; akati ati:

²⁵Khumadiondjo ambuntshela okone lu nshi yakandamenaka, ne dia minya sonyi kami lʼatei wʼantu.

²⁶Lu ngondo ka samalu, Unyashungu akatumi ondjelo Ngabiriyele lʼusumba omotshi wa Ngalili, lukumbu lawo Nazareta,

²⁷le umuntu lʼemuma, lakambela pami kemotshi ka lu khumbu ka Davidi, lukumbu landi Josefu. Lukumbu la umuntu ako laki Mariya. [6]

²⁸Ondjelo akayi le ndi, akawutela ati: Moyo! we umbukami a ngandji ka mamba, Khumadiondjo eko la ye.

²⁹Keli ndi akakasana efula dia diui so. Ndi akakani yimba dia wuhu wa moyo oso.

³⁰Ku ondjelo akawutela ati: Mariya, tutaki woma, ne dia we ambukama ngandji ka mamba uma le Unyashungu.

³¹Ulungi, we ayutsho diemi, ayuta ona pami, kuwole wati: Jesu.[7]

³²Ndi ayuyala wuki, wayuweta vati: Onʼa Khumʼuiungu. Khumadiondjo Unyashungu ayuwusha kiti Ka diulelu ka Davidi tshendi.

³³Ndi ayulela khumbu ka Jakoba pundju.[8]

³⁴Mariya akambula ondjelo ati: Ukundi ayuyala dikambu so lamʼenaye wati: Dimi lateyana nduku la pami.

³⁵Ondjelo akûkaluya diui ati: Nyuma kʼOlolo ayuya le ye. Wulu wa KhumʼUlungu wayukukhukhume la dedi diandi. Okone vo way ole ona layuyuta vati: LʼEkila, Onʼa Unyashungu.

³⁶Ulungi, ndu umuntu luto la ye, Elisabete, ambutsho diemi lʼusumbi andi. One lakawetaka vati: Ekumba, ngondo kene keli ngondo kandi ka samalu,

³⁷ne dia nduku dikambu diaheyi Unyashungu ntsha.[9]

³⁸Mariya akati ati: Ulungi, ukambi a Khumadiondjo mbemi, diayali le mi uku diui diaye. Ku ondjelo akutshiki.

³⁹Lu nshi sho, Mariya akunela, akatshu esadi lu leke lʼakuna, lʼusumba omotshi wa la Juda.

⁴⁰Ndi akoto lu luudu la Zekariya, akemula Elisabete.

⁴¹Lamʼakuki Elisabete moyo wakawemula Mariya, ona akakadimo lʼutema andi. Ku Elisabete akaludiama la Nyuma kʼOlolo.

⁴²Ndi akahangohango la diui dia wulu ati: We eko la otshoko lʼatei wʼamantu, ndu ona leli lʼutema aye, eko la otshoko!

⁴³Uma lendi uyi dikambu ne dia nyangu Khumemi ndja le mi?

⁴⁴Ne dia lamʼakamuki moyo aye, ona akakadimwi lʼutema la ongenongeno.

⁴⁵Umuntu laketawo diui so eko la otshoko, ne dia akambu wakawawutela uma le Khumadiondjo wayushidiyama.

⁴⁶Ku Mariya akati ati: Utemʼami ambutumbula Khumadiondjo,

⁴⁷Lumu lami lambongenangena le Unyashungu, Ushimbedi ami.

⁴⁸Ne dia ndi akenyi ekitakitelu kʼukambi andi a umuntu. Nyulungi, nonga tshe wayumbetaka vati: Leli la otshoko.

⁴⁹Ne dia one leli la wulu ambuntshela akambu wa mamba. Lukumbu landi leko ekila.

⁵⁰Ketshi kandi keko le nonga la nonga Ya wane watuwukaka woma.

⁵¹Ndi akenya antu wulu wa lunya landi. Ndi akadianganya akanga wʼetaku lu tukanyi tʼetema awo.

⁵²Ndi akakitshakitsha akanga wulu uma lu kiti yawo ya waulelu, Akambiya antu kʼantu.

⁵³Ndi akalutsha wane waki la ndjala diango diʼololo. Ndi akâkaluya akanga wʼengonyi anyanya.

⁵⁴Ndi akakimanyia ukambi andi Isariyele, Ne dia euhwelu ka ketshi kandi,

⁵⁵Uku akandatela watshesu, Le Abarahama[10] ndu le tukanula tandi pundju.[11]

⁵⁶Mariya akadjase la Elisabete uku ngondo shatu, ku ndi akakalula utsha lakandi.

⁵⁷Etena ka Elisabete mbuta kakakuki. Ku ndi akuti ona pami.

⁵⁸Asukanyi andi la wa lu khumbu kandi wakuki vati: Khumadiondjo ambuhamia ketshi kandi le ndi, ku vo wakangenangena la ndi.

⁵⁹Lamʼakakuki lushi lʼenane, vo wakayi dia ndjahemia ona uhekeli.[12] Vo wakayangi mbole lukumbu vati: Zekariya, uku lukumbu la shi.

⁶⁰Nyangu akâkaluya diui ati: Kema; wawole vati: Joani.

⁶¹Vo wakawutela vati: Nduku untu lu khumbu kaye lakawole lukumbu loso.

⁶²Ku vo wakenya shi tulimbitelu lʼanya dia mbeya lukumbu lakona lalangandi mbole.

⁶³Ku ndi akalombe dibaya dia nfunda; akafundi ati: Lukumbu landi Joani. Ku vo tshe wakambi.

⁶⁴Kemʼedja unyo andi wakadiho, lulimi landi lakakoko. Ndi akateketa, akandula Unyashungu.

⁶⁵Woma akandi wane tshe waki lasuki la wo. Aui aso tshe wakadiangana lu leke tshe la akuna wa Judiya.

⁶⁶Antu tshe wakawauki, wakalamaka lʼetema awo. Vo wakati vati: Ukundi ayuyala ona oso na? Lunya la Khumadiondjo laki la ndi.

⁶⁷Zekariya, shi, akaludiama la Nyuma kʼOlolo. Ndi akati akambu wahatayi ati:

⁶⁸Wanduli Khumadiondjo, Unyashungu wa Isariyele; Ne dia ndi akakendela antu, akatshela etshungwelu.

⁶⁹Ndi akatutudjiya ushimbedi a wulu Lu khumbu kʼukambi andi Davidi,

⁷⁰Uku akandati lʼenyo wa amvutshi andi wʼekila edjedja ati:

⁷¹Shu tayushimbamela uma le atunyi asu, Ndu uma lʼanya wa tshe watutuhetshaka.

⁷²Ndi akuki watshesu ketshi, Akuho sheki yandi yʼekila.

⁷³Etshibelu kakandatshibela Abarahama tshesu,

⁷⁴Ati: Lamʼayunyushimbamela uma lʼanya wʼatunyi asu, Nyayontemolaka aha la woma.

⁷⁵Ndu lu akambu wʼekila la lu akambu wʼololo La ntundu kandi nshi yasu tshe.

⁷⁶Ee, ndu we ona, wayuketa vati: Umvutshi a KhumʼUlungu, Ne dia we ayutsho la ntundu ka Khumadiondjo Dia nongosola mbuka yandi.[13]

⁷⁷Dia ndakanya wudja andi dikambu dia panda. Dia mbadimanyia kolo yawo.

⁷⁸Ne dia ketshi ka mamba ka Unyashungu asu, Okone sasi dia pindju diayutokendela uma lʼulungu.

⁷⁹Dia mpetela wane wudjashi lu udjima[14] la lu dididji dia nyoi; Dia nombola ekulu asu lu mbuka ka ki.

⁸⁰Ona akuli, akakikitala lʼutema. Ndi aki lʼesui wa tosenga, edja ndu lushi lakandene le Isariyele.