Read tetala Luka 11 Bible Online

Luka 11 - tetala bible

Luka 11

¹Jesu akalombaka lu dihuli dimotshi. Lamʼakandashidiya, umbeki andi omotshi akawutela ati: Khumadiondjo, utetsha lama nomba, uku aketsha Joani ambeki andi.

²Ku ndi akawatela ati: Lamʼayunyolombaka, kanyutaki nyati: Shesu, hikumbu laye layali ekila. Diulelu diaye diayi.

³Utushaki mbu ya nde yasu ya la lushi la lushi.

⁴Utudimanyia kolo yasu, ne dia ndu shu tatudimanyiaka untu tshe leli la su dikambu. Tutukumiaki lamʼeli ehimba.

⁵Jesu akawambula ati: Akona lʼatei anyu leli la ongenyi, lamʼayundutsho le ndi lʼasa ndeki, ati: Ongenyi, osondja dikenga satu dia ma:

⁶ne dia ongenyi ami omotshi ambuya uma lu lokendo, dimi kema la engo kambusha,

⁷ku one leli lu luudu, ayukaluya diui ati: Takumimbiya, lukuki lambudihama kakiane, anʼami weko la mi lu tangi, dimi haleyi mbeto dia ndjukusha diango?

⁸Lambunyutela nti: Kuyanga ndi heto dia ndjuwusha diango ne dia ndi eko ongenyi andi, keli ne dia limbiya landi, ndi ayeto, ayuwusha diango tshe diahumbandi.

⁹Dimi lambunyutela nti: Nyolombe, ku wayunyusha; nyuyangi, ku nyayena; nyokokole, ku wayunyudihula.

¹⁰Ne dia untu tshe latolombaka, atulungulaka; latuyangaka, atenaka; latokokolaka, wayudihula.

¹¹Untu akona lʼatei anyu leli umbutshi a pami, lamʼayolomba onʼandi la pami lusi, ku ndi mbusha ului lu dihuli dia lusi?

¹²Kana ndi ayolomba ukeli, ku ndi mbusha kutu?

¹³Okone, naka nyu, antu wa kolo, mbeyaka mbisha anʼanyu eshasha wʼololo, Shenyu le lʼulungu huleka mbisha wane wolomba Nyuma kʼOlolo?

¹⁴Jesu akatundjaka odienge a lumu. Lamʼakatumbi odienge, kanga lumi akateketa, ku elui wʼantu wakambi.

¹⁵Keli amotshi wakati vati: La wulu wa Belezebulu, uwandji wʼedienge, mbatundutundjaka edienge.[97]

¹⁶Akina wakuhimbi, wakôlombe djimbitelu yʼuma lʼulungu.[98]

¹⁷Keli ndi akeyi tukanyi tawo, akawatela ati: Diulelu tshe diambatana, diayulana. Khumbu kambatana, kayoko.

¹⁸Naka ndu Satana ambatana, ukundi ayushikikala diulelu diandi? Ne dia nyu nyambuta nyati: La wulu wa Belezebulu mbatundutundjaka edienge.

¹⁹Naka dimi oso atutundjaka edienge la wulu wa Belezebulu, ku ana anyu watetundjaka la wulu akona? Okone vo wayuyala embadi anyu.

²⁰Keli, naka dimi latutundjaka edienge la luhita la Unyashungu, keti diulelu dia Unyashungu diambuyakaka le nyu.

²¹Keli lamʼayulama kanga wulu luudu landi, olotshi diango tshe dia ta, diango diandi diayuyala ki.

²²Keli lamʼayuwukhumela ukina luleki wulu, ndi ayolembia. Ku one lambolembia ayokosola eloto wa ta tshe wakandekamaka, ayukahanya diango diakandakosola.

²³Laha kame la mi, kambuntuna.[99] One lahasanganya la mi diango, kadidianganya.

²⁴Lamʼatumba odienge uma le untu, vo nkindulaka lu ahuli waha la ashi, watayangi mumuya. Lamʼahawakitani, vo wayuta vati: Dimi layukalula lu luudu lami lenʼakamatumbi.

²⁵Lamʼakalulawo, ku vo wambulutana leli pudipudi lolongoswami.

²⁶Ku vo wayutsho, wayutosa edienge ekina esambeli wuleki kolo; wayoto, wayudjase loko. Ku akambu wa untu oso wa lʼokongo, wayuleka wa ntundu kolo.

²⁷Lamʼakataka Jesu akambu aso, umuntu omotshi lʼului wʼantu akawelela ati: Utema wakakuti, ndu awele wakayalome, weko la otshoko!

²⁸Keli ndi akati ati: Mete, wane watuhukamaka diui dia Unyashungu, la watudikitanyiaka, mbeli la otshoko!

²⁹Lamʼakamotaka elui wʼantu la le Jesu, ndi akatatela mbatela ati: Lolonga lone, leko lolonga la kolo! Vo watuyangaka djimbitelu,[100] keli hawuwasha djimbitelu, tshikima djimbitelu ya Jona.

³⁰Uku akayala Jona djimbitelu le asi Niniva,[101] wuhu ako mbayuyala Onʼa untu le antu wa lu lolonga lone.

³¹Khumʼekanga ka umuntu ka la Diku dia Kushi ayemala lʼelumbwelu la antu wa lu lolonga lone, ayuwamia, ne dia ndi akayi uma lu kuma ya kete, dia ndjuka yimba ya Solomona.[102] Nyendi, luleki Solomona, eko lane.

³²Asi Niniva wayemala lushi lʼelumbwelu la wa lu lolonga lone, wayuwamia, ne dia vo wakakadimula etema lamʼakawuki esambishelu ka Jona.[103] Nyendi, luleki Jona, eko lane.

³³Nduku untu latohetshaka tala, ku ndi dikitsha lu dihuli dia ushamu, kana la tshina dia kidunda, keli ndi atudikitshaka lu ekitshelu ka tala,[104] ne dia wane woto wenyi usasi adio.

³⁴Su diaye mbeli tala dia dimba diaye. Lamʼeli su diaye ololo, dimba diaye tshe diayulula too la usasi. Keli lamʼedio kolo, ndu dimba diaye diayulula too la udjima.

³⁵Okone endi kana usasi mbeli lʼutema aye, aha udjima.

³⁶Okone naka dimba diaye tshe diambulula la usasi, diaha la leke la tshududu, dio tshe diayulula la usasi, uku tala mbakohetela la usasi adio wa ngaingai.

³⁷Lamʼakateketaka Jesu, Ufarise omotshi akaweti, dia ndi ntole la ndi ma. Ku ndi akoto, akadjase la mesa.

³⁸Lamʼakenyi Ufarise dikambu so, ndi akambi, ne dia ndi kombotsha anya la ntundu ka nde ma.

³⁹Khumadiondjo akawutela ati: Nyu, Afarise, nyatotshaka lʼandja a dikoho la donga, keli lʼetei anyu, ambulula too la dihotwanelu la akambu wa kolo.

⁴⁰Nyu nyeko dinginya! Undi, one lakadikingi lʼandja awo, ndi kunkinga ndu lʼetei awo?

⁴¹Keli lamʼayunyusha antu diango la ketshi, nyuwasha diango dieli lʼetei. Nyendi, diango tshe diayela pudipudi le nyu.

⁴²Keli fono kayayi le nyu, Afarise! ne dia nyu nyatukimoka etenyi ka dikumi ka nyumba la luhuhu la akatshikatshi tshe,[105] nyatulekanaka sambu kʼololo la ngandji ka Unyashungu. Aki ololo anyu ntsha akambu ane, la aha ntshika akambu wa la ntundu.

⁴³Fono kayayi le nyu, Afarise! ne dia nyu nangaka die dia ntundu lu temwelo, la waemu lu tuka.

⁴⁴Fono kayayi le nyu! ne dia nyu nyeko uku waumbu wahene lu ashu, watokendakendaka antu ladiku diawo, ku vo haweyi.

⁴⁵Umbeyi wʼelembe omotshi akûkaluya diui ati: Umbetsha, lamʼataye diui so, we ambutotenga ndu shu.

⁴⁶Jesu akati ati: Fono kayayi ndu le nyu, embeyi wʼelembe! ne dia nyu nyataheka wutshu weli wulu memba lu aheka wʼantu, keli nyu nyame hanyunanda wetshu ako kuyanga la luhita.

⁴⁷Fono kayayi le nyu! ne dia nyu nyatuhikaka waumbu wʼamvutshi, keli watshenyu mbakadiaki.

⁴⁸Okone nyu nyeko emenyi, nyatetawoka akambu wakatshaka watshenyu, ne dia vo wakadiaki, keli nyu nyatuhikaka waumbu awo.

⁴⁹Diako mbakati ndu yimba ya Unyashungu ati: Dimi layatumela amvutshi la atumami. Vo wayudiaka amotshi, wayuwasuya.

⁵⁰Okone akila tshe wakatshulwama uma lʼetatelu kʼandja, wayali dikambu dia wa lolonga lone,

⁵¹umaka dikila dia Abtle,[106] edja ndu dikila dia Zekariya,[107] lakawadiaki lʼasa ediakelu la etemwelo. Mete kanyutelami nti: Ayuyala dikambu dia wa lu lolonga lone.

⁵²Fono kayayi le nyu, embeyi wʼelembe! ne dia nyu nyakakosola ona sapi kʼakambu wa bewu. Nyu nyame komboto, keli nyu nyakashimbi wane wakayangi mboto.

⁵³Lamʼakatumbi Jesu loko, afundji la Afarise wakatatela mbudinga la wulu, wakalangi mboteketsha akambu efula.

⁵⁴Vo wakotokiya, dia mbosa diui diukukindi mvuta.