Read tetala Luka 15 Bible Online

Luka 15 - tetala bible

Luka 15

¹Elungudi wʼelambu tshe la antu wa kolo wakayasukanaka la le Jesu, dia ndjuka uku atandi.

²Afarise la afundji wakangunanguna vati: Untu one atulungulaka antu wa kolo, atolekaka la wo.[129]

³Jesu akawaukela wela one ati:

⁴Untu akona lʼatei anyu, lamʼendi la ekoko lukama, naka ndi ambudimanya omotshi, ku ndi hatshiki akumi divwa la divwa lʼusui dia ntuyanga one wushishwi, edja ndu lamʼayunduwena?

⁵Lamʼayunduwena, ndi ayuwahe lʼaheka, ayongenangena.

⁶Lamʼayundukuma lakandi, ndi ayeta engenyi andi la asukanyi andi; ayuwatela ati: Nyongenengene la mi, ne dia lambena okoko ami wakashisho.

⁷Dimi lambunyutela nti: Wuhu ako mbayuyala ongenongeno utamanya lʼulungu lu dikambu dia untu a kolo otoi lukadimudi utema, uleki dia antu akumi divwa la divwa wahahumbi nkadimula etema.

⁸Kana umuntu akona, lamʼendi la tenyi dia fesa dikumi, naka ndi ambushisha etenyi kemotshi, ku ndi hahetsha tala, hombe luudu, la hayangi lʼeteti, edja ndu lamʼayundukiena?

⁹Lamʼayundukiena, ndi ayeta engenyi andi la asukanyi andi. Ndi ayuwatela ati: Nyongenengene la mi, ne dia lambena etenyi kakamashisha.

¹⁰Okone dimi lambunyutela nti: Ongenongeno ndjalaka lu ashu wʼandjelo wa Unyashungu lu dikambu dia untu a kolo otoi lambukadimula utema.

¹¹Ku Jesu akati ati: Untu omotshi aki la ana apami ahendi.

¹²Ona kushi akatela shi ati: Papa, umbisha etenyi ka diango diayuyala le mi. Ku ndi akâkahanya diango diandi.

¹³Kemʼedja, ona kushi akasanganya diango diandi tshe, akatshu lu lokendo lu kete yʼetali. Ndi akatuhandjula diango diandi lu akambu wa lutshitu, wakandatshaka.

¹⁴Lamʼakandamani diango diandi tshe, ndjala ka kasha ka wulu kakayala lu kete sho. Ndi akatatela mpumba diango.

¹⁵Ku ndi akatshu, akatekesanela la untu omotshi la lu kete yako. Ku untu ako akutumi dia ntuleshaka sumbu lʼusui.

¹⁶Ku ndi akalangi ndutsha dikundju diandi la pusu yakalekaka sumbu. Nduku untu lakawusha ema a nde.

¹⁷Keli lamʼakandatshuti, ndi akati ati: Ndi ma efula dieli la ekambi wa papa, ndu dikina ladiku, ku dimʼone avo ndjala lindu li!

¹⁸Dimi layunela, layutsho le papa; layutuwutela nti: Papa, dimi lakatshela ulungu kolo, lakatshi kolo ndu lu ashu aye.

¹⁹Ololo ami hakuki, dia vo mbetami ntu vati: Onʼaye; umbete uku ukambi aye omotshi.

²⁰Ku ndi akunela, akayi le shi. Keli lamʼakindi tshalula, shi akawenyi, akangasana la ketshi, akalawo, akatukhumbatela lu kingu, akanonana la ndi.

²¹Ona akawutela ati: Papa, dimi lakatshela ulungu kolo, ndu lakatshi kolo lu ashu aye. Ololo ami hakuki, dia vo mbetami ntu vati: Onʼaye.

²²Keli shi akatela ekambi andi ati: Nyela ukutu wuleki ololo, nyolotsha, nyuwudji lohete lu lunya landi, la sabata lʼekulu andi.

²³Nyela osongo wa ngombe wununyi, nyudiaki, keli tuli, tongenengene.

²⁴Ne dia onʼami one akavu, ku ambuyala la lumu ntu; ndi akashisho, ku ambenama. Ku vo wakatatela ngenangena.

²⁵Lʼetena keso, ona lʼenundu aki lʼekambo. Ku lamʼakandayayakaka, lamʼakandasukana lasuki la luudu, ndi akuki wahuma la wano wenye.

²⁶Ku ndi aketi ukambi omotshi, akawumbula akambu wakayala.

²⁷Ku ndi akawutela ati: Onanyo kambuya. Sho ambudiakela osongo wa ngombe wununyi, ne dia ndi ambulungula la wulu ndu la ki.

²⁸Keli ndi akumala kele, kunanga mboto lu luudu. Ku shi akatumbi, akayosengasenga.

²⁹Keli ndi akâkaluya shi diui ati: Enda, deku efula ne diamumukukambela ulimu, dimi kundjaka elembe aye nduku lushi. Keli we atambisha kuyanga yana ya mbudi nduku lushi, dia dimi ngenangena lʼengenyi ami.

³⁰Keli lamʼuyi onʼaye one, lakali diango diaye la amantu a luseka, we ambudiakela osongo a ngombe wununyi!

³¹Ndi akawutela ati: Onʼami, we ndjalaka la mi nshi tshe. Kene tshe keli kami, kaye keto.

³²Keli aki ololo mbola la ngenangena, ne dia onanyo one akavu, ku ambuyala la lumu; akashisho, ku ambenama.