Read tetala Luka 16 Bible Online

Luka 16 - tetala bible

Luka 16

¹Jesu akatela ambeki andi ntu ati: Kanga ongonyi omotshi akiko, laki la ulami a diango. Wakufundi le ndi vati: Ndi akalanya diango diaye tshe.

²Ku ndi akaweti, akawumbida ati: Dikambu diakona diukami so? Umbisha esanganyelu kʼulimu aye, ne dia we heyi ntshikala lu ulimu ntu.

³Ku ulami akayambula lʼutema andi ati: Kayumutsha na, lamʼambuminya uwandji ami lʼulimu wʼulami? Dimi laha la wulu wa nkamba, keli dimi la sonyi ka nomba diango olombalomba.

⁴Dimi lakasanguya dikambu diayumutsha, dia vo nungulami lu mvudu yawo lamʼayuwuminya lʼulimu wa nama diango.

⁵Ku ndi aketi akanga wʼabasa wa uwandji andi otoi la otoi. Ndi akambula la ntundu ati: Efula kakona kukulamiye le uwandji ami?

⁶Ndi akawutela ati: Tediko tʼiso lukama. Ku ukambi uku akawutela ati: Osa mukanda wʼesundjelu, udjase esadi, ufundi akumi atanu.

⁷Ku ndi akambula ukina ati: Efula kakona ukulamiye? Ndi akawutela ati: Tediko lukama tʼepunga. Ndi akawutela ati: Osa mukanda aye wʼesundjelu, ufundi tediko akumi enanei.

⁸Uwandji akandula ulami a kolo, ne dia ndi akatshi akambu wa yimba; ne dia ana wʼetena kene, wambuleka ana wa yanyi yimba lu lolonga lawo.

⁹Dimi lambunyutela nti: Nyuyandeli engenyi uma lu ukundji wʼakambu wa kolo. Okone lamʼayushila ukundji ako, vo wayunyulungula lu mvudu yawo ya pundju.

¹⁰One leli la kolamelu lu diango diuleki tshitshe, eko la kolamelu ndu lu diango diuleki fula. One leli la lukesu lu diango diuleki tshitshe, eko la lukesu ndu lu diango diuleki efula.

¹¹Ku naka nyu tanyaki la kolamelu lʼukundji wa kolo, akona ayunyukimiya ekundji wa mete?

¹²Naka tanyaki la kolamelu lu diango dia untu ukina, akona ayunyusha dieli dianyu?

¹³Nduku untu leya nkambela ewandji ehendi ulimu: ne dia ndi ayuhetsha omatshi, ayulanga ukina. Kuku kana ndi ayekama omotshi, ayonyola ukina. Nyu hanyeyi nkambela Unyashungu la ukundii ulimu.[130]

¹⁴Afarise, waki anangi wa falanga, wakuki akambu aso tshe, wakosoke.

¹⁵Jesu akawatela ati: Nyu nyeli antu wayayindja lu ashu wʼantu, keli Unyashungu mbeyaka etema anyu. Diango diambolemiama lʼatei wʼantu diambendjwama lu ashu wa Unyashungu.

¹⁶Elembe la aui wʼamvutshi wakiko edja ndu le Joani. Uma lu etena keso, watusambishaka lukumu lʼololo la diulelu dia Unyashungu, untu lʼuntu atuyaotshiyaka loko la khudu.[131]

¹⁷Keli eshishwelu ka ulungu la kete, ambuleka eshishwelu ka shidishidi yʼelembe dikambu dia tshitshe.[132]

¹⁸Untu tshe laseka wadendi, latshuka ukina, ambunana. One latshuka umuntu lukimwi umendi, ambunana.[133]

¹⁹Kanga ongonyi omotshi akalotaka ahondo wa linene wa tilili wʼamena. Ndi akangenangenaka la lushi la lushi la ufunu.

²⁰Olombi a diango omotshi lukumbu landi Lazaro akakitshamaka la suku diandi. Ndi aki la puta dimba tshe.

²¹Ndi akalangaka ndjalesha la fusa yakakokaka lu mesa wa kanga ongonyi; ndu fo yakalombolaka puta yandi.

²²Lʼokongo diku olombi akavu, andjelo wakawembe utsha lu tulu ka Abarahama. Ndu kanga ongonyi akavu, ku wakukhunde.

²³Ndi aki la fono lu Luwinga la Dja. Ndi akedia ashu, akenyi Abarahama tshalula la Lazaro lu tulu kandi.

²⁴Ku ndi akawelela wulu ati: Papa Abarahama, umbuki ketshi. Untumeli Lazaro, ndi adji sodi ka luhita landi lʼashi, ambodia lulimi; ne dia dimi la fono lu lumbi la dja.

²⁵Keli Abarahama akati ati: Onʼami, uho wati: We akalungulaka diango diʼololo lu nshi yakiye la lumu, ku Lazaro akalungulaka diango dia kolo. Keli kakiane, ndi ambusambema lindu, ku we ambuyala la fono.

²⁶Dikambu dikina, luwinga la wuki leko lʼasasu la nyu. Wane walanga mbeta uma lindu utsha le nyu, haweyi mbeta. La nduku untu leya mbeta uma leko uya le su.

²⁷Ku ndi akati ati: Papa, dimi lambukosengasenga nti: Utumi lu luudu la papa;

²⁸ne dia dimi la analingu atanu; ndi atuwaewuli, watukukuma ndu vo lu dihuli ne dia fono.

²⁹Keli Abarahama akati ati: Vo weko la Mose la amvutshi; vo wawaukeli.

³⁰Ndi akati ati: Kema, papa Abarahama. Keli naka untu omotshi lakavu ayutsho le wo, vo wayukadimula etema.

³¹Ndi akawutela ati: Naka vo hawukela Mose la amvutshi, keti vo hawetawo kuyanga untu lulwi uma lu nyoi.