Read tetala Luka 18 Bible Online

Luka 18 - tetala bible

Luka 18

¹Jesu akawaukela wela dia vo nombaka nshi tshe, aha mpeko.

²Ndi akati ati: Lʼusumba omotshi kaki umbadi, laki kumbukaka Unyashungu woma, ndu laki konemiaka untu.

³Ndu wadi aki udu aki lʼusumba ako. Ndi akayakaka le ndi, akataka ati: Onsombwele le utunyi ami.

⁴Nshi motshi, ndi kunanga. Keli lʼokongo diku, ndi akati lʼutema andi ati: Kuyanga dimi haluki Unyashungu woma, ndu halalemia untu,

⁵ku ne dia wadi aki udu one ambomenya pa, dimi layosombweya. Ndi atukonembia la olendolendo andi.

⁶Khumadiondjo akati ati: Nyulungi, okone wata umbadi a kolo,

⁷Ku Unyashungu hasombweya esonami andi watulelelaka ndu la yanyi ndu lʼutshu, ndi atakungiyaka edja uka?

⁸Dimi lambunyutela nti: Ndi ayasombweya esadi. Keli lamʼayuya Onʼa untu, ndi ayutana mbetawo la kete?

⁹Ndu wela one mbakandukela amotshi, wakayalungamelaka vati: Ololo mbesu, wakanyolaka akina.

¹⁰Apami ahendi wakoto lu etemwelo dia ntolomba. Omotshi aki Ufarise, ukina aki ulungudi wʼelambu.

¹¹Ufarise akemala, akalombe ndame okone ati: Unyashungu, lambukuka lusaka ne dia dimi kema uku antu akina, apotwanyi, akanga a lukesu, amunanyi, kana uku ulungudi wʼelambu one.

¹²Dimi latukilaka mbu ya nde tena pendi lu lubingu la lubingu. Dimi latukimoka etenyi ka dikumi uma lu diango tshe diatumukundjaka.

¹³Keli ulungudi wʼelambu akemala tshalula, kunanga mbedia ashu andi, keli akayakomola lu tulu; akati ati: Unyashungu, umbuki ketshi, dimi untu a kolo!

¹⁴Dimi lambunyutela nti: Untu oso akatshu lakandi uyindjami ndeka ukina; ne dia untu tshe layambiya, ayukitshakitshama; keli one layakitshakitsha, ayumbiyama.[143]

¹⁵Vo wakayi la tokendakenda le Jesu, dia ndi mbananda. Keli lamʼakenyi ambeki dikambu diako, vo wakahangwela.

¹⁶Keli Jesu akawaeti; akati ati: Nyete tokendakenda wayi le mi, tanyasikeki, ne dia diulelu dia lʼulungu dieko diʼantu uku vo.

¹⁷Mete kanyutelami nti: Untu tshe lahalungula diulelu dia Unyashungu uku kiendakenda, keti ndi hoto loko.

¹⁸Umbuledi omotshi akambula Jesu ati: Umbetsha wʼololo, kayumutsha na, dia nkita lumu la pundju?

¹⁹Jesu akûkaluya diui ati: Okoko wana wambetaye wati: Ololo? Nduku leli ololo, paka Unyashungu ndame.

²⁰We mbeyaka elembe, ati: Tunanaki,[144] Tudiakaki.[145] Tuvaki.[146] Tumamanyiaki.[147] Olemia sho la nyo.[148]

²¹Ndi akati ati: Akambu aso tshe mbatumutshaka umaka nshi yami ya dikenda.

²²Keli lamʼakuki Jesu aui aso, ndi akawutela ati: Dikambu otoi mbambutshikala! utusundja dieli la ye tshe, utudikaheli akanga a weula, ku we ayuyala la diango lʼulungu. Kuyi, kundjeli.

²³Keli lamʼakanduki aui aso, ndi akanyangi efula, ne dia ndi aki la ongonyi efula.

²⁴Jesu akawendi; akati ati: Eko dikambu dia wuki, dia akanga wʼengonyi mboto lu diulelu dia Unyashungu!

²⁵Eotwelo ka kamelo lʼushu wa tedi, kambuleka eotwelo ka kanga ongonyi lu diulelu dia Unyashungu dikambu dia tshitshe.

²⁶Wane wakuki aui ako, wakati vati: Ku akona ayeya nshimbamela?

²⁷Keli ndi akawatela ati: Akambu weli wulu le antu, kema wulu le Unyashungu.

²⁸Ku Petero akati ati: Enda, shu takatshiki tshe, tambukuyela.

²⁹Ku ndi akawatela ati: Mete kanyutelami nti: Nduku untu lambutshika luudu, kana wadi, kana anangu, kana ambutshi, kana ana ne dia diulelu dia Unyashungu,

³⁰ahulungula diango diuleki efula lʼetena kene, ku lʼetena kayayi, ndi ayulungula lumu la pundju.

³¹Jesu akose ambeki dikumi la ahendi, akawatela ati: Nyulungi, shu ane tutatshu utsha la Jerusalema, akambu tshe wakafundi amvutshi, wayushidiyama le Onʼa untu.

³²Ne dia ndi ayukimwama le asi wedja, ayosokama, ayotengama, ayutamela soi.

³³Vo wayokomola, wayudiaka. Lushi la satu, ndi ayulo.

³⁴Vo kunshihudia nduku dikambu lʼatei wʼakambu aso. Aui ako wakawashamela; vo kumbeya akambu wakandati.

³⁵Jesu akasukana lasuki la Jeriko. Kanga tshungu omotshi akadjashi lʼumamu a mbuka, alomba diango.

³⁶Lamʼakanduki ului wʼantu wateti, ndi akambula dikambu diambutshama.

³⁷Vo wakawutela vati: Jesu yʼusi Nazareta kateti.

³⁸Ndi akawelela wulu ati: Jesu, Kanula ya Davidi, umbuki ketshi!

³⁹Ku waku waketi la ntundu, wakuhangwela vati: Olembohali! Keli ndi akahangohango wulu ati: Kanula ya Davidi, umbuki ketshi!

⁴⁰Ku Jesu akemala, akati dia vo mbela le ndi. Lamʼakandasukana, ndi akawumbula ati:

⁴¹Alangaye dimi nkutshela na? Ndi akati ati: Khumadiondio, nsena mbalangami.

⁴²Jesu akawutela ati: Osene; mbetawo kaye kambukokonoya.

⁴³Kemʼedja, ndi akasene, akuyeli, atatumbula Unyashungu. Ku antu tshe, lamʼakawenyi dikambu diako, wakandula Unyashungu.