Read tetala Luka 3 Bible Online

Luka 3 - tetala bible

Luka 3

¹Lʼeleku ka dikumi lʼatanu ka diulelu dia Tiberiyo Kayisa, lamʼaki Potiyo Pilata umbuledi wa Judiya la Herode umbuledi wa Ngalili, la Filipo onangu umbuledi wa beke dia Ituriya la Tarakoniti, la lamʼaki Lusaniya umbuledi wa Abilene,

²lu nshi yaki Anasi la Kayifasi elombedi wa ladiku, diui dia Unyashungu diakayi le Joani, onʼa Zekariya, lʼusui.

³Ndi akayi lu beke tshe lasuki la Jorodana, atasambisha dikambu dia batiza kʼekadimwelu kʼetema, dia kolo yawo yadimanyemi,

⁴uku ufundami lu buku diʼaui wa umvutshi Isaya ati: Diui dia untu lahangohango lʼusui ati: Nyolongosole mbuka ka Khumadiondjo; Nyusimbuli esese andi.

⁵Ekidi tshe wayutediama; Akuna tshe la ekungu tshe wayukitshakitshama; Diango dia wengenge diayuyala esimboki; Ndu nbuka ya tufukutufuku yayukitanela;

⁶Ku antu tshe wayena panda ka Unyashungu.[23]

⁷Ku Joani akatela elui wʼantu wakatshu dia ntubatizama le ndi ati: Nyu ana wʼakhuha,[24] akanyuhula dia ndawo kele kayayi?

⁸Okone nyoto elua uku ekadimwelu kʼetema anyu; tanyutatelaki mvuta nyati: Shu la tshesu Abarahama.[25] Dimi lambunyutela nti: Unyashungu mbeyaka mbulwela Abarahama tukanula tandi uma lu ave ane.

⁹Kakiane kenge yambetama la tshina dia etamba. Ku utamba tshe wahato elua wʼololo, ayokotama, ayukadjema lu dja.[26]

¹⁰Antu wakawumbula vati: Ku ukundi ahumbasu ntsha?

¹¹Ndi akâkaluya diui ati: One leli la akoti ahendi, akahani la one laha la koti. One leli la mbu ya nde, atshi pupu.

¹²Ndu elungudi wʼelambu wakayi dia ndjubatizama,[27] wakambula vati: Umbetsha, ahumbasu ntsha?

¹³Ndi akawatela ati: Tanyosaki ulambu ladiku dia yediko yakawanyutela.

¹⁴Ndu alimbi wakawumbula vati: Ndu shu, kahumbasu ntsha na? Ndi akawatela ati: Tanyosaki engo uma le untu la khudu. Tanyumamanyiaki untu. Nyongenengene la afutu anyu.

¹⁵Lamʼaki wudja la elungamelu, ndu lamʼakakanaka antu tshe lʼetema awo dikambu dia Joani vati: Kana ndi keli Kristu,

¹⁶Joani akûkaluya diui vo tshe ati: Mete, dimi lambunyubatiza la ashi, keli one layayi ambundeka wulu. Dimi kema ololo wukukimi nkelekula okodi a sabata yandi. Ndi ayunyubatiza la Nyuma kʼOlolo la dja.

¹⁷Ledi leko lu lunya landi. Ndi ayedia efufwelu kandi, ayusanganya epunga lu dipenge. Keli ndi ayutshumba puhudi lu dja yahadimala.

¹⁸Ndu alaku akina efula mbakasambishaka Joani antu lukumu lʼololo.

¹⁹Keli khumʼekanga Herode, lakandahangwela ne dia Herodiyasi, wadi onangu, la dia akambu wa kolo tshe wakatshaka Herode,

²⁰akahe ndu dikambu ne ladiku dia akambu andi tshe, akadji Joani lu lukanu.[28]

²¹Lamʼakabatizama antu tshe, kakabatizama ndu Jesu. Lamʼakandalombaka, ulungu akadiho.

²²Ku Nyuma kʼOlolo akuhulwela lʼutundu uku fudu ka inga. Diui diakayi uma lʼulungu ati: Onʼami la ngandji keye! We ambongenyangenya.[29]

²³Lamʼakatatela Jesu ndame nsambisha, ndi aki la deku akumi asatu, ndi aki onʼa (uku akukanaka antu) Josefu, onʼa Heli,

²⁴onʼa Matata, onʼa Lewi, onʼa Meleki, onʼa Janai, onʼa Josefu,

²⁵onʼa Matatiya, onʼa Amose, onʼa Nahuma, onʼa Eseli, onʼa Nangai.

²⁶Onʼa Mata, onʼa Matatia, onʼa Semeyina, onʼa Joseka, onʼa Joda,

²⁷onʼa Joanana, onʼa Resa, onʼa Zerubabele, onʼa Sheyalatiyele, onʼa Neri,

²⁸onʼa Meleki, onʼa Adi, onʼa Kosama, onʼa Elemadama, onʼa Ere,

²⁹onʼa Jesu, onʼa Eliyezere, onʼa Jorima, onʼa Matata, onʼa Lewi,

³⁰onʼa Simeyona, onʼa Judasi, onʼa Josefu, onʼa Jonama, onʼa Eliyakima,

³¹onʼa Melea, onʼa Mena, onʼa Matata, onʼa Natana, onʼa Davidi,

³²onʼa Jese, onʼa Obede, onʼa Boaza, onʼa Saia, onʼa Nashona,

³³onʼa Aminadaba, onʼa Adimina, onʼa Arani, onʼa Hezerona, onʼa Pereze, onʼa Juda,

³⁴onʼa Jakoba, onʼa Isaka, onʼa Abarahama, onʼa Tera, onʼa Nahora,

³⁵onʼa Serunge, onʼa Reu, onʼa Pelenge, onʼa Ebere, onʼa Shela,

³⁶onʼa Kayinana, onʼa Arapakeshade, onʼa Sheme, onʼa Noa, onʼa Lameka,

³⁷onʼa Metusela, onʼa Enoke, onʼa Jareda, onʼa Mahalalele, onʼa Kayinana,

³⁸onʼa Enoshe, onʼa Sete, onʼa Adama, onʼa Unyashungu.