Read tetala Luka 6 Bible Online

Luka 6 - tetala bible

Luka 6

¹Lushi lomotshi lʼekila, Jesu akatetaka lu dikambo diʼasami. Ambeki andi wakani nanula, wakayishishi lʼanya, wakali.[46]

²Keli Afarise amotshi wakati vati: Ukundi atshanyu dikambu dieli ekila lushi lʼekila?

³Jesu akâkaluya diui ati: Nyu nyatali dikambu diakatshi Davidi, lamʼakindi la ndjala, ndi la wane waki la ndi?

⁴Ndi akoto lu luudu la Unyashungu, akose ma dia Eyalelu, akali, akadish ndu wane waki la ndi. Dio diaki ekila dia untu kʼuntu nde, paka elombedi etu mbakadilekaka.[47] [48]

⁵Ku ndi akawatela ati: Onʼa untu eko uwandji a lushi lʼekila.

⁶Lushi lukina lʼekila, Jesu akoto lu etemwelo, akawaetsha. Untu omotshi, kanga lunya la pami lakumi, aki leko.

⁷Afundji la Afarise wakotokiya vati: Kana ndi ayokonoya antu lushi lʼekila, ne dia vo mbosongwela.

⁸Keli ndi akeyi tukanyi tawo. Ndi akatela kanga lunya lakumi ati: Eto, emala kʼatei. Ku ndi aketo, akemala.

⁹Jesu akawatela ati: Dimi lambunyumbula nti: Eko ekila dia ntsha ololo lushi lʼekila? Mamela lumu lʼuntu, kana ludiaka?

¹⁰Ku ndi akewewa, awaenda vo tshe, akawutela ati: Usimbuli lunya. Ndi akalusimbula, ku lunya landi lakakono.

¹¹Keli vo wakadanganela la kele, wakatanela uku ayuwutshela Jesu.

¹²Lu nshi sho, Jesu akatshu lu dikuna dia ntolomba. Ndi akakolamela nomba Unyashungu utshu tshe.

¹³Lamʼakahutounya, ndi aketi ambeki andi. Ndi akasonola uma lʼatei awo dikumi la ahendi, akawaole ati: Atumami.

¹⁴Simona, lakandole ntu ati: Petero, la Andere, onangu; Jakoba la Joani; Filipo la Baratolomayo;

¹⁵Mateu la Tomasi; Jakoba, onʼa Alafayo, la Simona, lakawetaka vati: Zelote;

¹⁶Judasi, onʼa Jakoba, la Judasi Isakariyote, lakayala ufungi.

¹⁷Ku ndi akahulo la wo, akemala lu dihuli dia bamubamu, ndi la ului a wuki wʼambeki andi, ndu antu efula uma la Judiya tshe la uma la Jerusalema, la uma lu leke la Tura la Sidona lʼumamu wʼashi a waki, wakayi dia ndjuka aui andi la dia ndjokono uma lu hemo yawo.

¹⁸Wane tshe wakasuwi la edienge, wakakono.

¹⁹Antu tshe wakayangi mbunanda, ne dia wulu wakatumbi uma le ndi, ku ndi akakonoya vo tshe.

²⁰Ku Jesu akedia ashu le ambeki andi, akati ati: Nyu akanga a weula nyeli la otshoko, ne dia diulelu dia Unyashungu dieko dianyu.

²¹Nyu wane weli la ndjala kakiane, nyeko la otshoko, ne dia nyu nyayulutshama. Nyu wane walela kakiane, nyeko la otshoko, ne dia nyu nyayola.

²²Lamʼayunyuhetsha antu, lamʼayuwunyunya uma lʼului awo, lamʼayuwunyuhangwela, ndu lamʼayuwutundja kumbu yanyu vati: Kolo, lu dikambu dia Onʼa untu, nyeko la otshoko.[49]

²³Nyongenengene lushi lako, nyulimbolimbo la ongenongeno, ne dia difutu dianyu dieko wuki lʼulungu. Watshewo wakatshela amvutshi wuhu ako.[50]

²⁴Keli fono kayayi le nyu, nyu engonyi! ne dia nyu nyambulungulaka esambelu kanyu.

²⁵Fono kayayi le nyu, nyu wane wambuluta kakiane, ne dia nyu nyayuka ndjala. Fono kayayi le nyu, nyu wane wola kakiane, ne dia nyu nyayuyala okei, nyayulela.

²⁶Fono kayayi le nyu, lamʼayunyandula antu tshe; ne dia watshewo wakandula amvutshi wa kashi wuhu ako.

²⁷Keli dimi lambunyutela, nyu wane wuka, nti: Nyulangi atunyi anyu, nyutsheli wane wanyuhetsha ololo.

²⁸Nyotshokole wane watunyudjaka mananu; nyolombeli wane watunyotengaka.

²⁹Naka untu ayukokomola lu tama dimotshi, kuwingisweli ndu dikina. Naka untu ayukokosola koti, tosekaki mbusha ndu ukutu aye.

³⁰Usha untu tshe lakolomba. Lamʼakokosola untu diango diaye, tudilombaki ntu.

³¹Nyutsheli antu uku alanganyu vo nyutshela.[51]

³²Naka nyu nyatukaka wane watunyukaka ngandji ngandji, nyu la lusaka lakona? Ndu antu wa kolo watutshaka wuhu ako.

³³Naka nyu nyatutshelaka wane watunyutshelaka ololo ololo, nyu la lusaka lakona? Ndu antu wa kolo watutshaka wuhu ako.

³⁴Naka nyu nyatosondjaka wane watunyulungamelaka nyati: Tayulungula, nyu la lusaka lakona? Ndu antu wa kolo watosondjaka antu wa kolo diango, ne dia ndjulungula uku akawakimo.

³⁵Nyuki atunyi anyu ngandji, nyatsheli ololo, nyasondja diango, aha la elungamelu ka vo nyukaluya, okone difutu dianyu diayuyala efula, ndu nyayuyala ana wa KhumʼUlungu; ne dia ndi eko la memakana le wane wahuki lusaka ndu le antu wa kolo.

³⁶Nyuyali la ketshi uku eli Shenyu la ketshi.

³⁷Tanyalaki akambu wʼantu, watukalaka akambu anvu; tanyamiaki antu, watukunyamia. Nyudimanyiya antu kolo, ku wayunyudimanyia.

³⁸Nyusha antu, ku wayunyusha. Wayunyusha yediko yʼololo, yokokomadi, yushikishami, yatshulotshulo lu tulu yanyu; ne dia wayunyedikela la yediko yakanyawaedikela.

³⁹Ku Jesu akawaukela wela ati: Kanga tshungu mbeyaka nombola kanga tshungu uka? Vo ahendi hawoko lu difuku?[52]

⁴⁰Umbeki haleki umbetsha andi.[53] Keli untu tshe layumana mbeka, ayuyala uku umbetsha andi.

⁴¹Ukundi wendaye fumvufumvu yeli lu su dia unyaye, keli hakani dia wima utamba weli lu su diaye?

⁴²Ukundi weyaye mvutela unyaye wati: Unyami, ela nkutundja fumvufumvu yeli lu su diaye, keli weme hendi wima wʼutamba weli lu su diaye? We kanga lukesu, utanyisha wima utamba lu su diaye, ku kuyenyi ololo dia ntundja fumvufumvu yeli lu su dia unyaye.

⁴³Nduku utamba wʼololo atotokaka elua a kolo; ndu nduku utamba a kolo atotokaka elua wʼololo.

⁴⁴Utamba tshe wambeyama uma lʼelua awo.[54] Nduku untu latumbaka elua wa fingu uma lu atende, kuyanga nkohola sandji diʼelua wʼekodi lu dikumbu diʼatende.

⁴⁵Untu ololo atutundjaka kene keli ololo uma lu eumbelu kʼololo kʼuma lʼutema andi. Untu a kolo atutundjaka kene keli kolo uma lu eumbelu kandi ka kolo; ne dia unyo andi atoteketaka akambu wa lʼutema.[55]

⁴⁶Ukundi atunyumbetaka nyati: Khumadiondjo, Khumadiondjo, keli hanyutshi akambu watumutaka?

⁴⁷Untu tshe latuyakaka le mi, latukaka aui ami, latuwatshaka, layunyenya one leli uku ndi.

⁴⁸Ndi eko uku untu lakahiki luudu, lakatshimi etali, lakalonge tshina dia luudu ladiku dia dive. Lamʼakayi elula, ashi wakakomama lu luudu lako, kumbeya lunyinginya, ne dia lo lakahikama ololo.

⁴⁹Keli untu latukaka, ku hatshi, eko uku untu lakahiki luudu ladiku dia kete, aha ntshima. Ashi wakakomama lu luudu lako, kemʼedja, lo lakanyuko. Ehandjwelu ka luudu lako kaki wuki.