Read tetala Luka 8 Bible Online

Luka 8 - tetala bible

Luka 8

¹Lʼokongo diku, Jesu akatakindulaka lʼesumba ndu lu ngelu, atasambisha lukumu lʼololo la diulelu dia Unyashungu, ndu ambeki dikumi la ahendi waki la ndi.

²Ndu amantu amotshi wakakono uma lʼedienge la uma lu hemo yawo: Mariya, lakawetaka vati: Wʼusi Mangadala, laki la edienge esambeli, wakatumbi uma le ndi;

³ndu Joana, wadi a Kuza, ulama diango dia Herode; ndu Suzana, la akina efula, wakalimanyiaka la diango diawo.[61]

⁴Lamʼakamote ului a wuki, antu wakayi le Jesu uma lʼusumba la usumba. Ku Jesu akuki wela ati:

⁵Lmbuki a wuhu akatshu dia ntuka wuhu andi. Lamʼakandatukaka, emotshi wakako lʼumamu a mbuka. Antu wakawekamela lʼekulu, fudu ya lʼulungu yakekomola.

⁶Wehu ekina wakako ladiku dia dive; lamʼakawatumbi, wakalengela, ne dia tawaki la ashi.

⁷Wehu ekina wakako lʼatei wʼatende. Atende wakuli la wo, waketshidia.

⁸Wehu ekina wakako lu kete yʼololo, wakuli, wakadji tongo lukama lukama. Lamʼakandati akambu aso, ndi akahangohango ati: Leli la atui a mbuka, uki.

⁹Ambeki wa Jesu wakawumbula vati: Na kitshimudi ka wela one?

¹⁰Ndi akawatela ati: Wakanyusha dia mbeya akambu wushami lu diulelu dia Unyashungu, keli akina la wela etu. Okone lamʼayuwenda, ku hawenyi. Lamʼayuwuka, ku hawumani fundu.[62]

¹¹Kitshimudi ya wela one eli okone: Wuhu eli diui dia Unyashungu.

¹²Wuhu wa lʼumamu a mbuka, eli wane watukaka diui, ku uhimbanyi atuyakaka, atakosolaka diui uma lʼetema awo, dia vo tawetawoki, tawushimbamelaki.

¹³Wuhu wa lu dive, eli wane watulungulaka diui la ongenongeno lamʼadiukawo. Keli vo kema la ediu, watetawoka etenyi, ku lu lushi lʼehimba, watetolaka.

¹⁴Wuhu wakako lʼatei wʼatende, eli antu watukaka diui, ku lamʼatshowo lu mbuka yawo, watutshidiamaka la ndjakanela, la ukundji, la ongenongeno wa lumu lone, hawuluwanya nduku ulua.

¹⁵Wuhu wa lu kete yʼololo, eli wane weli la etema wa mete ndu wʼololo. Lamʼukawo diui, vo watudikimelaka wulu, watotoka elua la memakana.

¹⁶Nduku untu latohetshaka tala, ku ndi dikukhume lukinga, kana dikitsha lʼukilingu a tangi. Keli ndi atudikitshaka ladiku diʼekitshelu tala,[63] dia wane woto wenyi usasi.

¹⁷Ne dia nduku kene kambushama, kahashwama; nduku kene keli lu usheshe, kaheyama ndu kahenama.[64]

¹⁸Okone nyewo uku ukanyu, ne dia one leli la, wayuwusha dikina. Keli laha la, wayokosola ndu kene kakanandi ati: Dimi la to.[65]

¹⁹Nyangu Jesu la anangu wakayi le Jesu. Keli vo kumoeya nkuma le ndi, ne dia ului wʼantu.

²⁰Vo wakawutela vati: Nyo la ananyo wambemala lʼandja, vo nangaka nkena.

²¹Keli ndi akûkaluya diui ati: Wane watuhukamaka diui die Unyashungu, watuditshaka, mbeli nyomi la analingu.

²²Lushi lomotshi, Jesu akoto lu watu ndi la ambeki andi. Ku ndi akawatela ati: Tuteho la wedi wʼuduwa, ku vo wakatshu.

²³Lamʼakawatatshokaka, ndi akalali djo. Ngimbi ka wulu kakayi lʼuduwa; watu wakayangi ndula la ashi. Vo waki lasʼeku la nyoi.

²⁴Vo wakayi le ndi, wakawemula, wakati vati: Uwandji, Uwandji, tambuvo. Ndi akemo, akahangwela ngimbi la asukhu, vo wakalembohala, ku akayala yoo.

²⁵Ku ndi akawambula ati: Mbetawo kanyu, lendʼeto na? Vo wakuki wema, wakambi; wakambwana vati: Akona une latela ndu ngimbi ndu ashi, ku vo ukitanyia diui diandi?

²⁶Vo wakakumi lu kete ya asi Ngadara yelanedi la Ngalili.

²⁷Lamʼakateho Jesu la wedi, untu omotshi uma lʼusumba akahumana la ndi; ndi aki la edienge lʼutema, aki edja, kondota dihondo. Ndi kumbidjaseka lu luudu, paka lu waumbu.

²⁸Lamʼakandenyi Jesu, ndi akahangohango, akukhusamela. Ndi akawelela wulu ati: We, Onʼa Unyashungu KhumʼUlungu, kasami la ye na? Dimi lambukosengasenga nti: Tunsuyaki.

²⁹Ndi akatela odienge ati: Utumbi uma le untu one. (Ne dia vo wakawundaka tena efula. Ndi aki la alami, wakukelekaka la molola la kata. Lamʼakandahimbutaka diango so tshe, odienge akusukuyaka lʼesui wa tosenga).

³⁰Jesu akawumbula ati: Lukumbu laye na? Ndi akati ati: “Ului a wuki;” ne dia edienge efula wakoto lʼutema andi.

³¹Ku wakosengasenga vati: Tututelaki dia shu ntsho lu ohongo waha la ekumelu.

³²Limba la wuki la sumbu laki leko, lakalekaka lu dikuna. Vo wakasengasenga vati: Etawo dia shu ndjoto. Ndi aketawo.

³³Ku edienge wakatumbi uma le untu oso, wakoto sumbu. Limba lako lakakhunguso lʼuhulula, lakatambela lʼuduwa, lakavu.

³⁴Lamʼakenyi wane wakayileshaka dikambu so, vo wakalawo, wakatudisanya lu esumba ndu lu tusamba.

³⁵Vo wakatshu dia ntenda dikambu diakatumbi. Vo wakayi le Jesu, wakatani untu lakatumbi edienge, udjashi la ntundu ka Jesu, olotshi ahondo, aya la yimba, ku vo wakuki woma.

³⁶Emenyi wa dikambu so wakawatela uku akakono kanga odienge.

³⁷Antu tshe wa lu kete ya Ngadara wakosengasenga dia ndi mbamwela, ne dia woma a wuki akawandi. Ku ndi akoto lu watu, akakalula.

³⁸Keli untu lakatumbi edienge, akasengasenga Jesu dia ntshikala la ndi. Keli ndi akutumi, akawutela ati:

³⁹Ukaluli lakaye, utataka akambu wa mamba wukutshedi Unyashungu. Ku ndi akatshu, akatudianganya akambu a mamba wakutshela Jesu lʼusumba awo.

⁴⁰Lamʼakakalula Jesu, ului wʼantu wakusangela, ne dia vo tshe wakukungela.

⁴¹Enda, untu omotshi akayi, lukumbu landi Jayiro. Ndi aki umbuledi wʼetemwelo. Ndi akakhusama lʼekulu wa Jesu; akosengasenga ati: Uyoto lu luudu lami.

⁴²Ne dia ndi aki la ona umuntu otoi, laki la deku dikumi la pendi, lakayangi mvo. Keli lamʼakandatatshokaka, elui wʼantu wakukukela.

⁴³Umuntu laki la ekelelo ka dikila deku dikumi la pendi, akashili diango diandi le wetshi, keli nduku omotshi lakeyi mbokonoya.

⁴⁴Ndi akayi lʼokongo wa Jesu, akananda uhimbu wa dihondo diandi. Kemʼedja, dikila diakahimbo ntumba.

⁴⁵Jesu akambula ati: Umunandji na? Lamʼakanguna antu tshe, Petero la wane waki la ndi wakati vati: Uwandji, elui wʼantu wukudingi, mbukusakanyisha!

⁴⁶Keli Jesu akati ati: Untu omotshi akamunandji, ne dia dimi lambuka nti: Wulu wakatumbi uma le mi.

⁴⁷Lamʼakenyi umuntu ati: Wambumbishula, ndi akayi, ayadidima, akakhusama la ntundu kandi. Ndi akati lu ashu wʼantu tshe okone akandawunandji, ndu okone akandakonwe esadi.

⁴⁸Ku ndi akawutela ati: Onʼami, mbetawo kaye kambukokonoya; utshu la ki.

⁴⁹Lamʼakataka Jesu osoku, untu omotshi akayi uma laka umbuledi wʼetemwelo, akati ati: Onʼaye a umuntu ambuvo; tusuyaki Umbetsha ntu.

⁵⁰Keli lamʼakuki Jesu diui so, ndi akatela umbuledi wʼetemwelo ati: Tukaki woma, etawo paka mbetawo, ku ndi ayokono.

⁵¹Lamʼakandoto lu luudu, ndi kumbetawo dia untu mboto la ndi, tshikima Petero, Joani, Jakoba, la shi la nyangu ona umuntu.

⁵²Tshe wakalelaka, wakulelaka. Keli ndi akati ati: Tanyulelaki. Ndi havwi, lu djo kendi.

⁵³Ku vo wakawole sali, wakeyi vati: Ndi akavwi.

⁵⁴Keli ndi akukimela lu lunya; akawutela diui dia wulu ati: Ona umuntu, eto!

⁵⁵Ku lumu landi lakakalula; kemʼedja, ndi aketo. Ku Jesu akasengola dia mbusha mbu ya nde.

⁵⁶Ku ambutshi andi wakambi, keli ndi akakokomiya ati: Tanyutelaki untu dikambu diutshimi.