Read tetala Luka 9 Bible Online

Luka 9 - tetala bible

Luka 9

¹Jesu aketi ambeki dikumi la ahendi, akawasha wulu wa mbahamela edienge tshe la dia nkonoya hemo.

²Ndi akatumi dia ntusambisha dikambu dia diulelu dia Unyashungu, ndu dia ntokonoya akanga a hemo.

³Ndi akawatela ati: Tanyukimelaki engo ka ntsho lu lokendo lanyu, Tanyukimelaki danga kuyanga diutu, kuyanga mbu ya nde, kuyanga falanga. Tanyuyalaki la ekutu ehendi.

⁴Lu luudu tshe layunyoto, kanyuhangi loko edja ndu lamʼayunyunela.

⁵Wane wahanyulungula, lamʼayunyunela uma lʼusumba ako, kanyuhumeli ditshu uma lʼekulu anyu uku omenyi le wo.[66] [67]

⁶Ku vo wakunela, watakindula lu ngelu la ngelu, watasambisha lukumu lʼololo, la watakonoya antu lʼahuli tshe.

⁷Khumʼekanga Herode akuki akambu tshe wakatshama. Ku ndi akakanana efula, ne dia amotshi wakati vati: Joani kambulo uma lu nyoi;

⁸akina vati: Elidja kambene; akina vati:[68] Umvutshi omotshi wʼedjedja kambulo.

⁹Herode akati ati: Joani, dimi lakuhimbula ote, keli akona ukanga akambu aso wukami Ku ndi akayangi mbena.

¹⁰Lamʼakakalula atumami, vo wakatela Jesu akambu wakawatshi. Ku ndi akawaose, akatshu la wo vame lʼusumba, wetawo vati: Betesayida.

¹¹Keli lamʼakeyi elui wʼantu dikambu diako, vo wakuyeli. Ndi akalungula, akawatela dikambu dia diulelu dia Unyashungu; akakonoya wane wakahumbi nkono.

¹²Unya akayangi mbidja, ambeki dikumi la ahendi wakayi; wakawutela vati: Udianganya antu, vo watshu lu wangelu la lu tusamba, dia ntuhanga la dia ntukundja mbu ya nde, ne dia shu teko lane lu dihuli dia dieta.

¹³Keli ndi akawatela ati: Nyuwasha mbu ya nde. Vo wakati vati: Shu la dikenga dia ma tanu la nsi hyendi tshu — tshikima shu ntsho la ntusumbela antu ane tshe ma.

¹⁴Vo waki apami nunu tanu. Ndi akatela ambeki andi ati: Nyuwadjasha lu elui, uku akumi atanu akumi atanu.

¹⁵Vo wakatshi osoku, wakawadjasha vo tshe.

¹⁶Ku ndi akose dikenga diako tanu la nsi hyendi, akalela lʼulungu, akaditshokola, akadiatula. Ndi akasha ambeki dia vo nkitsha la ntundu kʼantu.

¹⁷Vo tshe wakali, wakaluti. Ambeki wakatongona betshi diakatshikala, asaka dikumi la ahendi.

¹⁸Lamʼakandalombaka lu dieta, ambeki waki la ndi. Ndi akawambula ati: Akona ata antu, emi?

¹⁹Vo wakûkaluya diui vati: Joani Ubatizanyi; akina mvutaka vati: Elidja; akina vati: Umvutshi omotshi wʼedjedja kambulo.[69]

²⁰Ndi akawambula ati: Keli nyu atanyu na, emi? Petero akûkaluya diui ati: Kristu ka Unyashungu keye.[70]

²¹Keli ndi akakokomiya, akawatela ati: Tanyutelaki untu dikambu so.

²²Ndi akati ntu ati: Dieli la Onʼa untu dia nsuwa esuwa efula ndu ntunama le dikumanyi la le elombedi a waki ndu le afundji. Dieli la ndi dia ndjakema, la dia mbulwama lushi la satu.

²³Naka untu nangaka ndjelami, ndi ayaseke, embe utamba andi a mpeketanya la lushi la lushi, andjeli.[71]

²⁴Ne dia untu tshe lalanga mamela lumu landi, ayulushisha. Keli untu tshe lashisha lumu landi dikambu diami, ndi ayulamela.[72]

²⁵Waho wa untu lendʼewo, naka ndi ayukundja kete tshe la ndjashisha kana ndjalanya?

²⁶Untu tshe layumbuka sonyi ndu layuka aui ami sonyi, Onʼa untu ayuwuka sonyi lamʼayunduya lu lutumbu landi ndame ndu lu lutumbu la Shi ndu la andjelo wʼekila

²⁷Keli dinu lambunyutela mete nti: Amotshi anyu wambemala lane, hawuvo edja ndu lamʼayuwena diulelu dia Unyashungu.

²⁸Uku nshi enanei uma lamʼakati Jesu aui aso, ndi akose Petero la Joani ndu Jakoba, akambela lʼukungu dia ntolomba.

²⁹Lamʼakandalombaka, elundji kandi akakadimo, dihondo diandi diakayala wema pesopeso la ngaingai.

³⁰Ulungi, apami ahendi, wakasawulaka la ndi. Vo waki Mose la Elidja.

³¹Vo wakene lu lutumbu, wakateketa dikambu dia nyoi kakandayangi mvo la Jerusalema.

³²Petero la wane waki la ndi, wakanyingonyingoka la djo. Keli lamʼakawasene, vo wakenyi lutumbu landi ndu apami ahendi wakemadi la ndi.

³³Lamʼakayangi apami ako mangana uma la le ndi, Petero akatela Jesu ati; Uwandji, ndeka ololo shu ntshikala lindu. Tuhiki tumbu satu: kemotshi kaye, kemotshi ka Mose, kemotshi ka Elidja. Ndi kumbeya kene kakandati.

³⁴Lamʼakandati aui aso, dingi diakayi, diakahutamela. Lamʼakawoto lu dingi, vo wakuki woma.

³⁵Ku diui diakayi uma lu dingi ati: Onʼami one, osonami ami[73] nyuwukeli![74]

³⁶Lamʼakashili diui, Jesu akatanema ndame. Vo wakatshikala ki, kumvutela nduku untu dikambu dimotshi lu nshi sho lʼatei wʼakambu wakawenyi.

³⁷La wedi a pindju, lamʼakawahulo uma lʼukungu, ului a wuki wʼantu wakahumana la ndi.

³⁸Ku pami kemotshi uma lʼului wʼantu akawelela ati: Umbetsha, dimi lambukosengasenga nti: Uyendi onʼami a pami. Ndi eko onʼami etoi.

³⁹Ulungi, odienge atuwundaka, ndi atawanaka shashimuya Odienge atuhuhanyaka edja ndu lolodu lambutumba. Vo hawututumbaka uma le ndi esadi, watokomolaka wulu.

⁴⁰Dimi lakasengasenga ambeki aye dia vo mbutundja, keli vo kumbeya mbutundja.

⁴¹Jesu akâkaluya diui ati: Yee! lolonga laha la mbetawo la akanga a wendjudi, edja ndu kaandi ayumutshikala la nyu ndu ayumuyala la memakana le nyu? Uhuya la onʼaye lindu.

⁴²Kamʼakandayayakaka, odienge akawumbi, akuhuhanya wulu. Keli Jesu akahangwela odienge. Ndi akakonoya dikenda dia pami, akûkaluya le shi.

⁴³Vo tshe wakambi dia wulu wa Unyashungu. Keli lamʼakambaka antu tshe dia akambu tshe wakandatshi, ndi akatela ambeki andi ati:

⁴⁴Aui ane woto lʼatui nyu, ne dia Onʼa untu ayukimwama lʼanya wʼantu.

⁴⁵Keli vo kumana diui so fundu. Dio diakashama le wo; okone vo kudieya. Vo wakuki woma dia mbumbula dia diui diako.

⁴⁶Vo wakatatela mumbwana dia untu akona luleki wuki lʼatei awo.[75]

⁴⁷Keli lamʼakenyi Jesu tukanyi ta lʼetema awo, ndi akose kiendakenda, akaweme la le ndi;

⁴⁸akawatela ati: Untu tshe lalungula kiendakenda nye lu lukumbu lami, ndi ambunungula. Untu tshe lanungula, ambulungula one lakantumi,[76] ne dia one luleki tshitshe lʼatei anyu, ndi keli wuki.

⁴⁹Joani akahula diui, akati ati: Uwandji, shu takenyi untu atundja edienge lu lukumbu laye; ku shu takusike, ne dia ndi kema undjedi kame la su.

⁵⁰Keli Jesu akâkaluya diui ati: Tanyusikeki. Untu lahanyutuni, eko lu leke lanyu.

⁵¹Lamʼakasukana nshi ya ndi mbosama lʼulungu, ndi akakolamela mbediya elundji kandi utsha la Jerusalema.

⁵²Ndi akatumi akendji la ntundu kandi. Vo wakatshu, wakakumi lu ngelu kʼasi Samariya la ntolongoswela akambu.

⁵³Vo kumbulungula, ne dia elundji kandi kakatelelaka utsha la Jerusalema.

⁵⁴Lamʼakenyi ambeki andi Jakoba la Joani dikambu so, vo wakawumbula vati: Khumadiondjo, we nangaka shu mvuta diui, dia dja mpulo uma lʼulungu la muatshumba?[77]

⁵⁵Keli ndi akakadimo, akahan, wela.

⁵⁶Ku vo wakatshu lu ngelu kekina.

⁵⁷Lamʼakawatatshokaka lu mbuka, untu omotshi akatela Jesu ati: Dmu layukuyela lu ahuli tshe, lenʼatayatshu.

⁵⁸Jesu akawutela ati: Mbulu yeko la afuku, fudu ya lʼulungu yeko a kefu, keli Onʼa untu kema la lama mbetamia ote andi!

⁵⁹Ku ndi akatela untu ukina ati: Undjeli. Keli ndi akati ati: Khumadiondjo, etawo dia dimi ntatshwi la ntukhunde papa.

⁶⁰Keli ndi akawutela ati: Utshiki edu, wakhundeki anyawo edu. Keli we, utshu, utadianganyaka dikambu dia diulelu dia Unyashungu.

⁶¹Ndu ukina akati ati: Khumadiondjo, layukuyela, keli etawo dia dimi ntalakanyi la wane weli lakami.[78]

⁶²Keli Jesu akawutela ati: Naka untu ayudja lunya lu lungu la nkutula ngombe, naka ndi ayewo, ku ndi hakuka mboto lu diulelu dia Unyashungu.