Read tetala Euhwelu kʼElembe 1 Bible Online

Euhwelu kʼElembe 1 - tetala bible

Euhwelu kʼElembe 1

¹Aui ane mbakatela Mose asi Isariyele la wedi wa Jorodana, lʼusui wa shenga, lu Araba, welanedi la Sufu, lʼasa Parana la Tofele, Labana, Hazerote, la Di Zahaba.

²Dihuli diako dieko lokendo la nshi dikumi la otoi uma la Horeba lu mbuka ka lʼUkungu a Seire, utsha la Kadeshe-Baranea.

³Lu lushi la ntundu la ngondo ka dikumi lʼotoi, lʼeleku kʼakumi anei, mbakatela Mose asi Isariyele akambu tshe wakawudjangela Latuyalaka dia mbatela.

⁴Akambu aso wakayala lʼokongo wʼelembiamelu ka Sihona, khumʼekanga kʼasi Amora[1] lakadjashi la Heshibona, la Onga, khumʼekanga ka Bashana,[2] lakadjashi lu Ashitarota ndu lu Ederei.

⁵Mose akatatela nimbitshiya antu elembe ene la wedi wa Jorodana, lu kete ya Moaba, ati:

⁶Latuyalaka, Unyashungu asu, akatutela la Horeba ati: Nyu nyambutamanya mbidjase lʼukungu one.

⁷Nyuneli, nyukimeli mbuka, nyutshu lu leke lʼakuna wʼasi Amora ndu lʼahuli tshe wa lasuki la wo lu Araba lu leke lʼakuna ndu lʼekndi, lu Nengebe, lʼumamu wʼashi a wuki (wetawo: Mediteraneya), lu kete yʼasi Kanana, la Lebanona, pulu ndu lu ndjali ka wuki, ketawo vati: Eyufarate.

⁸Nyendi, dimi lakakitsha kete la ntundu kanyu; nyutshu, nyutukiti kete yakalaki Latuyalaka washenyu, Abarahama, Isaka la Jakoba, dia mbasha, ndu vo ndu tukanula tawo.

⁹Dimi lakanyutela lʼetena keku nti: Dimi haleyi nyemba dime,

¹⁰Latuyalaka, Unyashungu anyu akanyufudia, ku elo nyambuyala efula uku toto ta lʼulungu.

¹¹Latuyalaka, Unyashungu a washenyu, anyufudia tena kinunu uku wenyu, ndu anyotshokole uku akandanyulaki!

¹²Dimi dime mbeyaka memba okende anyu la wutshu anyu la tamu tanyu uka?

¹³Nyosonole apami wa yimba, weli la ewu ndu weyama, uku wauhu anyu, ku dimi layakitsha uku ete anyu.

¹⁴Nyu nyakankaluya diui nyati: Dikambu diambuyuta ololo mbedio dia shu ditsha.

¹⁵Ku dimi lakose ete a wauhu anyu, apami a yimba ndu weyama. Ku lakakitsha uku ete, elombodi wa nunu, elombodi wa kama, elombodi wʼakumi atanu, elombodi wʼakumi, ndu embuledi lʼatei a wauhu anyu.

¹⁶Dimi lakatela embadi anyu lʼetena kako nti: Nyukeli anengenyu, nyusambuli lʼasa untu la onangu kana lʼasa ndi lʼuntu kʼuntu, ololo.

¹⁷Tanyuyalaki la shonodi yʼantu lʼelumbwelu; kanyukelaki untu a tshitshe uku untu a wuki. Tanyukaki elundji kʼuntu woma, ne dia elumbwelu keli ka Unyashungu. Ku naka dikambu diambunyuheka, kanyuyi la dio le mi, ku dimi layudiuka.

¹⁸Osoku mbakamanyutela akambu tshe wakanyahumbi ntsha lʼetena keku.

¹⁹Shu takunela uma la Horeba, takakindula utundu wʼusui wa shenga uku a wuki ndu a woma tshe wakanyenyi. Takakimela mbuka ka lu leke lʼakuna lʼasi Amora, uku akatudjangela Latuyalaka, Unyashungu asu. Ku shu takakumi la Kadeshe-Baranea.

²⁰Dimi lakanyutela nti: Nyu nyambukuma lu leke lʼakuna lʼasi Amora, lambutusha Latuyalaka, Unyashungu asu.

²¹Nyendi, Latuyalaka, Unyashungu anyu, akakitsha kete nye la ntundu kanyu. Nyutshu, nyutuyose sangu, uku akati Latuyalaka, Unyashungu a washenyu; tanyukaki woma kuyanga mpeko.

²²Nyu tshe nyakayi le mi, nyakayumvutela nyati: Tutumi apami amotshi la ntundu kasu dia ntukemba kete, dia ndjututela lukumu la mbuka kako kayututsho, la la esumba wayututakumaka.

²³Lukumu lako lakangenyangenya, ku lakatumi apami dikumi la ahendi uma lʼatei anyu; otoi uma lu wudja la wudja.

²⁴Vo wakatshu, wakambela lu leke lʼakuna, wakatukuma pulu ndu lʼukndi a Eshikole, wakatukemba kete.

²⁵Vo wakayi lʼelua emotshi uma lu kete yako lu anya awo, wakayekitsha la ntundu kasu. Vo wakatutela vati: Kete yʼololo mbambutusha Latuyalaka, Unyashungu asu.

²⁶Keli nyu kunanga ntsho leko, nyakahendula diui dia Latuyalaka, Unyashungu anyu.[3]

²⁷Nyakangunanguna lu mvudu yanyu yʼapema nyata nyati: Ne dia Latuyalaka tuhetshaka, mbakandatutundja uma lu kete ya Edjibitu, dia ndjutukumo lu anya wʼasi Araora, dia vo ndjutudiaka.

²⁸Lendi ayututsho na? Anengesu wakayutete etema ashi atu vati: Antu aso tuleka waki efula ndu etali. Esumba awo waki etu, la kumbu yawo ya wulu pulu ndu lʼulungu. Dikambu dikina, takatena ndu asika Anaka leko.

²⁹Dimi lambunyutela nti: Tanyateki asulu, tanyuwaukaki woma.

³⁰Latuyalaka, Unyashungu anyu, latokendakendaka la ntundu kanyu, ayunyolwela ta ndame, uku okone akandatshi lu ashu anyu lʼEdjibitu,

³¹ndu lʼusui wa shenga[4] lene akanyenyi nyati: Latuyalaka, Unyashungu anyu, lakanyembe uku atembaka untu onʼandi lu mbuka tshe kakanyayakendaka, edja ndu lamʼakanyakumi lu dihuli ne.

³²Kuyanga mbaki akambu ane, nyu kumbetawo Latuyalaka, Unyashungu anyu,[5]

³³lakatatshokaka la ntundu kanyu lu mbuka, lʼutshu lu dja dia nyenya mbuka kakanyahumbi nkendakenda ndu la yanyi lu dingi dia ntanyuyangela dihuli dia nyu mpanga, dia nyu mpika mvudu yanyu yʼapema.

³⁴Latuyalaka akuki aui anyu, ku ndi akumala; akatshibi ati:

³⁵Uma lʼatei a lolonga lone la kolo, nduku untu layena kete yʼololo yakamatshibi dia mbisha washenyu,[6]

³⁶tshikima Kaleba, onʼa Jefune; ndi kayuyena. Dimi layuwusha ndi la anʼandi kete yakandakendakenda, ne dia ndi akayeli Latuyalaka lʼutema tshe!

³⁷Latuyalaka akamumale ndu dimi lu dikambu dianyu; akati ati: Ndu we hukuma leko.

³⁸Jashua onʼa Nuna, ukambi aye, kayutukuma leko. Ukeketsha, ne dia ndi kayutukumia asi Isariyele lu sangu dia kete yako.

³⁹Dikambu dikina, anʼanyu wa tshitshe wakanyataka nyati: Wayuyala diango dia dimbu, ndu anʼanyu wahateyi dikambu diʼololo kana dia kolo elo, mbayukuma leko. Vo mbayumuyisha. Vo mbayuyikita.

⁴⁰Keli nyu, nyutshimbi, nyutshu utsha lʼusui wa shenga, lu mbuka kʼutsha lʼUduwa a Tilili.

⁴¹Ku nyu nyakakaluya diui nyati: Shu takatshela Latuyalaka kolo; shu tayutsho la ntolo ta uku akatundjangela Latuyalaka, Unyashungu asu. Ku nyu tshe, untu lʼuntu akalote dihumo dia ta, nyakayalongsola dia mumbela lu leke lʼakuna.

⁴²Latuyalaka akamvutela ati: Uwateli wati: Tanyutshokaki dia ntolo ta, ne dia dimi kema lʼatei anyu, nyutukutolembiama le atunyi anyu.

⁴³Dimi lakanyutela, keli nyu kumbuka. Nyakahendula diui dia Latuyalaka, nyakambela lu leke lʼakuna la wulu anyu.

⁴⁴Ku asi Amora, watudjaseka lu leke lako lʼakuna, wakayi dia ndjolo la nyu, wakanyutshanya uku ndjui. Vo wakanyudiaki la Seire edja ndu la Horoma.

⁴⁵Lamʼakanyakalula, nyu nyakayulela la ntundu ka Latuyalaka. Keli ndi kumbuka aui anyu, kuyanga nyukela.

⁴⁶Okone nyu nyakatshikala nshi efula la Kadeshe, lu nshi yakanyadjashi leko.