Read tetala Euhwelu kʼElembe 10 Bible Online

Euhwelu kʼElembe 10 - tetala bible

Euhwelu kʼElembe 10

¹Lʼetena keso, Latuyalaka akamvutela ati: Osele pasi diʼave pendi uku dia ntundu. Utshi ndu oshete wa sheki wʼabaya. Umbeli uya le mi ladiku diʼukungu.

²Dimi layufunda aui waki lu pasi dia ntundu diakayuli lu pasi ne, kudidji lʼoshete wa sheki.

³Okone lakatshi oshete wa sheki lʼabaya wʼulungu. Lakasele ndu pasi diʼave pendi uku dia ntundu. Ku lakambela ladiku diʼukungu lakimedi pasi diako pendi lʼanya.

⁴Latuyalaka akafundi elembe dikumi, wakandanyutela ladiku diʼukungu lʼatei wa dja, lushi lakandatusanganya uku akandafundi lu pasi dia ntundu; ku Latuyalaka akambishadio.

⁵Dimi lakakalula, lakahulo uma lʼukungu; lakadji pasi diako diʼave lu oshete wa sheki wakamatshi. Dio dieko loko, uku akambidjangela Latuyalaka.

⁶(Asi Isariyele wakunela uma la Berote-Bene-Jakana utsha la Mosera. Leko kakatuvo Arona,[65] kakandakhundama. Ku onʼandi Eleazara akukiti lʼulimu andi wʼolombedi.

⁷Vo wakunela uma leko, wakatshu utsha la Ngudengoda, la uma la Ngudengoda, utsha la Jotebata, kete yeli la ekedi wʼashi.

⁸Lʼetena kako, Latuyalaka akamamitula diuhu dia Lewi[66] dia vo membaka oshete wa sheki wa Latuyalaka, dia memalaka la ntundu ka Latuyalaka dia mbukambelaka ulimu; ndu dia ntshokolaka antu lu lukumbu landi. Osoku mbatuwutshaka edja ndu elo.

⁹Diako mbaha Lewi la etenyi kuyanga ukito kame la anangu. Latuyalaka keli sangu diandi, uku akandawutela.)

¹⁰Dimi lakatshikala tanyi akumi anei la etshu akumi anei ladiku diʼukungu[67] uku etena ka ntundu. Latuyalaka akambukela ndu etena kako, ndi kunanga dia nyudiaka.

¹¹Latuyalaka akamvutela ati: Unela, utshu, dia ntolombola wudja one. Vo watukiti kete yakamatshibela washenyu, dia mbasha.

¹²Kakiane Isariyele, kakona kakolomba Latuyalaka, Unyashungu aye, naka aha dia mbuka woma, dia nkendakendaka lu mbuka yandi tshe, dia mbuka Latuyalaka, Unyashungu aye, ngandji la mbukambela ulimu la utema aye tshe, la lumu laye tshe;

¹³dia nama elembe wa Latuyalaka la adjangu andi wamumukutela elo dia we ndjala la ongenongeno?

¹⁴Enda, Latuyalaka, Unyashungu aye, kukanga ulungu, la ulungu wa ladiku diʼulungu, kete la kene tshe keli loko.

¹⁵Paka ne dia Latuyalaka akangenangena dia mbuka washenyu ngandji, mbakandasonola ndu tukanula tawo, nyu ako weli ladiku dia wedja tshe, uku wenanyu elo.

¹⁶Okone nyahemia etema anyu uhekeli, dia minya kolo yawo; tanyuyalaki la ete wulu ntu.

¹⁷Ne dia Latuyalaka, Unyashungu anyu, eli Unyashungu wa ditemolatemola, ndu Khumi ka wa khumi,[68] Unyashungu a wuki, a wulu ndu wukama woma, waha la shonodi yʼantu,[69] ndu wahatulungulaka mbu yʼutshu.

¹⁸Ndi atusambwelaka ona etshiki la wadi aki udu ololo. Ndi atukaka ongendangenda ngandji, atuwushaka mbu ya nde la eloto.

¹⁹Kanyukaki angendangenda ngandji, ne dia nyu nyaki angendangenda lu kete ya Edjibitu.

²⁰Kanyukaki Latuyalaka, Unyashungu anyu, woma, kanyukambelaki ulimu. Kanyumamemi ndu kanyutshibaki lukumbu landi.

²¹Ndi keli diandu dianyu, keli Unyashungu anyu, kakanyutshela akambu ane a waki ndu wa woma, wakanyenyi lʼashu anyu dikambu dianyu.

²²Washenyu wakatshu antu akumi esambeli [70] lʼEdjibitu, ku kakiane Latuyalaka, Unyashungu anyu, ambunyufudia efula uku toto ta lʼulungu.[71]