Read tetala Euhwelu kʼElembe 11 Bible Online

Euhwelu kʼElembe 11 - tetala bible

Euhwelu kʼElembe 11

¹Okone ulangi Latuyalaka, Unyashungu aye. Ulamaki okende andi, welu andi, adjangu andi, la elembe andi nshi tshe.

²Nyulimbiteli dikambu ne elo (dimi hateketa la anʼanyu waki kumbeya ndu komena akambu ako), nyukani yimba lu ekiyelu ka Latuyalaka, Unyashungu anyu, wuki andi, lunya landi la wulu ndu lʼusimbwi,

³tulimbitelu tandi la etsha andi wakandatshi lu Edjibitu le Farayo, khumʼekanga ka Edjibitu, la lu kete yandi tshe.[72]

⁴Nyukani yimba uku akandatshela ului wʼalimbi wʼasi Edjibitu, falasa yawo, la pusupusu yawo ya ta: uku akandakedia ashi wʼUduwa a Tilili ladiku diawo lamʼakawayanyuyelaka,[73] ndu uku akandadiaki pundju uku wenanyu elo.

⁵Nyuho uku akandanyutshela lʼusui wa shenga edja ndu lamʼakanyakumi lu dihuli ne.

⁶Nyuho uku akandatshela Datana la Abirame, ana wa Eliyabe, onʼa Rubena, uku akase kete unyo ndu uku akayamene kame la khumbu yawo la mvudu yawo yʼapema la diango tshe diaki la wo, lʼatei wa Isariyele tshe.[74]

⁷Nyu nyakenyi akambu tshe a waki wakatshi Latuyalaka lu ashu anyu.

⁸Okone nyulamaki elembe tshe wamumunyudjangela elo, mbayunyuyala la wulu ndu mbayunyukuma lu kete yatanyatshu dia ntukita,

⁹ndu mbayuyala nshi yanyu efula la kete yakatshibela Latuyalaka washenyu dia mbasha, vo la tukanula tawo, kete yuludi lʼawele la usanga.

¹⁰Kete yatanyatshu dia ntukita, kema uku kete ya Edjibitu, lene akanyatumbi. Leko nyu nyakukaka wehu anyu lu dikambo, nyakeloyaka lʼekulu uku ekambo ka diunune.

¹¹Kete yatanyatshu dia ntukita, yeli kete yʼakuna la ekndi, yatoloyamaka la ashi a mvula uma lʼulungu.

¹²Yo yeli kete yatulamaka Latuyalaka, Unyashungu anyu ololo. Ashu andi weko ladiku diayo nshi tshe, umaka etatelu kʼeleku edja ndu ekumelu kato.

¹³Naka nyayulama elembe ami wambumunyudjangela elo, naka nyayulanga Latuyalaka, Unyashungu anyu, ndu nyayukambela ulimu la etema anyu tshe ndu la nyumu yanyu tshe,

¹⁴ndi ayunyoloshiya mvula lu kete yanyu lu etena kato, mvula kʼalohoki la mvula ka lolonge. Nyu nyayunaka epunga anyu, nyayamulaka ashi anyu wʼelua ndu biso dianyu.

¹⁵Ndi ayutumbia ndu adiyu lu dikambo dianyu dikambu dia dungalunga dianyu. Nyu nyayolekaka, nyayulutaka.

¹⁶Kanyewo, tanyukesamaki lʼetema anyu, dia nyu nkadimo utsha le ditemolatemola la ditemola.

¹⁷Latuyalaka atukunyuka kele ka wulu, ku ndi ndjiha ulungu diaha mvula ndo ntu la diaha kete ntundja tumbatumba. Ku nyayuvo esadi lu kete yʼololo yambunyusha Latuyalaka.[75]

¹⁸Okone nyukitsha aui ami ane wamumunyutela lʼetema anyu la lu nyumu yanyu. Nyakeleki lu anya anyu uku djimbitelu, ndu kawuyali lʼasa ashu uku tohondo tatuwolotaka lu fumu.

¹⁹Kanyaetshaki anʼanyu ndu kanyuwatelakiwo lamʼudjashinyu lu mvudu yanyu, lamʼatanyatshu lu lokendo, lamʼayunyetamaka ndu lamʼayunyetoka.

²⁰Kanyafundi lu dikoho dia asuku wa mvudu yanyu ndu lu kuki yanyu ya waki.[76]

²¹Ku nshi yanyu la nshi yʼana anyu yayuyala efula lu kete, yakatshibela Latuyalaka washenyu dia mbasha, uku weli efula ka nshi yeli ulungu ladiku dia kete.

²²Naka nyu nyayulamaka elembe ene tshe wamumanyudjela, ndu naka nyayetshaka dia mbuka Latuyalaka, Unyashungu anyu, ngandji dia nkendakenda lu mbuka yandi tshe, ndu dia mbumamema,

²³Latuyalaka ayutshanya wedja ene tshe weli la ntundu kanyu. Ku nyu nyayukita kete ya wedja wunyuleki waki ndu wulu.

²⁴Ahuli tshe wakamelaka akaka anyu, wayuyala anyu. Ulelu anyu wayuyala uma lʼusui wa shenga pulu ndu la Lebanona ndu uma lu Ndjali, ndjali kʼEyufarate, edja ndu lʼashi a waki wa lu leke lʼedjelu ka unya (wetawo: Mediteraneya).

²⁵Nduku untu ayuyala la wulu wa memala la ntundu kanyu.[77] Latuyalaka, Unyashungu anyu, ayudja woma anyu la lukumba lu etema wʼasi kete tshe yayunyutakendakendaka, uku akandanyulaki.

²⁶Enda, dimi lambukitsha otshoko la mananu elo la ntundu kanyu:

²⁷otshoko, naka nyu nyayukitanyia elembe wa Latuyalaka, Unyashungu anyu, wamumunyudjela elo;

²⁸mananu, naka nyu hanyukitanyia elembe wa Latuyalaka, Unyashungu anyu, la nyambetola uma lu mbuka kamumunyenya elo, dia nyu ntsho le ditemolatemola diahanyeyi.

²⁹Ku lamʼayunyukumia Latuyalaka lu kete yatanyatshu dia ntukita, kanyutukitsha otshoko lʼUkungu a Ngarizime, la mananu lʼUkungu a Ebala.[78]

³⁰Aha la wedi wa Jorodana keli ekungu ene lʼumamu a mbuka kʼutsha lʼedjelu, lu kete yʼasi Kanana, watudjaseka lu Araba, welanedi la Ngilingala, lasuki lʼetamba wʼelungu wa la More?

³¹Nyu nyutsha nteho Jorodana dia nkuma lu kete yambunyusha Latuyalaka, Unyashungu anyu, nyu nyayuyikita ndu nyayudjase loko.

³²Kanyulamaki ndu kanyutshaki elembe tshe la adjangu wamumukitsha la ntundu kanyu elo.