Read tetala Euhwelu kʼElembe 12 Bible Online

Euhwelu kʼElembe 12 - tetala bible

Euhwelu kʼElembe 12

¹Onʼeli elembe la adjangu wayunyuhumba nama ololo dia mbatshaka nshi tshe yayunyuyalaka la lumu la kete, lu kete yambunyusha Latuyalaka, Unyashungu a washenyu dia nyu nkita.

²Kanyutalanyaka ahuli tshe watotemolaka wedja wayunyutatshanyaka ditemolatemola diawo lʼekungu wʼetali, lu akuna ndu la tshina diʼutamba tshe weli la lumu.

³Kanyutanyukulaka diakelu diawo, kanyutudiudiaka dimeta diawo. Kanyutatshumbaka dikishi diawo lu dja, kanyutatshatshaka difanelu dia losela dia ditemolatemola diawo. Ndu kanyushisha kumbu yʼahuli akoa[79]

⁴Tanyutshelaki Latuyalaka, Unyashungu anyu, osoku.

⁵Keli kanyuyangi dihuli diayosonola Latuyalaka, Unyashungu anyu, lʼatei a wauhu anyu, dia ntukitsha lukumbu landi la ntsha edjaselu kandi leko.

⁶Leko kayunyukimoka elambu anyu wa lutshumba, elambu anyu ekina, tenyi dianyu dia dikumi, elonga anyu, elambu anyu wa nshndiya daka, elambu anyu wa lulangu, ndu ana wa nundu wa ngombe yanyu la ekoko anyu.

⁷Leko kayunyutolekaka la ntundu ka Latuyalaka, Unyashungu anyu, ndu kayunyongenangenaka nyu la khumbu yanyu lu akambu tshe wayunyutshaka, wayunyotshokola Latuyalaka, Unyashungu anyu.

⁸Okone tanyutshaki uku atshasu lane kakiane, shu tshe untu lʼuntu atutshaka kene keli ololo lu ashu andi,

⁹ne dia nyu nyatakumi lu dihuli dia mumuya ndu lu ukito wambunyusha Latuyalaka, Unyashungu anyu.

¹⁰Keli lamʼayunyuteho Jorodana ndu lamʼayunyutudjase lu kete yambunyusha Latuyalaka, Unyashungu anyu, ukito, ndi ayunyusha mumuya lamʼayundushila nyutshungula uma le atunyi anyu wunyudingi. Okone ku nyu nyayudjase la lutui tshitshi.

¹¹Ku Latuyalaka, Unyashungu anyu, ayosonola dihuli dimotshi dia nkitsha lukumbu landi leko. Leko kayunyutukimoka kene tshe kamumunyudjangela: elambu anyu wa lutshumba, la elambu anyu ekina, tenyi dianyu dia dikumi, laelonga anyu la elambu anyu wa daka, wayunyukimoka le Latuyalaka, dia nshidiya alaka anyu.

¹²Nyu nyayongenangenaka leko la ntundu ka Latuyalaka, Unyashungu anyu, nyu la anʼanyu wʼapami la anʼanyu wʼamantu, ekambi anyu wʼapami la ekambi anyu wʼamantu ndu usi Lewi leli lu luudu lanyu, ne dia ndi kema la etenyi kana ukito kame la nyu.

¹³Nyewo dia nambula elambu anyu wa lutshumba lu ahuli tshe wayunyena.

¹⁴Keli kanyulambulaki elambu anyu wa lutshumba lu dihuli diayosonola Latuyalaka, lu diuhu dianyu dimotshi. Leko kayunyututshaka kene tshe kamumunyudjangela.

¹⁵Keli nyu mbeyaka ndjaka nyama uku alanganyu, la nde emunyi ate lʼatei wʼesumba anyu tshe, uku eli otshoko wakanyusha Latuyalaka, Unyashungu anyu. One leli mindu la one leli pudipudi mbeyaka kile uku atuwolekaka mbuluku, la peli.

¹⁶Dikambu otoi, tanyolekaki dikila,[80] kanyuditshululaki la kete uku ashi.

¹⁷Tanyolekaki etenyi ka dikumi kʼepunga anyu, kʼashi anyu wʼelua, ndu ka biso dianyu, kuyanga ana wa nundu wa ngombe yanyu la wʼekoko anyu, ulambu anyu omotshi wa nshndiya daka, elambu anyu wa lulangu kana elonga anyu lʼatei wʼesumba anyu.

¹⁸Keli kanyuyilekaki, nyu la anʼanyu wʼapami la anʼanyu wʼamantu, ekambi anyu wʼapami la ekambi anyu wʼamantu, ndu asi Lewi lʼatei wʼesumba anyu, la ntundu ka Latuyalaka, Unyashungu anyu, lu dihuli diayundosonola. Ku kanyongenengene la ntundu ka Latuyalaka, Unyashungu anyu, lu elimu tshe watunyutshaka lʼanya anyu.

¹⁹Nyewo, tanyukaleki asi Lewi nshi ya lumu lanyu tshe lu kete yanyu.

²⁰Lamʼayokokola Latuyalaka, Unyashungu anyu, kete yanyu uku akandanyulaki, nyu nyayuta nyati: Shu nangaka nde unatshi, ne dia etema asu nangaka, nyu mbeyaka nde unatshi uku alanganyu.

²¹Naka dihuli diayosonola Latuyalaka, Unyashungu anyu, dia nkitsha lukumbu landi dieko la nyu etali, nyu mbeyaka ndjaka ngombe yanyu kana ekoko anyu uku akamanyutela. Nyu mbeyaka yile lʼatei wʼesumba anyu uku alanganyu.

²²Kanyuyilekaki uku atuwolekaka mbuluku la peli. One leli mindu ndu one leli pudipudi mbeyaka yile.

²³Dikambu otoi, kanyewo, tanyolekaki dikila, ne dia dikila dieli lumu. Okone tanyolekaki lumu lako kame la emunyi.

²⁴Tanyudilekaki; kanyuditshululaki la kete uku ashi.[81]

²⁵Tanyudilekaki, mbayunyuyalaka la ongenongeno, ndu nyu ndu anʼanyu lamʼatshanyu akambu wʼusimbwi lu ashu wa Latuyalaka.

²⁶Kanyose paka diango dianyu diʼekila dieli la nyu, la elambu anyu wa nshndiya alaka. Kanyutshu lu dihuli diayosonola Latuyalaka.

²⁷Kanyutulambulaki elambu anyu wa lutshumba, emunyi la dikila lʼediakelu ka Latuyalaka, Unyashungu anyu. Dikila dia elambu anyu mbayunyutshululaka lʼediakelu ka Latuyalaka, Unyashungu anyu. Ku nyu nyayolekaka emunyi.

²⁸Nyulami, ndu nyulungi aui ane tshe wamumunyutela dia nyu ndjala la ongenongeno, ndu nyu ndu anʼanyu, pundju lamʼayunyutshaka akambu wʼololo ndu wʼusimbwi lu ashu wa Latuyalaka, Unyashungu anyu.

²⁹Lamʼayudiaka Latuyalaka, Unyashungu anyu, wedja wayunyohotola kete la ntundu kanyu, lamʼayunyahotola ndu lamʼayunyudjase lu kete yawo,

³⁰kanyewo, nyutukutala lu djunga dia mbayela lamʼayuwulanyema uma la ntundu kanyu. Kanyewo, tanyumbwanaki dia ditemolatemola diawo nyati: Ngandi akatshaka wedja ene dia ntemola ditemolatemola diawo? — dia ndu shu ntsha wuhu ako.

³¹Tanyutshelaki Latuyalaka, Unyashungu anyu, osoku, ne dia vo wakatemolaka ditemolatemola diawo, wakatshaka akambu tshe a wononyi watuhetshaka Latuyalaka, ne dia wakatshumbelaka ditemolatemola diawo ndu anʼawo wʼapami la anʼawo wʼamantu lu dja.

³²Kanyulamaki la kanyutshaki akambu tshe wamumunyutela ololo. Tanyaheki nduku diui, ndu tanyahulaki.[82]