Read tetala Euhwelu kʼElembe 13 Bible Online

Euhwelu kʼElembe 13 - tetala bible

Euhwelu kʼElembe 13

¹Naka umvutshi omotshi kana omenyi wʼalo ambunela lʼatei anyu, ambunyenya djimbitelu motshi kana dikambu dia mamba,

²ku lamʼayushndiyama djimbitelu kana dikambu dia mamba diku, diakandanyutela ati: Tuyeli ditemolatemola, diahanyeyi, tuditemole,

³tanyulungaki aui wʼumvutshi kana omenyi wʼalo ako, ne dia Latuyalaka, Unyashungu anyu, kambunyedika, dia mbeya kana nyu mbukaka ngandji lʼetema anyu tshe ndu la nyumu yanyu tshe.

⁴Nyuyelaki Latuyalaka, Unyashungu anyu, nyuwukaki woma. Nyulamaki elembe andi, nyukitanyiaki diui diandi. Nyukambelaki ulimu, ndu nyumamemi.

⁵Umvutshi kana omenyi wʼalo uku ayudiakema, ne dia ndi akanyetsha dia mpendwela Latuyalaka, Unyashungu anyu, lakanyutundja uma lu kete ya Edjibitu, ndu lakanyutshungula uma lu luudu la lohombo. Ndi akalangi nyetoya uma lu mbuka kakanyudjangela Latuyalaka, Unyashungu anyu, dia nyu nkendakenda. Osoku mbayunyunya kolo keli lʼatei anyu.

⁶Naka onanyo la pami, lakuto laye utema otoi, kana onʼaye la pami kana la umuntu, kana umuntu lukaye ngandji, kana ongenyi aye lalangaye uku ayalangaye, ayukotombosha lu usheshe ati: Tutshu, tutotemole ditemolatemola diahayeyi ndu diaki washo kumbeya,

⁷dia lʼatei wa ditemolatemola dia wedja wutudingi, wa lasuki la nyu kana lʼetali uma la kuma ka kete kemotshi pulu ndu la kuma kekina,

⁸tetawoki aui andi, tulungaki. Tuwendaki lʼelundji kʼoketshi, tuhandjaki, tuwusheki,

⁹keli kudiaki. Kedia lunya laye ntundu dia mbudiaka, ku antu tshe wayedia anya awo lʼokongo diku.

¹⁰Kuwuki ave, ndi kavu; ne dia ndi akayangi nkukadimula uma le Latuyalaka, Unyashungu aye, lakakutundja uma lu kete ya Edjibitu, lu luudu la lohombo.

¹¹Ku Isariyele wayuka lukumu lako, wayuka woma; diaha vo ntsha dikambu dia kolo dia wuhu one lʼatei anyu ntu.

¹²Naka nyayuka lukumu uma lʼusumba omotshi lʼatei wʼesumba anyu wakanyusha Latuyalaka, Unyashungu anyu, dia nyu mbidjase loko, ati:

¹³Tufumbofumbo tomotshi tʼantu takatumbi uma lʼatei anyu, wakatukesa wane wudjashi lʼusumba vati: Tutshu, tutotemole ditemolatemola diahanyeyi,

¹⁴kanyuyangi, kanyuyangiayangia, kanyumbuli ololo. Kanyendi, kana dikambu diako dieko mete ndu dieko shikaa, kana dikambu dia wuhu oso dia wononyi diakatshama lʼatei anyu.

¹⁵Mete, mete, kanyudiaki wane wudjashi lʼusumba ako la yombo, kanyulanya ndu usumba ako tshe, kame la diango tshe dieli loko, kanyulanya ndu dungalunga la tombo.

¹⁶Kanyusanganya diango dia dimbu tshe lu seke lʼatei wʼosese wʼusumba, kanyutshumbi usumba ako tshe kame la diango diawo tshe dia dimbu, uku ulambu wa lutshumba le Latuyalaka, Unyashungu anyu. Vo wayutshikala ului wʼelanyelu pundju, hawukamaki ntu.

¹⁷Tanyunandaki engo tshe kakakndiama lʼanya anyu, ne dia Latuyalaka mbeyaka nkadimo uma lu kele kandi, la nyuka ketshi la ote vu-vu, ndu nyufudia, uku akandatshibela washenyu,

¹⁸naka nyayukitanyia diui dia Latuyalaka Unyashungu anyu, naka nyu nyayulama elembe andi tshe wamumunyudjela elo, ndu naka nyu nyayutsha akambu wʼusimbwi lu ashu andi.