Read tetala Euhwelu kʼElembe 14 Bible Online

Euhwelu kʼElembe 14 - tetala bible

Euhwelu kʼElembe 14

¹Nyu nyeli ana wa Latuyalaka, Unyashungu anyu. Tanyuyakotaki puta kuyanga minya divu diwandji uma lu fumu lamʼavo untu,[83]

²ne dia nyu nyeko wudja wʼekil a wa Latuyalaka, Unyashungu anyu. Latuyalaka akanyosonola uma lʼatei a wedja tshe wa la kete, dia nyu ndjala wudja andi wʼukito.[84]

³Tanyolekaki engo tshe ka wononyi.

⁴Kanyolekaki nyama nye: ngombe, okoko la mbudi,

⁵peli, mbuluku, lufumbo, mangana, pambi, kawi, la ngolo.

⁶Kanyolekaki nyama tshe keli la sanga ya sandju ndu katutuhulaka adiyu.

⁷Keli tanyolekaki nyama yatutuhulaka adiyu atu, kana yeli la sanga ya sandju tshu. Okone tanvolekaki kamelo, utumba, la ewuka, wane watutuhulaka adiyu atu, keli yo kema la sanga ya sandju, yo yeko mindu le nyu.

⁸Tanyolekaki sumbu, ne dia to keli la sanga ya sandju, keli to hatutuhulaka adiyu, to keko mindu le nyu. Tanyolekaki emunyi ayo, ndu tanyunandaki edu ayo.

⁹Lʼatei a dikendakenda tshe dia lʼashi, kanyolekaki wehu ene: nyu mbeyaka nde ne tshe dieli la pafuhafu ndu dieli la pusu.

¹⁰Keli tanyolekaki ne tshe diaha la pafuhafu la pusu. Dio dieko mindu le nyu.

¹¹Kanyolekaki fudu tshe ya pudipudi.

¹²Keli tanyolekaki nye: pungu, kuumbaka, pungu ka lʼashi,

¹³lodi la wane wufanyi la lo; eki la wane wufanyi la to;

¹⁴dingwangwa la wehu adio tshe;

¹⁵teki, esukula, diwata diʼashi, la djela la wuhu ayo tshe,

¹⁶uputute, tshiketiki, dikonde,

¹⁷diata, lukhudukoto, wokoko;

¹⁸yemema, yongʼakuki la wane wufanyi la yo, lulima la fukifuki.

¹⁹Tufumbofumbo tshe teko mindu le nyu. Tanyolekaki.

²⁰Kanyolekaki difumbofumbo tshe dia pudipudi.

²¹Tanyolekaki nyama tshe kambuvo usena, kanyuyishaki angendangenda weli lʼatei anyu dia vo ndjile, kana nyuyisundja le asi wedja, ne dia nyu nyeli wudja wʼekila le Latuyalaka, Unyashungu anyu. Tanyukateki osongo a mbudi lu awele a nyangu.[85]

²²Kanyukimoki etenyi ka dikumi ka diango tshe diayunyunaka uma lu wehu wakanyune,[86] diayongonyaka dikambo dianyu lu eleku lʼeleku.

²³Ndu kanyolekaki tenyi dia dikumi dia epunga anyu, dia wanu anyu wʼeyuyu la dia biso, ndu ana wa nundu wa ngombe yanyu la wa ekoko anyu la ntundu ka Latuyalaka, Unyashungu anyu, lu dihali diayundosonola dia nkitsha lukumbu landi, dia nyu mbeka mbuka Latuyalaka, Unyashungu anyu, woma nshi tshe.

²⁴Naka mbuka keko etali, ku nyu hanyeyi memba tenyi dia dikumi utsha lu dihuli diayosonola Latuyalaka, Unyashungu anyu, dia ntukitsha lukumbu landi, ne dia etali,

²⁵kanyengonyaki tenyi dianyu dia dikumi la falanga, kanyukimeli falanga yako lu anya anyu, la ntsho la yo utsha lu dihuli diayosonola Latuyalaka, Unyashungu anyu.

²⁶Kanyutusumbi diango tshe diayunyutulanga la falanga yako; ngombe, ekoko, wanu la dinono dia wulu, kene tshe kayunyutulanga. Kanyuli la ntundu ka Latuyalaka, Unyashungu anyu, kanyongenengene, ndu nyu ndu asi khumbu yanyu.

²⁷Tanyukaleki asi Lewi wayuyala lu esumba anyu, ne dia vo kema la etenyi kuyanga ukito kame la nyu.

²⁸Lʼekumelu ka deku satu satu, kanyutundjaki tenyi dia dikumi tshe dia dinela dianyu lʼeleku ka satu, kanyudikitshaki lʼatei wʼesumba anyu.

²⁹Ku usi Lewi laha la etenyi kuyanga ukito kame la nyu, ongendangenda, ona etshiki la wadi aki udu, weli lu esumba anyu wayuyaka, wayoleka, wayulutaka. Ku Latuyalaka, Unyashungu anyu, ayunyotshokola lu elimu tshe wayunyutshaka lʼanya anyu.