Read tetala Euhwelu kʼElembe 15 Bible Online

Euhwelu kʼElembe 15 - tetala bible

Euhwelu kʼElembe 15

¹Kanyukimwanelaki diango lʼekumelu ka mvula esambeli, esambeli.

²Kanyukimwanelaki diango okone: Osondjanyi tshe kakimweli unyandi kene kakandosondja. Ndi tahinyaki unyandi kana onangu dia nfuta dibasa diandi, ne dia oso eli ekimwelu ka nemia Latuyalaka.

³Nyu mbeyaka mpinya ongendangenda, keli nyu mbeyaka nkimwela anengenyu diango dianyu.

⁴Keli nduku usi wula ayuyala lʼatei anyu (ne dia Latuyalaka, Unyashungu anyu, ayunyotshokola lu kete yakandanyusha ukito),

⁵dikambu otoi, nyukitanyiaki diui dia Latuyalaka, Unyashungu anyu, dia nama la ntsha elembe ene tshe wamumunyudjela elo.

⁶Latuyalaka, Unyashungu anyu, ayunyotshokola uku akandanyulaki. Nyu nyayosondjaka wedja efula diango, keli nyu hanyuhumba nsomba. Nyu nyayulela wedja efula, keli vo hawunyulela.

⁷Naka usi wula omotshi eko lʼatei anengenyu, lu usumba anyu omotshi, lu kete yanyu, yambunyusha latuyalaka, Unyashungu anyu, tanyukikitshaki etema, tanyukhukeki anya anyu la ntundu ka onengenyu leli la wula.

⁸Keli kanyukhukwelaki anya, kanyosondjaki diango, dia ndi nkutsha ehumba andi.[87]

⁹Nyewo, ne dia tukanyi ta kolo tatukuyala lu etema anyu, ku nyu mvuta nyati: Eleku kʼesambeli, eleku ka nkimwanela diango, kaya suki. Tanyendaki onengenyu leli la wula su dia kolo, aha mbusha nduku engo. Lamʼayundunyulelele le latuyalaka, dikambu diako diayuyala kolo le nyu.

¹⁰Mete, nyuwusha diango ushasha. Etema anyu tawuyalaki la ukiyanu lamʼayunyuwusha, Latuyalaka, Unyashungu anyu, ayunyotshokola lu akambu anyu tshe ndu lʼelimu anyu tshe watshanyu lʼanya anyu.

¹¹Asi wula hawushilaki pundju la kete.[88] Diako mbanyutelami nti: Kanyukhukwelaki onengenyu, usi wula, la uhumbi ludjashi lu kete yanyu anya anyu.

¹²Naka onanyo omotshi, usi Heberu la pami kana la umuntu ambusundjama le ye, ndi kakukambeli ulimu deku samalu. Keli eleku kʼesambeli, kukimo uma lakaye dia ndi ndjala la ndjadjasela.

¹³Ku lamʼayuyukimo dia ndi ndjala la ndjadjasela, tukimoki anya atu.

¹⁴Kuwusha ekoko aye emotshi ushasha, diango diaye dia nde dimotshi dia mbuyususula, ashi wʼelua wayuyuhina, uku akakotshokola Latuyalaka, Unyashungu aye, mbayuyuwusha.

¹⁵Nyuho nyati: Nyu nyaki fumbi lu kete ya Edjibitu, ku Latuyalaka, Unyashungu anyu, akanyutshungula. Diako mbamumunyudjela olembe one elo.

¹⁶Naka fumbi kaye ayukutela ati: Dimi halangi mumo uma lakaye, ne dia ndi nkulangaka we la khumbu kaye, la ndi ambuhumo lukulu lʼololo lakaye,

¹⁷kose wuulu, Kutunduli tui, ku ndi ayuyala fumbi kaye pundju. Kutsheli ndu fumbi kaye ka umuntu pupu.

¹⁸Dikambu ne tadiuyalaki wulu le ye lamʼayuyukiiao dia ndi ndjala la ndjadjasela, ne dia ndi akakukambela ulimu deku samalu diedimi la etenyi ka hendi ka difutu diʼumundji wʼulimu. Latuyalaka, Unyashungu aye, ayukotshokola lu kene tshe katuyutshaka.[89]

¹⁹Kanyukndia ana wa nundu tshe a waumi, watutaka ngombe, la ekoko, le Latuyalaka, Unyashungu anyu.[90] Tanyutshaki ulimu la ana wa nundu wa ngombe yanyu. Ndu tanyuhimbulaki ana wa nundu wʼekoko anyu diosa.

²⁰Kanyalekaki eleku lʼeleku, nyu la khumbu yanyu, la ntundu ka Latuyalaka, Unyashungu anyu, lu dihuli diayundosonola.

²¹Naka onʼa nyama lʼenundu omotshi eko la ekomo, etshumbi kana tshungu, kuku kana ekomo kekina ka wuki, tanyulambulaki ulambu le Latuyalaka, Unyashungu anyu.

²²Kanyuli lʼatei wʼesumba anyu. Untu la mindu ndu untu la pudipudi mbeyaka mbole pupu, uku atowolekaka mbuluku kana peli.

²³Dikambu otoi, tanyolekaki dikila diawo.[91] Kanyuditshululi lu kete uku ashi.