Read tetala Euhwelu kʼElembe 16 Bible Online

Euhwelu kʼElembe 16 - tetala bible

Euhwelu kʼElembe 16

¹Kanyulamaki ngondo ka Abiba, kanyutshaki dambu diʼElekanelu[92] le Latuyalaka, Unyashungu anyu; ne dia lu ngondo kako ka Abiba kakanyutundja Latuyalaka, Unyashungu anyu, uma lʼEdjibitu lʼutshu.

²Kanyulambulaki ekoko la ngombe lu dambu diʼElekanelu le Latuyalaka, Unyashungu anyu, lu dihuli diayundosonola dia nkitsha lukumbu landi leko.

³Tanyolekaki ma dieli la edya lu nshi yako. Kanyolekaki ma diaha la edya nshi esambeli, ma dia lunyangu — ne dia nyu nyakatumbi uma lu kete ya Edjibitu emangumangu — dia nyu mbuhoka lushi lakanyatumbi uma lu kete ya Edjibitu nshi tshe ya lumu lanyu.

⁴Edya takitanemaki lʼatei a nshi esambeli lu ahuli anyu, lu kete yanyu tshe. Tanyete unatshi wa nyama kayunyudiaka la dikolo dia lushi la ntundu, uma kʼutshu edja ndu pindju.

⁵Tanyulambulaki ulambu wa dambu diʼelekanelu lʼatei wʼusumba anyu omotshi wambunyusha Latuyalaka, Unyashungu anyu dia nyu mbidjase.

⁶Keli lu dihuli diayosonola Latuyalaka, Unyashungu anyu, dia ndi nkitsha lukumbu landi leko, mbayunyutshaka dambu diʼelekanelu la dikolo lamʼayudja unya, lʼetena kakanyatumbi uma lʼEdjibitu.

⁷Kanvukateki unatshi, kanyolekaki lu dihuli diayosonola Latuyalaka, Unyashungu anyu. Kanyunelaki la pindju ku nyu nkalulaka utsha la mvudu yanyu yʼapema.

⁸Kanyolekaki ma diaha la edya nshi shamalu. Lushi lʼesambeli, layuyalaka lusanganya la lukumu le Latuyalaka, Unyashungu anyu. Tanyutshaki ulimu lushi lako.

⁹Kanyali bingu esambeli. Kanyutateli mbala bingu esambeli umaka etena kayunyutatela muna epunga.

¹⁰Lʼokongo diku, kanyulamaki lushi la wuki la bingu esambeli,[93] ndu kanyulambulaki elambu wa lulangu uku etshoko wanyotshokola Latuyalaka, Unyashungu anyu.

¹¹Nyu nyayongenangena, nyu la anʼanvu wʼapami la anʼanyu wʼamantu, ekambi anyu wʼapami la wʼamantu, asi Lewi weli lu esumba anyu, la angendangenda, ana a ditshiki la wadi waki edu weli lʼatei anyu, la ntundu ka Latuyalaka, Unyashungu anyu, lu dihuli diayundosonola dia nkitsha lukumbu landi leko.

¹²Nyuho nyati: Nyu nyaki fumbi lʼEdjibitu. Okone nyulamaki dia ntsha elembe ene ololo.

¹³Kanyulamaki lushi la wuki la tusamvusamvu[94] nshi esambeli lamʼayunyushidiyaka nsusula la mpina ashi wʼelua.

¹⁴Nyu nyayongenangenaka lu lushi lanyu la wuki, nyu la anʼanyu wʼapami la anʼanyu wʼamantu, ekambi anyu wʼapami la wʼamantu, ndu asi Lewi, angendangenda, ana wa ditshiki la wadi waki edu weli lu esumba anyu.

¹⁵Kanyulamaki lushi la wuki le Latuyalaka, Unyashungu anyu, nshi esambeli, lu dihuli diayundosonola. Latuyalaka, Unyashungu anyu, ayunyotshokola lu anela anyu tshe ndu lʼulimu tshe watunyutshaka lʼanya, ku nyu tshe nyayuyala la ongenongeno.

¹⁶Apami tshe lʼatei anyu, kawenamaki la ntundu ka Latuyalaka, Unyashungu anyu, tena satu lʼeleku lʼeleku, lu dihuli diayundosonola: lu lushi la wuki la ma diaha la edya, lu lushi la wuki la bingu, ndu lu lushi la wuki la tusamvusamvu. Vo tawenamaki lʼanya hwe la ntundu ka Latuyalaka.

¹⁷Untu lʼuntu kakimo uku ekundjelu kandi, uku etshoko wa Latuyalaka, Unyashungu anyu, wakandanyusha.

¹⁸Kanyosonole embadi la afundji lʼesumba tshe, wambunyusha Latuyalaka, Unyashungu anyu, uku wauhu anyu. Vo kawulumbuyaki wudja la sambu kʼololo.

¹⁹Tanyulanyaki sambu kʼololo. Tanyuyalaki la shonodi yʼantu. Ndu tanyulungulaki mbu yʼutshu, ne dia mbu yʼutshu yatulaka ashu wakanga a yimba ndu yatulanyaka akambu wʼantu waha la unungu.[95]

²⁰Kanyuyelaki sambu kʼololo, sambu kʼololo ketu, mbayunyuyala la lulumbi ndu mbayunyukita kete yambunyusha Latuyalaka, Unyashungu anyu.

²¹Tanyuneki nduku utamba uku Ashera[96] lʼumamu wʼediakelu kayunyuhikela Latuyalaka, Unyashungu anyu.

²²Tanyuhikaki pingu[97] yatuhetshaka Latuyalaka, Unyashungu anyu.