Read tetala Euhwelu kʼElembe 17 Bible Online

Euhwelu kʼElembe 17 - tetala bible

Euhwelu kʼElembe 17

¹Tanyulambulaki Latuyalaka, Unyashungu anyu, ngombe kana okoko weli lʼekomo kana wʼengeno ulambu, ne dia dikambu so dieli wononyi le Latuyalaka, Unyashungu anyu.

²Naka pami kana umuntu omotshi ayutanema lʼatei anyu lʼusumba omotshi, lʼatei wʼesumba anyu wambunyusha Latuyalaka, Unyashungu anyu, atsha dikambu dia kolo lu ashu wa Latuyalaka, Unyashungu anyu, adiaka sheki yandi,

³ambutsho le ditemolatemola dia ntudikambela ulimu la ditemola,[98] kuyanga ntsho le unya, ngondo kana le ului tshe wa diango dia lʼulungu, diakamanyuseke.

⁴Lamʼayuwunyutela dikambu diako ndu lamʼayunyudiuka, kanyuyangiayangia; kanyeyi kana dikambu diako mete kedio. Naka dikambu so dia wononyi diakatshama lu Isariyele,

⁵kanyutundja pami kana umuntu lambutsha dikambu diako dia kolo lʼasuku wʼesumba anyu. Kanyuki pami kako kana umuntu ako aye, kanyudiaki.

⁶One leli la dikambu dia mvo, kadiakemi uma lu aui wa emenyi ehendi kana esatu. Keli aha lu diui dia omenyi otoi tu, ku ndi mvo.[99]

⁷Emenyi kawedia anya awo ntundu dia mbudiaka, ku lʼokongo diku antu tshe. Osoku mbayunyunyaka kolo uma lʼatei anyu.[100]

⁸Naka dikambu dimotshi dia diakanelu, dia olembe kuyanga dia somboki diayuyala wulu le nyu dia nsambula, ku diambuyala tamu lʼesumba anyu, kanyuneli, kanyutshu utsha lu dihuli diayosonola Latuyalaka, Unyashungu anyu.

⁹Kanyutshu utsha le elombedi, asi Lewi, la le one layuyala lʼulimu wʼumbadi nshi ku, kanyutuwambuli, ku vo wayunyutela esambwelu kadio.

¹⁰Kanyutshi uku ayuwunyutela uma lu dihuli diayosonola Latuyalaka; kanyulami dia ntsha akambu tshe wayuwunyutela.

¹¹Kanyututshi uku wetshelu wayuwunyetsha, la uku esambwelu kayuwusambula; tanyetolaki lu lunya la pami kana lu lunya la lomoso uma lu sambu kayuwutunyutela.

¹²Untu layutsha lʼutaku, lahakitanyia olombedi, latemalaka dia ntsha ulimu la ntundu ka Latuyalaka, Unyashungu anyu, kuyanga umbadi, ndi ayudiakema. Osoku mbayunyunyaka kolo uma lu Isariyele.

¹³Ku antu tshe wayuka dikambu diako, wayuka woma diaha ntsha akambu wʼutaku.

¹⁴Lamʼayunyukuma lu kete yambunyusha Latuyalaka, Unyashungu anyu, lamʼayunyutuyikita, lamʼayunyutudjase leko ndu lamʼayunyuta nyati: Shu nangaka nkitsha khumʼekanga, layuyala ladiku diasu, uku eli wedja ekina wutudingi.[101]

¹⁵Mete, kanyukitsha khumʼekanga kayosonola Latuyalaka, Unyashungu anyu, dia ndi nyulela, kanyose khumʼekanga kako uma lʼatei wa anengenyu. Tanyukitshaki ongendangenda, leli kema onengenyu, dia ndi nyulela.

¹⁶Dikambu otoi, ndi tayafudiaki falasa, kuyanga nkaluya wudja utsha lʼEdjibitu, dia ndi ntuyafudiya falasa efula.[102] Latuyalaka akanyutela ati: Tanyukalulaki lu mbuka keku ntu pundju.

¹⁷Ndi tayalaki la wadi efula, ne dia utema andi atukuyukadimo;[103] ndu tayafudiyaki fesa la paunyi.[104]

¹⁸Lamʼayundudjase lu kiti ka diulelu ka diulelu diandi, ndi kayasangweli aui weli lu elembe ene, uma lu buku dieli lʼokende wʼelombedi wʼasi Lewi.

¹⁹Dieli la ndi dia ntshikala la wo la moalaka nshi tshe ya lumu landi, dia ndi mbeka mbuka Latuyalaka, Unyashungu andi, woma, dia nama la ntshaka aui tshe weli lu elembe ene ndu adjangu ane.

²⁰Ndi atukuyabiya lʼutema andi ladiku dia anangu, ndu atuketola lu lunya la pami kana la lomoso uma lʼelembe ene. Osoku mbayunduyala nshi efula lu diulelu diandi, ndi la anʼandi, lʼatei wa Isariyele.