Read tetala Euhwelu kʼElembe 18 Bible Online

Euhwelu kʼElembe 18 - tetala bible

Euhwelu kʼElembe 18

¹Elombedi wʼasi Lewi, diuhu diʼutundu diʼasi Lewi hawuyala la etenyi kuyanga ukito kame la asi Isariyele. Vo wayolekaka elambu wa nambula lu dja le Latuyalaka, ehiku andi wa sangu.

²Vo hawuyala la ukito lʼatei wʼanengewo. Latuyalaka keli etenyi kawo kʼukito uku akandawatela.[105]

³Uhiku one mbayuyalaka le elombedi uma le wudja, uma le wane watulambulaka elambu wa ngombe kana okoko. Vo wayushaka olombedi elimba ka lunya, manga la dikundju.

⁴Kanyuwushaki elonga wa diango dianyu dia tongo, ashi wʼelua, biso dianyu la diosa diʼekoko anyu diayunyuhimbulaka ntundu.

⁵Latuyalaka, Unyashungu anyu, akosonola uma lʼatei a wauhu anyu tshe, dia ndi memalaka la ntshaka ulimu lu lukumbu la Latuyalaka ndi la anʼandi pundju.

⁶Naka usi Lewi omotshi ambuya uma lʼusumba anyu omotshi wa Isariyele tshe, lene udjashindi — ndi mbeyaka etena kalangandi — uya lu dihuli diayosonola Latuyalaka.

⁷Ku ndi mbeyaka ntsha ulimu lu lukumbu la Latuyalaka, uku atutshaka anangu tshe asi Lewi, watemalaka dia ntsha ulimu la ntundu ka Latuyalaka.

⁸Ndi kalungulaki luhina landi pupu uku atulungulaka anangu, ladiku dia etenyi katundulungulaka kʼuma lʼesundjelu ka diango dia sangu.

⁹Lamʼayunyukuma lu kete yambunyusha Latuyalaka, Unyashungu aye, tanyukuyaki akambu a wononyi wa wedja ako.

¹⁰Untu latshumba onʼandi la pami kana la umuntu lu dja, tatanemaki lʼatei anyu, kana usaki a diwulu, umvutshi wʼakambu wahatayi, kana kanga aloho,[106] kuyanga kanga doka,[107]

¹¹kanga asende, kana one latoteketshaka djimu, kanga asumbu kuyanga oloki.[108]

¹²Ne dia untu latutshaka akambu aso eko wononyi le Latuyalaka. Uma lu akambu ane wa wononyi, mbambutshanya Latuyalaka, Unyashungu anyu, wedja ene uma la ntundu kanyu.

¹³Kanyuyalaki aha la unungu la ntundu ka Latuyalaka, Unyashungu anyu.[109]

¹⁴Wedja ene watanyatshanya watukelaka amenyi wʼakambu wahatayi la asaki wʼawulu. Keli le nyu, Latuyalaka, Unyashungu anyu, hetawo nyu ntsha osoku.

¹⁵Latuyalaka, Unyashungu anyu, ayunyutundjiya umvutshi uma lʼatei w anengenyu uku dimi — kanyuwukelaki —[110]

¹⁶nyu nyakalombe Latuyalaka, Unyashungu anyu, lu Horeba, lu lushi lusanganya nyati: Tatukaki diui dia Latuyalaka, Unyashungu asu ntu, kuyanga mena dja ya wuki nye, tutukuvo.

¹⁷Ku Latuyalaka, akamvuteia ati: Diui diʼololo mbatawo.

¹⁸Dimi layatundjiya umvutshi uma lʼatei wʼanengewo uku we. Dimi layudjaka aui ami lʼunyo andi, ku ndi ayuwatelaka aui tshe wayumuwutelaka.

¹⁹Untu tshe lahulunga aui ami wayunduta lu lukumbu lami, dime layusambula akambu andi uku aui ako.[111]

²⁰Keli umvutshi layutaka aui utata lu lukumbu lami, wakimi kumbutela, kana layuta aui wa ditemolatemola, avudiakema.

²¹Naka nyu nvayuta lʼetema anyu nyati: Ukundi ayutulimbetela diui diahatshi Latuyalaka? —

²²lamʼayuta umvutshi diui lu lukumbu la Latuyalaka, naka dikambu so hadiuyi, ndu hadiuyadi mete, keti Latuyalaka kudita. Umvutshi ako ambuta utata. Tanyuwukaki woma.