Read tetala Euhwelu kʼElembe 19 Bible Online

Euhwelu kʼElembe 19 - tetala bible

Euhwelu kʼElembe 19

¹Lamʼayudiaka, Latuyalaka, Unyashungu anyu, wedja wudjashi lu kete yambundunyusha, ndu lamʼayunyuwatshanya dia nyu mbidjase lu esumba awo ndu lu mvudu yawo,

²kanyuyatweli esumba esatu[112] lʼatei a kete yanyu yambunyusha Latuyalaka, Unyashungu anyu, sangu.

³Kanyate esese, kanyukahanya kete yambunyusha Latuyalaka, Unyashungu anyu, sangu lu beke satu, yukuki undjakanyi tshe ndawo utsha leko.

⁴Olembe one wayuyala le undjakanyi layulawo leko dia nshimbela lumu landi lamʼayundudiaka unyandi lakindi kunkanela dia mbudiaka ndu lakindi kumpetsha ntundu —

⁵uku untu ambutsho la unyandi lʼukungu la ntuhimbula etamba, lamʼakotandi utamba, ku kenge yambungo uma lu wenyi, yambuhumuya unyandi, ku unyandi ambuvo; untu ako mbeyaka ndawo lʼusumba omotshi lʼesumba ako dia nshimbela lumu landi.

⁶Osomboyishi a dikila mbeyaka mbuyela lamʼendi la kele. Ku naka mbuka keko utali, ndi mbeyaka mbunda la mbudiaka lamʼahandakuki mvo, ne dia ndi kumbuhetshaka ntundu.

⁷Diako mbamumunyutela nti: Nyuyatweli esumba esatu.

⁸Naka Latuyalaka, Unyashungu anyu, ayosemiya ulelu anyu uku akandatshibela washenyu dia nyusha kete yakandalaki dia mbisha washenyu,

⁹naka nyu nyaym itanyia elembe ene tshe wamumunyudjela elo, dia mbatsha; dia nyu mbuka Latuyalaka, Unyashungu anyu, ngandji la nkendakenda lu mbuka yandi nshi tshe; nyu nyayahe esumba esatu ekina ladiku dia ene esatu;

¹⁰ne dia dikila diaha la unungu diatukutshulo lu kete yanyu yambunyusha Latuyalaka, Unyashungu anyu, sangu ne dia nyu nyutukuyala la unungu wa ndjaka untu udiakadiaka.

¹¹Keli naka untu omotshi latuhetshaka unyandi ambuhulamela, ambunela, ambukunguswela la ambokomola, ku ndi ambuvo, ku ndi ambulawo utsha lʼusumba omotshi lʼatei wʼesumba ene,

¹²dihangamendi dia usumba andi kawutumi antu dia ntuwunda, kawukimo lʼanya wa osomboyishi a dikila dia ndi mvo.

¹³Tanyuwendaki la dundji diʼoketshi, keli kanyunya one lambutshula dikila diaha la unungu lʼatei wa Isariyele, ku nyu nyayuyala la ongenongeno.

¹⁴Tanyosekolaki elelu wa lʼasanyu la anyanyu[113] wakatadji washenyu lu kete yambunyusha Latuyalaka, Unyashungu anyu.

¹⁵Diui diʼomenyi otoi hadiukuki nshikike dikambu dia untu lakatshi unungu kana munga, paka aui wʼemenyi ehendi kana esatu mbukuki nshikike dikambu.[114]

¹⁶Lamʼayemala omenyi a kashi dia mpindela untu unungu,

¹⁷antu ako ahendi wama kawemali la ntundu ka Latuyalaka, kʼelombedi la kʼembadi wa lu nshi ku.

¹⁸Embadi wayokonya dikambu ololo. Naka omenyi eli kanga kashi la ndi ambumamanyia unyandi,

¹⁹kanyutsheli uku akandalangi ntshela unyandi. Osoku mbayunyunya kolo uma lʼatei anyu.

²⁰Ku akina wayuka dikambu so, wayuka woma, ku hawutshi wuhu one wa kolo lʼatei anyu ntu.

²¹Tanyuwendaki la dundji diʼoketshi. Kawosomboya lumu lu lumu, su lu su, nu lu nu,[115] lunya lu lunya, ndu lukulu lu lukulu.