Read tetala Euhwelu kʼElembe 20 Bible Online

Euhwelu kʼElembe 20 - tetala bible

Euhwelu kʼElembe 20

¹Lamʼayunyutshokaka dia ntolo lʼatunyi anyu ta, nyu nkenaka falasa, pusupusu la antu wunyuleki efula, tanyaukaki woma ne dia Latuyalaka, Unyashungu anyu, lakanyutundja uma lu kete ya Edjibitu, eko kame la nyu.

²Lamʼayunyusukana lu ta, olombedi asukani dia ndakanya antu.

³Kawateli ati: Isariyele li, nyuhukami, nyu nyuyanga ndo lʼatunyi anyu ta. Tanyateki asulu, tanyukaki woma, tanyudndimaki, tanyusakaki lukumba la ntundu kawo.

⁴Latuyalaka, Unyashungu anyu, atutshokaka kame la nyu dia nyolwela la atunyi anyu, dia nyusha elembielo.

⁵Elombodi wayumbula antu vati: Untu akona akahiki luudu lʼuyuyu, ku ndi kulukidia? Ndi akaluli lu luudu landi, ndi atukutuvo lu ta, ku ukina ndjukndia luudu lako.

⁶Untu akona akune ekodi wʼelua lʼekambo kandi, ku ndi atali elua uma loko? Ndi akaluli lakandi, atukutuvo lu ta, ku ukina ntosa ekambo kako.

⁷Untu akona akambela wadi, ku ndi atawutshuki? Ndi akaluli lakandi, atukutuvo lu ta, ku ukina ndjutshuka.

⁸Elombodi wayumbula antu ntu vati: Akona eli kanga woma ndu ohodu? Ndi akaluli lakandi, anangu watukuyala ehodu uku ndi.

⁹Lamʼayushndiya elombodi nsawula la antu, vo kawosonole ewandji wa tombo ta ta, kawakitsha ladiku dia wudja.

¹⁰Lamʼayunyusukana lʼusumba dia ndo la wo ta, kanyuwateli lulangu lanyu, dia vo nyotwela la ki.

¹¹Okone naka asi usumba ako wambetawo nyotwela la ki, ku antu tshe weli loko wayunyulambula elambu, wayunyukambela ulimu.

¹²Keli naka vo hawetawo nyotwela la ki, ku vo nangaka ndo la nyu, kanyudingi usumba ako kwi.

¹³Lamʼayukimo Latuyalaka, Unyashungu anyu, lu anya anyu, kanyudiaki usika pami tshe la yombo.

¹⁴Kanyumbi usumba ako: amantu, ana, dungalunga, la diango tshe dieli loko. Kanyolekaki diango dia dimbu diʼatunyi anyu wambunyukimwela Latuyalaka, Unyashungu anyu.

¹⁵Osoku mbayunyutshela esumba weli etali uma le nyu, waha esumba wa lu wedja ene.

¹⁶Keli lʼatei wʼesumba wʼakanga a kete nye yakanyusha Latuyalaka, Unyashungu anyu, ukito, tanyutshikaki nduku engo katohengaka la lumu.

¹⁷Kanyushili wedja ene ushiki: asi Hiti, asi Amora, asi Kanana, asi Perizi, asi Hiwi, la asi Jebuse, uku akanyudjangela Latuyalaka, Unyashungu anyu,

¹⁸ne dia vo watukunyetsha dia mbukuya ditshelu tshe dia wononyi diatuwutshelaka ditemolatemola diawo, nyu nyutukutshela Latuyalaka, Unyashungu anyu, kolo.

¹⁹Lamʼayunyudinga usumba kwi edja dia mbolembia, tanyokotaki etamba awo, ne dia nyu nyayolekaka elua awo, tanyekotaki. Undi, etamba mbeli antu dia nyu mbedinga?

²⁰Kanyulanya ndu kanyunyukuli paka etamba weyanyu nyati: Vo hawoto elua wa nde. Kanyukeli usumba walo la nyu ta etamba ako lu lungeli, edja ndu vo wambolemba.