Read tetala Euhwelu kʼElembe 21 Bible Online

Euhwelu kʼElembe 21 - tetala bible

Euhwelu kʼElembe 21

¹Naka wayutana udu wʼuntu lakawadiaki lʼusui lu kete yambunyusha Latuyalaka, Unyashungu anyu, sangu, ku haweyi one lakudiaki,

²dihangamendi la embadi kawutediki tshalula uma la le udu edja ndu esumba weli lʼutshimba.

³Dihangamendi diʼusumba wuleki nsukana la dihuli dieli udu, kawose osongo a ngombe a wadi wahatakambi ulimu ndu wahatakelekama lokoho.

⁴Dihangamendi diʼusumba ako kawuhulo la osongo a ngombe a wadi utsha lʼukndi wa kyoko, kawuwokole kingu lʼukidi ako waha lʼekambo.

⁵Elombedi, ana apami wa Lewi, kawusukani ne dia Latuyalaka, Unyashungu anyu, akasonola dia mbukambela ulimu la dia ntshokola antu lu lukumbu la ndi. Vo mbeli la wulu wa nsambula akambu wa tamu, ndu akambu wʼehumwelu.

⁶Dihangamendi tshe dia lʼusumba ako wuleki nsukana la dihuli dieli udu, kawotsha anya awo ladiku dia osongo a ngombe a wadi wakawokodi kingu lʼukndi.

⁷Ku vo wayuta kame vati: Anya asu kuntshulula dikila, ndu ashu asu komena dikambu diako.

⁸Latuyalaka li, udimanyia wudja aye wa Isariyele wakayashimbela. Tukitshiyaki wudja aye Isariyele dikila diaha la unungu. Ku vo wayudimanyiama unungu wa dikila diako.

⁹Osoku mbayunyunya dikila diaha la unungu uma lʼatei anyu lamʼayunyutsha akambu wʼusimbwi lu ashu wa Latuyalaka.

¹⁰Lamʼayunyutsho la ntolo lʼatunyi anyu ta, ku Latuyalaka, Unyashungu anyu, ambakimo lu anya anyu, la nyu nyambatola lu fumbi;

¹¹naka omotshi lʼatei anyu ambena umuntu omotshi la dimena lʼatei a fumbi, ku ndi ambokomiya dia mbosa wadi,

¹²ndi katshu la umuntu ako lu luudu landi. Umuntu ako kanya divu, kanya kala,

¹³kakululi eloto wa fumbi, katshikali lu luudu landi. Kaleli shi la nyangu ngondo otoi. Lʼokongo diku kaweyani, kawuyali wadi la umi.

¹⁴Keli naka ndi hayongenangena, kukimo dia ndi ntsho lene alangandi, keli tusundjaki lusundia Tutshelaki uku fumbi, ne dia ndi ambusuwula.

¹⁵Naka pami kemotshi eko la wadi ahendi, ku ndi nangaka omotshi, ku halangi ukina. Ku vo ahendi wambuta la ndi ana. Naka one lahandalangi ambuta la ndi ona lʼenundu;

¹⁶ku lushi layundukahanya diango le anʼandi wʼapami, ndi takitshaki ona wadendi lalangandi lu dihuli dia ona lʼenundu lakuti wadendi lahandalangi.

¹⁷Dieli la ndi dia nemia onʼandi lʼenundu lakuti wadendi lahandalangi, kawusha diango tena pendi, ne dia ndi keli etatelu ka wulu andi. Luwandji lʼona enundu leli landi.

¹⁸Naka untu omotshi eko la ona pami leli la ote wulu ndu uhedia, lahuki diui dia shi la nyangu, kuyanga vo kokomolaka, ndi hakitanyia.

¹⁹Shi la nyangu kawuwundi, kawutshu la ndi le dihangamendi dia lʼusumba, lʼeotwelo ka lu leke ludjashindi lʼusumba.

²⁰Kawuteli dihangamendi diʼusumba awo vati: Onʼasu one eko la ote wulu, kanga uhedia, huki aui asu. Ndi eli kanga ndeshi ndu umbidjoki.

²¹Dihangamendi tshe diʼusumba andi, kawuwuki ave; ndi kavu. Osoku mbayunyunya kolo uma lʼatei anyu. Asi Isariyele wayuka dikambu so, ku vo wayuka woma.

²²Naka wayudiaka untu lakatshi kolo kukukindi ndjakema, ndu nyu nyambuhane lʼutamba,

²³udu andi tawutshikalaki utshu tshe lʼutamba. Kanyukhunde lushi lako, ne dia one lahanema eli engo ka mananu le Unyashungu.[116] Tanyusanyaki kete yakanyusha Latuyalaka, Unyashungu anyu, ukito.