Read tetala Euhwelu kʼElembe 22 Bible Online

Euhwelu kʼElembe 22 - tetala bible

Euhwelu kʼElembe 22

¹Naka we ambena ngombe kana okoko wa unyaye watalawo, tunyaki ashu uma le wo. Kukaluya le unyaye.

²Keli naka unyaye kema lasuki la ye, kana we haweyi, kotole elungalunga lakaye, kutshikali la to edja ndu unyaye ambukiyanga, ku we ayuwushato.

³Kutshi pupu la punda ndu la dihondo diandi. Kutshi pupu la engo tshe kayushisha unyaye, ku we ambutukitongona; tunyaki ashu uma leko.

⁴Lamʼayuyena punda kana ngombe ka unyaye amboko lu mbuka, tunyaki ashu uma le to, kukimanyia dia mbunyiato ntu.[117]

⁵Umuntu talotaki engo katolotaka pami, kana pami dihondo dia umuntu; ne dia one tshe latutshaka akambu ane, eli wononyi le Latuyalaka, Unyashungu anyu.

⁶Naka we ayutana kefu ka fudu lu mbuka, lʼutamba kana lu kete, keko la ekeli kana tana, kana ku unyangu udami ekeli kana udjashi la tana, tundaki nyengewo kame la tana,

⁷kose tana tutu, kukimo unyangu. Ku we ayuyala la ongenongeno, la nshi yaye yayuyala efula.

⁸Lamʼayuyuhika luudu lʼuyuyu, kudingi lukumbu lʼutshimba wʼote alo, dia nshimba etshulwelu ka dikila lamʼayuyanga untu omotshi nko uma leko.

⁹Tuneki wehu ehendi a wuhu kame lu ekambo kaye kʼelua, ne dia dinela dia wuhu wakayuni la diela diʼelua watukosama tshe lu etemwelo.

¹⁰Tukelekaki ngombe la punda kame dia mbakambia ulimu.

¹¹Tolotaki dihondo dia wehu wehu, dia diosa diʼokoko la linene kame.[118]

¹²Kudjaki tufufo lu atshuku anei wa dihondo diayuyolotaka.[119]

¹³Naka pami kemotshi ambutshuka wadi, ku ambuyoseka lʼokongo a mbeyana la ndi, la ambuwutsha sonyi,

¹⁴ndu ambulanya lukumu landi ati: Lakatshuki umuntu one, ku lamʼakameyana la ndi, lakutani ambeyanaka lʼapami.

¹⁵Ku shi la nyangu a usekaseka a umuntu uku, kawela tulimbetelu ta emuma kandi uya lʼeotwelo ka usumba. Kawenya dihangamendi vati: Onʼasu kumbeyana la pami.

¹⁶Shi usekaseka a umuntu kateli dihangamendi ati: Laketawo dia pami kene ntshukana la onʼami, ku ndi ambuyoseka.

¹⁷Ndi ambuwutsha sonyi, ati: Dimi lakatani onʼaye ambeyanaka lʼapami. Nyendi, onʼeli tulimbitelu tatenya ati: Ndi kuteyanyi la pami. Ku vo wayombola dihondo diandi la ntundu ka dihangamendi diʼusumba.

¹⁸Dihangamendi kawundi pami kako, kawusuya.

¹⁹Kawufutsha kibau ka shekele lukama ya fesa, kawusha shi usekaseka a umuntu, ne dia ndi akalanya lukumu la ona umuntu, a Isariyele laki kumbeyana la pami. Ndi ayuyala wadendi. Ndi tosekaki pundju.

²⁰Keli naka dikambu dieko mete, usekaseka a umuntu akateyanyi la pami,

²¹kawutundja usekaseka ako uya la suku dia luudu la shi, asi usumba kawuwuki ave, kawudiaki, ne dia ndi akatshi dikambu dia kolo lu Isariyele, dia munana eki lu luudu la shi. Osoku mbayunyunya kolo uma lʼatei anyu.

²²Naka wayunda pami etami la umuntu lutshukami, kawadiaki vo ahendi, ndu pami ndu umuntu. Osoku mbayunyunya kolo uma lu Isariyele.

²³Naka usekaseka a umuntu lahateyana la pami ambambema le pami, ku pami kemotshi ambuhumana la ndi lʼusumba, ambeyanp la ndi,

²⁴kanyutshu la wo, vo ahendi lʼeotwelo kʼusumba ako, kanyuwauki ave, kanyadiaki. Usekaseka a umuntu, ne dia ndi nkumvuda kuku lʼusumba, la pami, ne dia ndi akeyana la wadi unyandi la wulu. Osoku mbayunyunya kolo uma lʼatei anyu.

²⁵Keli naka pami kemotshi ayuhumana la usekaseka a umuntu lʼusui lakawambela, ku ndi ambuwunda, ambeyana la ndi la wulu, kawudiaki paka pami keku.

²⁶Keli tanyutshelaki usekaseka a umuntu dikambu, ne dia ndi kema la unungu wukukindi ndjakema. Dikambu ne diambufana uku pami kemotshi kambumamela unyandi, ku ambudiaka.

²⁷Lamʼakandahumana la usekaseka a umuntu lʼusui, ndi akadi tukuku, ku nduku untu akiko dia mbushimbela.

²⁸Naka pami ayuhumana la usekaseka a umuntu lahateyana la pami, ndu lahawatambela, ku ambuwunda, ambeyana la ndi, ku wambuwanda;

²⁹ku pami kambeyana la ndi ayusha shi umuntu shekele akumi atanu ya fesa, ku ndi ayuwosa wadi, ne dia ndi akeyana la ndi la wulu. Ndi tosekaki pundju.[120]

³⁰Pami tatshukaki wadi a shi, kuyanga munana la ndi.[121]