Read tetala Euhwelu kʼElembe 23 Bible Online

Euhwelu kʼElembe 23 - tetala bible

Euhwelu kʼElembe 23

¹Nduku untu leli la edika wa khundju wakaminwama kuyanga olenga ayotoka lu lusanganya la Latuyalaka.

²Ona lakuto lu luseka, totoki lu lusanganya la Latuyalaka, edja ndu lu lolonga la dikumi, tawotoki lu lusanganya la Latuyalaka.

³Usi Amona kana usi Moaba, totoki lu lusanganya la Latuyalaka. Vo tshe tawotoki pundju lu lusanganya la Latuyalaka, edja ndu lolonga la dikumi,

⁴ne dia vo kunyulungula lʼashi la ma lu mbuka lamʼakanyatumbi uma lʼEdjibitu. Ntu vo wakafuti Balama, onʼa Beore, usi Petore ka la Mesopotamiya, dia ndi nyudja mananu.[122]

⁵Keli Latuyalaka, Unvashungu anyu, kumbukela Balama. Ndi akakadimula mananu otshoko le nyu,[123] ne dia Latuyalaka, Unyashungu anyu, atunyukaka ngandji.[124]

⁶Tanyuyangaki ki kawo kuyanga ukundji pundju.

⁷Tanyenaki usi Edome wononyi, ne dia onengenyu kendi. Tanyenaki usi Edjibitu wononyi, ne dia nyu nyaki angendangenda lu kete yawo.

⁸Tukanula tawo tayuto lu lolonga la satu, kawotoki lu lusanganya la Latuyalaka.

⁹Lamʼayunyuhanga dia ntolosha atunyi anyu ta, kanyewo akambu tshe wa kolo.

¹⁰Naka pami kemotshi lʼatei anyu kambuyala mindu uma lu dikambu diakayadi shashimuya lʼutshu, ndi katumbi uma lu pangu, takalulaki lu pangu ntu.

¹¹Keli la dikolo, ndi koke ashi. Ku lamʼayudja unya, ndi kakaluli lu pangu ntu.

¹²Kanyuyali la dihuli dia weto lʼandja a pangu, kanyutshokaki leko.

¹³Kanyembaki ekeki kame la diango dianyu dia ta, ku lamʼayanga untu no tumi, ndi kashiki ukeki, kakhunde tumi tandi,

¹⁴ne dia Latuyalaka, Unyashungu anyu, atokendakendaka lʼatei a pangu kanyu, dia nyushimbela la dia nyukimwela atunyi anyu. Okone pangu kanyu kayali pudipudi, diaha ndi mena engo ka mindu lʼatei anyu la nkadimo uma le nyu.

¹⁵Tanyukaluyaki fumbi kambulawo uya lakanyu utsha le khumendi.

¹⁶Ndi kadjase lʼatei anyu lu dihuli diayuyala ololo le ndi diayundosonola lʼusumba anyu omotshi. Tanyuwengiyaki.

¹⁷Umuntu kanga luseka tayalaki lʼatei wʼana amantu wa Isariyele,[125] kuyanga pami kanga luseka lʼatei wʼana apami wa Isariyele.

¹⁸Tanyelaki tshindu dia umuntu kanga munanyi, diʼuma lu luseka landi, kuyanga ekundjelu ka pami kanga munanyi, kʼuma lu luseka landi, uya lu luudu la Latuyalaka, Unyashungu anyu, dia nshidiya nfuta daka dimotshi. Akambu ane ahendi weli wononyi le Latuyalaka, Unyashungu anyu.

¹⁹Tanyosondjaki anyanyu diango la elungamelu ka nungula waho: waho wa falanga, wa mbu ya nde, wa engo tshe kambosondjama la elungamelu ka waho.

²⁰Nyu mbeyaka mbosa waho uma le angendangenda. Keli tanyosaki waho umale anyanyu,[126] mbayunyutshokola Latuyalaka, Unyashungu anyu, lu akambu tshe wayunyutshuka, lu kete yatanyatshu dia ntukita.

²¹Lamʼayunyutshika daka le Latuyalaka, Unyashungu anyu, tanyutshimbatshimbaki dia dishndiya.[127] Mete, Latuyalaka, Unyashungu anyu, ayunyolombadio. Naka nyayutshimbatshimba, nyayuyahela kolo.

²²Naka nyayuyakimela, diaha ntshika daka, dikambu so hayala kolo le nyu.

²³Kanyulamaki ndu kanyushndiyaki aui wayutumba uma lʼenyo anyu, ndu eshasha a lulangu pupu uku akanyatshiki daka le Latuyalaka, Unyashungu anyu, wakanyalaki lʼenyo anyu.

²⁴Lamʼayuyoto lu ekambo kʼelua ka unyaye, we mbeyaka nde elua uku alangaye, edja ndu we ambuluta, keli totolaki nduku otoi.

²⁵Lamʼayuyoto lu ekambo kʼasami ka unyaye, we mbeyaka muna nanula la anya, keli tunaki asami wa unyaye la lukuwa.