Read tetala Euhwelu kʼElembe 25 Bible Online

Euhwelu kʼElembe 25 - tetala bible

Euhwelu kʼElembe 25

¹Naka antu wambama, wambutsho lʼelumbwelu, embadi kawalumbuya, kawuyindja untu laha la munga, kawusha one leli la munga unungu.

²Naka untu leli la munga ambukuka nkomwama fimbo, umbadi kawetamia lu kete, kawokomole efula ka fimbo yedimi la kolo kandi la ntundu kʼumbadi.

³Vo mbeyaka mbokomola fimbo pulu ndu akumi anei, keli aha ladiku.[137] Onanyo takomwamaki uleki yediko nye, ndi atukuyala engo kaha la nemo lu ashu aye.

⁴Lamʼakamakamela ngombe epunga dia mbesusula, tukidihaki unyo.[138]

⁵Naka anangu wudjashi kame, ku omotshi ambuvo lamʼahandatuti ona pami, wadi aki udu tatshukamaki le untu kʼuntu, keli onangu umendi kawose wadi, kakitani la ndi.

⁶Ona pami lʼenundu layuta umuntu ako, kakiti dihuli diʼonangu shi lakavu, lukumbu landi latukushisho lu Isariyele.[139]

⁷Naka pami kako hetawo nkitana la wadi aki onangu, ku wadi aki onangu katshu lʼeotwelo kʼusumba le dihangamendi. Katuwateli ati: Onangu umemi halangi nkitana la mi, dia mbulula lukumbu lʼonangu lu Isariyele. Ndi hetawo mbosami uku olembe wa nkitana la wadi aki onangu.

⁸Ku dihangamendi diʼusumba wayuweta, wayusawula la ndi lu dikambu so. Naka ndi ayushikike diui ati: Dimi halangi mbosa,

⁹wadi aki onangu katshu utsha le ndi la ntundu ka dihangamendi, kukululi lusabata, kawuteli soi lʼelundji. Kawuteli ati: Okone mbayuwutshelaka pami tshe kahetawo mbulula luhanga laki onangu.

¹⁰Wayetaka lukumbu la luudu landi lu Isariyele vati: Luudu lʼuntu lakawakulula lusabata.[140]

¹¹Lamʼayolo apami, ku wadi omotshi ambuya dia ndjushimbela umendi uma lʼanya wa one lalo la ndi, naka ndi ayusimbula lunya landi, ayukimela one lalo la umendi lesi a dimba;

¹²kuhimbuli lunya, tuwendaki lʼelundji kʼoketshi.

¹³Tuyalaki la wehu ehendi wa wetshu wutshikitanyi lu paya kaye: omotshi wuki, ku ukina tshitshe.

¹⁴Tuyalaki la wehu ehendi wa tediko ta mbedika diango lu luudu laye: omotshi wuki, ku ukina tshitshe.

¹⁵Uyali la wetshu wa mete, wa pupu ndu wa shikaa. Uyali la yediko ya mete, ya shikaa. Okone ku nshi yaye yayuyala efula lu kete yambukusha Latuyalaka, Unyashungu aye.

¹⁶Untu tshe latutshaka ulimu la yediko yaha shikaa, untu tshe latedikaka lu lukesu, eli wononyi le Latuyalaka, Unyashungu aye.[141]

¹⁷Kanyuhoki uku akanyutshela Amaleka lamʼakanyayayakaka uma lʼEdjibitu,

¹⁸uku akandahumana la nyu lu mbuka, ndu uku akandalembia asikanyu wakayakendakendaka okoke lʼokongo lamʼakanyalembe ndu lamʼakanyaheko lokendo. Ndi kumbuka Unyashungu woma.

¹⁹Okone lamʼayunyusha Latuyalaka, Unyashungu anyu, mumuya uma le atunyi anyu tshe wunyudingi, lu kete yambundunyusha ukito, kanyudimuli euhwelu ka Amaleka la tshina diʼulungu. Tanyuhelaki.[142]