Read tetala Euhwelu kʼElembe 26 Bible Online

Euhwelu kʼElembe 26 - tetala bible

Euhwelu kʼElembe 26

¹Lamʼayunyukuma lu kete yambunyusha Latuyalaka, Unyashungu anyu, ukito. Lamʼayunyuyikita ndu lamʼayunyudjase loko,

²kanyosaki elonga tshe wa dinela wayunyunaka. Kanyuweosaki uma lu kete yanyu yakanyusha Latuyalaka, Unyashungu anyu. Kanyuwedjaki lu asaka, kanyetolaki lu dihuli diayosonola Latuyalaka, Unyashungu anyu, dia nkitsha lukumbu landi leko.[143]

³Kanyutshoki le olombedi wa lu nshi ku, kanyutuwutelaki nyati: Tambutela Latuyalaka, Unyashungu asu, elo shati: Shu tambukuma lu kete yakatshibela Latuyalaka washesu dia ntushayo.

⁴Ku olombedi ayulungula asaka uma lʼanya anyu, ayakitsha la ntundu kʼediakelu ka Latuyalaka, Unyashungu anyu.

⁵Kanyukaluyaki aui ane la ntundu ka Latuyalaka, Unyashungu anyu, nyati: Shesu aki usi Arama, laki Iasuki la nyoi, ku ndi akatshu utsha lʼEdjibitu, akatudjase leko. Vo waki djui ya tshitshe, keli wakatuyala wudja a wuki wa wulu ndu wʼantu efula.

⁶Asi Edjibitu wakatutshelaka kolo, wakatohenyahenyaka, wakatukambiaka elimu a wulu.

⁷Ku shu takaleli le Latuyalaka, Unyashungu a washesu. Ndi akuki aui asu, akenyi asui asu, toshoko tasu, la wengiya wakawatengiyaka.

⁸Latuyalaka, akatutundja uma lʼEdjibitu la lunya la wulu ndu lʼusimbwi, kame la akambu wa woma, la tulimbitelu ndu la akambu wa mamba.

⁹Ndi akatolombola uya lu dihuli ne, ambuyutusha kete nye yuludi too la awele la usanga.

¹⁰Latuyalaka li, enda, kakiane dimi lambukela olonga uma lu kete yakayatusha! Kukitsha la ntundu ka Latuyalaka, Unyashungu aye, kotemole la ntundu ka Latuyalaka, Unyashungu aye.

¹¹Ku we ayongenangena lu diango tshe diʼololo diambukusha l atuyalaka, Unyashungu aye, we la wa lu luudu laye tshe, kame lʼasi Lewi, la angendangenda tshe wudjashi lʼatei anyu.

¹²Lamʼayunyushndiya nkimo tenyi dia dikumi uma lu dikundjelu dianyu lʼeleku ka satu, kako keli eleku katuwulambulaka tenyi dia dikumi, kanyudishaki asi Lewi, angendangenda, ana wa tshiki la wadi waki edu, dia vo ndekaka la ndutaka lʼesumba anyu.[144]

¹³Kanyutaki la ntundu ka Latuyalaka, Unyashungu anyu, nyati: Shu tambukimo diango diakakidiama uma lu mvudu yasu, tambudisha asi Lewi, angendangenda, ana wa ditshiki la wadi waki edu, uku elembe tshe wakayatudjela. Shu kumpedia kuyanga mbuhela olembe omotshi uma lʼatei wʼelembe aye.

¹⁴Shu konde nduku yango uma lu diango ne, lu nshi yasu yʼetanda. Shu kudinanda lamʼakisu mindu kuyanga dia kaha dikambu dia wane wakavu. Shu takakitanyia diui dia Latuyalaka, Unyashungu asu. Shu takatshaka uku elembe tshe wakayatudjela.

¹⁵Enda, uma lʼulungu, uma lʼedjaselu kaye kʼekila, otshokole wudja aye Isariyele la kete yakayatusha, uku akayatshibela washesu, kete yuludi to lʼawele la usanga.

¹⁶Latuyalaka, Unyashungu anyu, ambunyudjela adjangu la elembe ene elo, dia nyu mbayela la mbatsha la etema anyu tshe la nyumu yanyu tshe.

¹⁷Elo, nyu nyambetawo Latuyalaka ndjala Unyashungu anyu. Nyu nyambulaka dia nkendakenda lu mbuka yandi, la dia nama elembe andi, adjangu andi, welu andi la aui andi.

¹⁸Elo kene, Latuyalaka ambetawo dia nyu ndjala wudja andi hita[145] uku akandanyulaki dia nyu nkitanyia elembe andi tshe,

¹⁹dia nyedia lu diandu, lu lukumu, ndu lu nemo ladiku dia wedja tshe wakandatungi, ndu dia nyu ndjala wedja wʼekila le Latuyalaka, Unyashungu anyu, uku akandanyutela.