Read tetala Euhwelu kʼElembe 28 Bible Online

Euhwelu kʼElembe 28 - tetala bible

Euhwelu kʼElembe 28

¹Naka nyu nyayukitanyia diui dia Latuyalaka, Unyashungu anyu, nyayulamaka ololo dia ntsha elembe andi tshe wamumunyudjela elo, ku Latuyalaka, Unyashungu anyu, ayunyedia ladiku dia wedja wa la kete.

²Naka nyu nyayukitanyia diui dia Latuyalaka, Unyashungu anyu, etshoko ene tshe wayunyuhulwela, wayukuma le nyu.

³Nyu nyayotshokwama lʼusumba, ndu nyayotshokwama lʼusui.

⁴Ana wʼuma lʼetema anyu, elua wʼuma lu kete yanyu, tana ta dungalunga dianyu, efulanelu ka ngombe yanyu la ekoko anyu tshe wayotshokwama.

⁵Asaka anyu la kenga ya-tunyosohanyaka mbu ya nde yayotshokwama.

⁶Nyu nyayotshokwama lamʼayunyutumbaka, ndu nyu nyayotshokwama lamʼayunyotoka.

⁷Latuyalaka ayunyolembia atunyi anyu, wayunela dia ndo la nyu. Vo wayuya lu mbuka otoi, ku wayulawo la ntundu kanyu lu mbuka esambeli.

⁸Latuyalaka ayunyotshokolaka lu apenge ndu lu elimu tshe watunyutshaka. Ndi ayunyotshokolaka lu kete yambundunyusha.

⁹Latuyalaka ayunyushikike dia nyu ndjala wudja andi wʼekila, uku akandanyutshibela, naka nyu nyayulamaka elembe wa Latuyalaka, Unyashungu anyu,

¹⁰okone wedja tshe wa la kete wayena vati: Nyu nyambetama lu lukumbu la Latuyalaka, ku vo wayunyuka woma.

¹¹Latuyalaka ayunyufudia lu ongonyi, lu diwutshi, lu diutelu dia ngombe yanyu, ndu lu elua wʼuma lu dikambu dianyu, lu kete yakatshibela Latuyalaka washenyu dia nyusha.

¹²Latuyalaka anyunyudihwelaka ulungu, eumbelu kandi kʼololo, dia ndoshiya kete yanyu mvula lʼetena kayo, ndu dia ntshokola elimu tshe wayunyukambaka. Nyu nyayosondjaka wedja efula diango, keli nyu hanyuyala la uhumba wa nsomba diango.

¹³Latuyalaka ayunyete ete, aha wela; nyu nyayuyalaka paka ladiku, aha la tshina, naka nyu nyayukitanyia dia nama la ntsha elembe wa Latuyalaka Unyashungu anyu, wamumunyudjela elo;

¹⁴naka nyu hanyetola lu lunya la pami kana lu lunya la lomoso uma lʼelembe wamumunyudjela elo la ntsho latuyanga ditemolatemola dia dikambela ulimu.[159]

¹⁵Keli naka nyu hanyukitanyia diui dia Latuyalaka, Lʼnyashungu anyu, kana nama la ntsha elembe la adjangu andi tshe wamumunyudjela elo, mananu nye tshe yayunyuhulwela, yayuya le nyu.

¹⁶Mananu yayuyala lʼusumba ndu yayuyala lʼusui.

¹⁷Mananu yayuyala lu asaka ndu lu kenga yatunyosohanyaka mbu ya nde.

¹⁸Mananu yayuyala le anʼanyu, le elua wʼuma lu dikambo dianyu, le efulanelu ka ngombe yanyu la ekoko anyu.

¹⁹Mananu yayuyalaka le nyu ndu lamʼayunyotoka, ndu kayuyalaka le nyu lamʼayunyutumbaka.

²⁰Latuyalaka ayunyutumela mananu, ufutanu ndu lukulu lʼengeno lu akambu tshe wayunyushak, edja ndu lamʼayunyulanyema la nshila shashimuya dikambu dia etsha anyu wa kolo, ne dia nyu nyambonseka.

²¹Latuyalaka ayunyumamanya la asui, edja ndu lamʼayunyushila lu kete yatanyatshu dia ntukita.

²²Latuyalaka ayunyusuyaka la diondjelo, dimba dja, adada, luhaladi la owo a wulu, elungwelu ka tumbatumba la ukandu. Vo wayunyohenyahenyaka edja ndu lamʼayunyulanyema.

²³Ulungu weli ladiku diʼete anyu ayuyala ohotela, ku kete yeli la tshina dianyu yayuyala luwulu.

²⁴Latuyalaka ayunyoloshiya efushi la ditshu lu dihuli dia mvula. Vo wayoloka uma lʼulungu, edja ndu nyambulanyema.

²⁵Latuyalaka ayukimanyia atunyi anyu dia vo nyolembia. Nyu nyayutsho lu mbuka otoi dia ntalosha, ku nyu nyayalawo lu mbuka esambeli. Nyu nyayutasekasekamaka lʼatei a waulelu tshe wa la kete.

²⁶Edu anyu wayuyala ma dia fudu tshe ya lʼulungu, ndu dia nyama ya la kete. Nduku untu laj uyitshanya.

²⁷Latuyalaka ayunyusuya la adada wa lʼEdjibitu, mbudiusui, puti, la ahaka wahanyeyi nkono.

²⁸Latuyalaka ayunyudjuya aladi, ayunyete tutshungu, ayunyukia tumba tshimba.

²⁹Nyu nyayamamba unya lʼatei ote, uku atamambaka kana tshungu lu udjima. Nyu hanyuhumo lukulu lʼolo lʼelimu anyu. Vo wayunyengiyaka, wayuvaka diango dianyu nshi tshe, ku nduku until lanyamela.

³⁰Nyu nyayambela wadi, ku apami akina wayeyana la wo. Nyu nyayuhika mvudu, ku hanyudjase loko. Nyu nyayune ekodi w elua lu dikambo, ku hanyole elua uma loko.

³¹Ngombe yanyu yayudiakema la ntundu kanyu, ku nyu hanyuyile. Punda yanyu yayosama la ntundu kanyu, ku hawunyukaluyayo. Ekoko anyu wayukimwama le atunyi anyu, ku nduku untu layunyoteketela.

³²Anʼanyu wʼapami la anʼanyu wʼamantu wayukimwama le wudja ukina, nyu nyayena dikambu diako, ku ashu anyu wayulingalingaka la lushi la lushi lu dikambu diawo, keli anya anyu hawuyala la wulu.

³³Wedja wahanyeyi wayole elua wa kete yanyu la waho tshe wʼulimu anyu. Nyu nyayohenyahenyamaka, nyayohotshahotshamaka tena tshe.

³⁴Akambu watunyenaka wayunyudjuya aladi.

³⁵Latuyalaka ayunyusuya la adada wa wulu waheyi nkono, lu adui ndu lʼekulu, umakʼesi akaka anyu pulu ndu ladiku dia ete anyu.

³⁶Latuyalaka ayunyotola, nyu la khumʼekanga kanyu, utsha lu wudja wahanyeyi, ndu waki washenyu kumbeya. Ku nyu nyayutotemola ditemolatemola, diʼetamba ndu diʼave leko.

³⁷Nyu nyayuyala engo ka nyetete le antu, engo ka yukedi ndu engo ka tola lʼatei a wedja tshe wayunyolombola Latuyalaka.

³⁸Nyu nyayotola wehu efula wa ntune lu dikambo, keli nyayuna paka yema tshitshe, ne dia endjo wayumana tshe.

³⁹Nyu nyayune ekodi wʼelua lu dikambo, nyayelongosolaka, keli hanyumba elua uma loko, kuyanga no ashi awo wʼelua, ne dia kusu yayele.

⁴⁰Nyu nyayuyala la etamba wa mbeli lu dikambo dianyu tshe, keli hanyushinula iso ka mbeli yawo, ne dia wayololololo ntundu watatshundi.

⁴¹Nyu nyayuta ana apami la ana amantu, keli vo hawuyala wanyu, ne dia wayotolama lu fumbi.

⁴²Endjo wayole etamba anyu la diango diʼuma lu dikambo dianyu tshe.

⁴³Angendangenda weli lʼatei anyu wayutabiyamaka ladiku dianyu, ku nyu nyayutakitshakitshamaka.

⁴⁴Vo wayunyosondja, keli nyu hanyuwasondja. Vo wayuyala ote, keli nyu nyayuyala wela.

⁴⁵Mananu nye tshe yayunyuhulwela, yayunyuyela, yayuyala ladiku dianyu, edja ndu nyambulanyema ne dia nyu kunanga aui wa Latuyalaka, Unyashungu anyu, dia nkitanyia elembe andi ndu adjangu andi wakandanyudjangela.

⁴⁶Mananu yako yayuyalaka uku tulimbitelu lʼakambu wa mamba le nyu, ndu le tukanula tanyu pundju.

⁴⁷Ne dia nyu kunkambela Latuyalaka, Unyashungu anyu, ulimu lʼongenongeno ndu lʼutema tshe lamʼakinyu la etshoko efula,

⁴⁸diako mbayunyutukambela atunyi wayunyutumela Latuyalaka ulimu lamʼenyu la ndjala, la pusa kʼashi, la utakataka, ndu la ehumba wa diango tshe. Ndi ayunyukeleka koho ya mbulu, edja ndu ndi ambunyushila.

⁴⁹Latuyalaka ayunyutumela wudja omotshi wʼetali uma la kuma ka kete. Vo wayuya esadi uku fudu ka pungu, wudja weli la oteketa wahanyuki.

⁵⁰Wudja weli la dundji dia ngala, wahalemia usumbi, kuyanga mbuka ona ketshi.

⁵¹Vo wayumana tana tanyu ta dungalunga la mbu ya nde ya lu dikambo dianyu, edja ndu nyu nyambulanyema. Vo hawunyutshikela epunga, wanu wʼeyuyu, biso, tana ta ngombe kuyanga tana tʼekoko, edja ndu vo wambunyushila ushiki.

⁵²Vo wayunyudinga kwi lu esumba anyu tshe, edja ndu peli dianyu diʼetali ndu dia wulu diakanyekamaka, diambunyuko lu kete yanyu tshe. Vo wayudinga kwi lu esumba anyu tshe wa lu kete yakanyusha Latuyalaka, Unyashungu anyu.

⁵³Lamʼayunyudinga atunyi anyu, nyayuyala la asui la ohenyohenyo, nyayole emunyi wa anʼanyu wʼapami la wa anʼanyu wʼamantu wakanyusha Latuyalaka, Unyashungu anyu.

⁵⁴Pami kʼololo kahatukeketshaka utema lʼatei anyu, ayuyala kanga unyishi le onangu, le wadendi lalangandi ndu le anʼandi wutshikadi.

⁵⁵Ndi hasha nduku otoi lʼatei awo umunyi wa anʼandi walendi, ne dia nduku engo kambutshikala la ndi uma lʼohenyohenyo la asui, ne dia atunyi anyu wunyudingi lu esumba anyu tshe.

⁵⁶Umuntu lʼololo lahatukeketshaka utema lʼatei anyu, lahatukindjikiyaka kindu, ayuyala kanga unyishi le umendi lalangandi, le onʼandi la pami ndu le onʼandi la umuntu.

⁵⁷Ndi ayole wetshi[160] watutoka la ona ndu onʼandi la tshitshe lu usheshe, ne dia uhumba wa ma, ne dia ohenyohenyo la asui wʼatunyi anyu wunyudingi lu esumba anyu.

⁵⁸Naka nyu hanyulami ndu hanyutshi aui tshe wʼolembe one wufundami lu buku ne, ndu naka nyu hanyuki lukumbu la lutumbu ndu la mamba la Latuyalaka, Unyashungu anyu, woma,

⁵⁹ndi ayunyusuya, nyu la tukanula tanyu, la asui wa mamba, ee, asui wa wulu wahashili esadi, la kandji ya wulu, yahakono esadi.

⁶⁰Ndi ayunyukia ndu dandulandu tshe dia lʼEdjibitu, diakanyukaka woma; dio diayunyukimela wulu.

⁶¹Wehu tshe wa kandji ndu wʼasui wahafundami lu buku ne diʼolembe, mbayunyukia Latuyalaka, edja ndu nyu nyambulanyema.

⁶²Kuyanga nyu nyaki efula uku toto ta lʼulungu, nyu nyayutshikala djui ya tshitshe, ne dia nyu kunkitanyia diui dia Latuyalaka, Unyashungu anyu.

⁶³Uku akangenangena Latuyalaka dia nyutshela ololo la nyufudia, mbayongenangena Latuyalaka dia nyulanya la nyushila. Nyu nyayunyema uma lu kete yatanyatshu la ntukita.

⁶⁴Latuyalaka ayunyuhandjula lʼatei a wedja tshe, uma la kuma kemotshi ka kete pulu ndu la kuma kekina. Nyu nyayutatemolaka ditemolatemola diʼetamba la diʼave diahanyeyi, ndu diaki washenyu kumbeya.

⁶⁵Nyu hanyenaki olo lʼatei a wedja ene, ekulu anyu hawuyalaki la mumuya. Latuyalaka ayunyusha etema wʼehenyohenyo, ashu wʼuiingulingu la etema wʼekiyanu.

⁶⁶Nyumu yanyu yayuyalaka la ukananu: nyayukaka woma ndu la yanyi ndu lʼutshu, asulu anyu wayuyalaka ladiku atu.

⁶⁷Uma lu woma wayunyuka lʼetema anyu ndu lu akambu wayunyena lʼashu anyu, mbayunyukumbula la pindju nyati: Utunduyala, ayali dikolo li! Ndu la dikolo nyati: Utunduyala, ayali pindju li!

⁶⁸Latuyalaka ayunyukaluya ntu lʼEdjibitu lu mashua, lu mbuka, kakamanyutelaka nti: Hanyuyukiena ntu! Nyu nyayulanga ndjasundja le atunyi anyu, dia ndjala fumbi yʼapami la fumbi yʼamantu keli nduku untu ayunyusumba.