Read tetala Euhwelu kʼElembe 29 Bible Online

Euhwelu kʼElembe 29 - tetala bible

Euhwelu kʼElembe 29

¹Onʼeli aui wa sheki yakadjangela Latuyalaka Mose, dia mbidja lʼasi Isariyele ladiku dia sheki yakandatadji la wo la Horeba.

²Mose aketi asi Isariyele tshe, akawatela ati: Nyu nyakenyi akambu tshe wakatshela Latuyalaka Farayo, ekambi andi la kete yandi tshe ya Edjibitu lu ashu anyu.

³Ashu anyu wakenyi ahimbelu wa mamba, tulimbitelu la akambu aku wa mamba.

⁴Keli edja ndu elo, Latuyalaka atanyusha etema wa mana fundu, ashu wa mena, la atui wa mbuka.

⁵Dimi lakanyolombola lʼusui deku akumi anei; ahondo anyu kundjala emusu, ndu sabata ya lʼekulu anyu kunana.

⁶Lu nshi sho, nyu konde mampa, kono wanu kuyanga dinono dia wulu, dia nyu mbeya nyati: Dimi keli Latuyalaka, Unyashungu anyu.

⁷Lamʼakanyakumi lu dihuli ne, Sihona, khumʼekanga ka Heshibona,[161] la Onga, khumʼekanga ka Bashana,[162] wakayi dia ndjutolosha, keli shu takalembia.

⁸Shu takahotola kete yawo, takayisha asi Rubena, asi Ngada la etenyi ka hendi kʼasi Manase ukito.[163]

⁹Okone nyukitanyia aui wa sheki nye la mbatsha, mbayunyuhumo lukulu lʼolo lu akambu tshe wayunyutshaka.

¹⁰Nyu tshe nyambemala elo la ntundu ka Latuyalaka, Unyashungu anyu: ete wa khumbu yanyu, dihangamendi dianyu, elombodi anyu wa ta, apami tshe wa Isariyele

¹¹ndu wadienyu, anʼanyu wa tshitshe, angendangenda tshe wudjashi lʼatei a pangu yanyu, uma le amunyi wa kunyi pulu ndu le amembi wʼashi.

¹²Nyambemala dia nyu mboto lu sheki ya Latuyalaka, Unyashungu anyu, lu sheki yakandanyudjela kame la etshibelu;

¹³dia ndi nyushikike dia nyu ndjala wudja andi umaka elo, la dia ndi ndjala Unyashungu anyu hita, uku akandanyutela ndu uku akandatshibela washenyu, Abarahama, Isaka la Jakoba.

¹⁴Dimi haladji la nyu sheki nye la etshibelu kene nyu nyame atu,

¹⁵keli kame la wane wemadi la su lane elo la ntundu ka Latuyalaka, Unyashungu asu, ndu kame la waku waha lʼatei asu elo.

¹⁶Nyu mbeyaka uku akatadjashi lu kete ya Edjibitu, ndu uku akatayalekanaka wedja weli lu mbuka kakatayetaka.

¹⁷Nyu nyakenyi akambu awo wa wononyi ndu dikishi diawo diʼetamba la dia ave, dia fesa la dia paunyi, dieli lʼatei awo.

¹⁸Nyewo, pami, umuntu, khumbu, kana diuhu dimotshi diambukadimo etema awo elo uma le Latuyalaka, Unyashungu asu, dia ntsho dia ntotemola ditemolatemola dia wedja eku, tadiuyalaki lʼatei anyu. Udiu watutungaka elua wa lolengo ndu wʼululu[164] tawuyalaki lʼatei anyu.

¹⁹Okone lamʼayuka untu ako aui wa daka ne, ndi atukuyasema lʼutema andi ati: Dimi layuyala la ki, kuyanga layuyala la lunyu lʼutema ami. Dikambu so mbeyaka minya ashashi ndu wumu pupu.

²⁰Latuyalaka hudimanyia. Keli kele la kandjema ka Latuyalaka wayufulanela le pami kako, la mananu tshe yufundami lu buku ne yayuya le ndi. Ku Latuyalaka ayudimula lukumbu landi uma lʼesi ulungu.

²¹Latuyalaka ayuwatula uma lu wedja tshe wa Isariyele, dia ndi nsuyama la mananu tshe ya sheki yufundami lu buku ne diʼelembe.

²²Lu lolonga layayi, anʼanyu wayula lʼokongo anyu, la angendangenda wayuya uma lu kete yʼetali, lamʼayuwena asui la kandji yambutumela Latuyalaka wudja uku, — wayuta vati:

²³Kete yako tshe yaya mboko ya dja la leho lutu, utshumba a wuki, wahatumbi wuhu, wahangonya elua kuyanga mbudia adiyu, uku akalanya Latuyalaka Sodoma la Ngomora,[165] Adema la Zeboyima lamʼakindi la kele la ududu.

²⁴Ee, wedja tshe wayumbwana vati: Okoko wana wambutshela Latuyalaka kete nye okone? Na kitshimudi ka luhaladi la kele kene ka mamba?

²⁵Ku antu wayuta vati: Ne dia vo wakaseke sheki yakadji Latuyalaka, Unyashungu a washewo la wo lamʼakandatundja uma lu kete ya Edjibitu;

²⁶ne dia vo wakatshu dia ntukambela ndu dia ntotemola ditemolatemola diakiwo kumueya la diakindi kumbasha.

²⁷Diako mbakuki Latuyalaka kete nye kele, mbakandayitumela mananu tshe yufundami lu buku ne.

²⁸Okone Latuyalaka akawanya uma lu kete yawo la kele, la ududu ndu la yenyi ya wulu, mbakandatuwakadja lu kete kina, uku wewo elo.

²⁹Akambu wushami weli wa Latuyalaka, Unyashungu asu. Keli akambu wambushwama weli wasu ndu wʼanʼasu pundju, dia shu mbeya ntsha aui tshe wʼelembe.