Read tetala Euhwelu kʼElembe 3 Bible Online

Euhwelu kʼElembe 3 - tetala bible

Euhwelu kʼElembe 3

¹Shu takakadimo, takatshu lu mbuka kʼutsha la Bashana. Ku Onga, khumʼekanga ka Bashana, akayi ndi la antu andi tshe, dia ndjolo la su ta la Ederei.

²Keli Latuyalaka akamvutela ati: Tuwukaki woma, ne dia lambukimo lu anya aye, ndi la wudja andi tshe ndu kete yandi. Kutsheli uku akayatshela Sihona, khumʼekanga ka Amora, lakadjashi la Heshibona.

³Ku Latuyalaka, Unyathungu asu, akakimo ndu Onga, khumʼekanga ka Bashana, kame la wudja andi tshe lu anya asu. Shu takudiaki, kumpandja nduku otoi wʼantu andi.

⁴Shu takose esumoa andi tshe lʼetena kako — nduku otoi awo wakisu kombosa — esumba akumi asamalu, kete tshe ya Arangoba, diulelu dia Onga ka la Bashana.

⁵Esumba ako tshe wakadingami la kumbu yʼetali, kuki ya waki la tukengeti, ladiku dia ngelu yawo efula tshe yaki kunyingama la kumbu.

⁶Takalanya tshe, uku akatatshela Sihona, khumʼekanga ka Heshibona. Shu takalanya esumba tshe, apami, amantu ndu ana.

⁷Keli takayaosela dungalunga tshe la diango dia dimbu diʼuma lʼesumba awo.

⁸Osoku mbakatahotola kete lʼetena kako uma le khumi ya dikanga hyendi yʼasi Amora, yaki la wedi wa Jorodana, uma lʼukndi wʼAranona, edja ndu lʼUkungu a Horemona

⁹(asi Sidona mbetaka Heremona vati: Siriyona, ku asi Amora vati: Senire).

¹⁰Shu takahotola ndu esumba tshe wa lu kete ya bamubamu, Ngiliyade tshe, ndu Bashana tshe, edja ndu la Saleka la Ederei, esumba wa lu diulelu dia Onga ka la Bashana.

¹¹(Tshikima Onga, khumʼekanga ka Bashana, utu kakatshikala uma lu diuhu diʼasi Refayima. Enda, tangi kandi kaki tangi ka mbulu. To kema la Raba, usumba wʼasi Amona uka? Utali ato weko kubita divwa, la wekeki ato kubita nyei, lu yediko ya kubita ku kubita.)

¹²Lamʼakatahotola kete yako lʼatena keso, dimi lakasha asi Rubena la asi Ngada leke la kete yʼuma la Aroere, yeli lʼumamu wʼukndi wʼAranona la etenyi otoi ka hendi ka leke lʼakuna la Ngiliyade kame lʼesumba awo.

¹³Dimi lakasha etenyi otoi ka hendi ka diuhu dia Manase etenyi ka Ngiliyade kakatshikala, ndu diulelu tshe dia Onga ka la Bashana, kete tshe ya Arangoba kame la Bashana tshe. Vo mbetaka kete ku tshe vati: Kete yʼasi Refayima.

¹⁴Jayira, onʼa Manase, akose leke tshe la kete ya Arangoba, yetawo vati: Bashana, pulu ndu lʼulelu wʼasi Ngeshure la asi Maka. Ku ndi akole ngelu yako lukumbu landi, yatuwetaka edja ndu elo vati: Havota-Jayira (kitshimudi ati: Ngelu ya Jayira.)

¹⁵Dimi lakasha Makira Ngiliyade.

¹⁶Asi Rubena lʼasi Ngada mbakamasha kete uma la Ngiliyade edja ndu lʼukndi wʼAranona, kame lʼatei atei wʼukndi uku ulelu, edja ndu lʼokedi wa Jaboka, ulelu wʼasi Amona.

¹⁷Dimi lakawasha ndu Araba, ndu Jorodana uku ulelu uma la Kinerete pulu ndu lʼuduwa wa Araba, Uduwa a Leho, ndu lʼuhulula wa Pisinga, utsha lu leke lʼehutwelu.

¹⁸Ku dimi lakanyutela lʼetena keku nti: Latuyalaka, Unyashungu anyu, ambunyusha Kete nye dia nyu yikita. Apami anyu tshe wa dihunga kawutshu wukimedi dihumo dia ta la ntundu kʼanengenyu, asi Isariyele.

¹⁹Keli wadienyu, inʼanyu la dungalunga dianyu (ne dia dimi mbeyaka nti: Nyu la dungalunga efula) mbayutshikala lu esumba wakamanyusha,

²⁰edja ndu Latuyalaka ambusha anengenyu mumuya uku nyu, dia ndu vo nkita kete yambuwasha Latuyalaka, Unyashungu anyu, la wedi wa Jorodana. Ku nyayukalula, untu lʼuntu lu kete yandi ya sangu yakamanyusha.[12]

²¹Lʼetena keku, dimi lakatela Jashua nti: Ashu aye wakenyi akambu tshe wakatshela Latuyalaka, Unyashungu aye, khumi ya dikanga nye hyendi. Ukuku mbayutshela Latuyalaka waulelu tshe lene atayatshu.

²²Tanyuwaukaki woma, ne dia Latuyalaka, Unyashungu anyu, kayutanyolwelaka ta ndame.

²³Ku lakasengasenga Latuyalaka lʼetena kako nti.

²⁴Khumadiondjo, Latuyalaka li! we akatatela menya ukambi aye wuki aye la lunya laye la wulu. Undi, etemolatemola kemotshi keko lʼulungu kana la kete keya ntsha elimu aye, kana akambu wa mamba watuyutshaka?

²⁵Lambukosengasenga nti: Etawo dimi ntelio dia ntena kete yʼololo sho ya la wedi wa Jorodana, leke loso lʼakuna wʼamena, ndu Libanona.

²⁶Keli Latuyalaka akambuki kele dikambu dianyu, ndi kumbukelami. Ndi akamvutela ati: Ambukuka, tumvutelaki dikambu so ntu.

²⁷Umbeli lʼote wa Pisinga, edia ashu aye utsha lu leke lʼedjelu, utsha la ngelʼa kushi, utsha la diku dia kushi, ndu utsha lʼehutwelu, endi la ashu aye menda tshu, ne dia we huteho Jorodana ku.[13]

²⁸Keli usha Jashua okende, uwete kanga dihunga, ukikitsha, ne dia ndi kayolombola wudja one, ndu kayuwakumia lu kete ya sangu yayangaye mena.

²⁹Okone shu takadjase lʼukndi, lu welelo wa Bete-Peore.