Read tetala Euhwelu kʼElembe 30 Bible Online

Euhwelu kʼElembe 30 - tetala bible

Euhwelu kʼElembe 30

¹Lamʼayuya akambu ane tshe le nyu, otshoko la mananu, wamumukitsha la ntundu kanyu, nyu nyayuwauho lamʼayunyuyala lʼatei a wedja tshe wambunyutshanya Latuyalaka, Unyashungu anyu.

²Nyukaluli le Latuyalaka, Unyashungu anyu, ndu nyu ndu anʼanyu, nyukitanyia diui diandi lu akambu tshe wamumunyutela elo, la etema anyu tshe ndu la nyumu yanyu tshe.

³Latuyalaka, Unyashungu anyu, ayunyunya uma lu lohombo, ayunyuka ketshi; ayukalula dia nyusanganya uma lʼatei a wedja tshe wambundunyudianganya.

⁴Kuyanga nyu nyayosekwama pulu ndu la kuma kʼulungu, Latuyalaka, Unyashungu anyu, ayutunyuyanga leko, ayutunyosa ntu.

⁵Latuyalaka, Unyashungu anyu, ayunyela lu kete yakakiti washenyu, dia ndu nyu yikita. Ndi ayunyongonya, ayunyufudia efula uleki washenyu.

⁶Latuyalaka, Unyashungu anyu, ayukndia etema anyu la etema wa tukanula tanyu, dia nyu mbuka ngandji lʼetema anyu tshe ndu la nyumu yanyu tshe dia nyu ndjala la lulumbi.

⁷Latuyalaka, Unyashungu anyu, ayahe mananu nye tshe ladiku diʼatunyi anyu ndu dia waku watunyuhetshaka la watunyusuyaka.

⁸Ku nyu nyayukalula le Latuyalaka, nyayukitanyia aui andi ndu nyayutsha elembe andi tshe wamumunyudjela elo.

⁹Latuyalaka, Unyashungu anyu, ayunyongonya otekoya lu elimu tshe wʼanya anyu, lu diutelu diʼanʼanyu, diʼana wa dungalunga dianyu ndu la diango dia lu dikambo dianyu. Latuyalaka ayunyenya olo lu nyongonya uku akandenyaka washenyu,

¹⁰naka nyu nyayukitanyia diui dia Latuyalaka, Unyashungu anyu, dia nama elembe andi la adjangu andi wufundami lu buku ne diʼelembe; ndu naka nyayukadimo le Latuyalaka, Unyashungu anyu, la etema anyu tshe ndu la nyumu yanyu tshe.

¹¹Olembe one wamumunyudjela elo, hawunyuleki wulu, ndu vo kema etali uma le nyu.

¹²Vo kema lʼulungu, lene ukukinyu mumbwana nyati: Ayutudela lʼulungu dia ntutoselawo, ndu ayututelawo dia shu ndjuwuka, ndu dia shu ndjutsha?

¹³Ndu vo kema la wedi wʼashi a waki, lene ukukinyu mumbwana nyati: Ayututehwela la wedi wʼashi a waki, dia ntutoselawo, ndu ayututelawo dia shu ndjuwuka, ndu dia shu ndjutsha?

¹⁴Keli olembe ako weko lasuki la nyu. Vo weko lʼenyo anyu ndu lʼetema anyu, dia nyu mbeya mbutsha.[166]

¹⁵Enda, dimi lambukitsha lumu la ololo, nyoi la kolo la ntundu kanyu elo.

¹⁶Naka nyambukitanyia elembe wa Latuyalaka, Unyashungu anyu, wamumunyudjangela elo, lu mbuka Latuyalaka, Unyashungu anyu, ngandji, lu nkendakenda lu mbuka yandi, lu nama elembe andi, aui andi, la adjangu andi, ku nyu nyayuyala la lulumbi ndu nyayufulanela. Okone Latuyalaka, Unyashungu anyu, ayeya nyotshokola lu kete yatanyatshu la ntukita.

¹⁷Keli naka etema anyu wambukadimo, diaha nyu nkitanyia olembe one, ndu nyambukutwama le ditemolatemola, dia ditemola la dikambela ulimu,

¹⁸dimi lambunyutela elo nti: Nyu nyayulanyema; nyu hanyututshikala edja lu kete yatanyatshu la ntukita lamʼayunyuteho Jorodana.

¹⁹Dimi lambeta ulungu la kete emenyi lu dikambu dianyu elo nti: Dimi lambukitsha lumu la nyoi, otshoko la mananu la ntundu kanyu. Okone nyosonole lumu, dia nyu la anʼanyu ndjala la lulumbi,

²⁰lu mbuka Latuyalaka, Unyashungu anyu, ngandji, lu nkitanyia diui diandi ndu lu mbumamema. Ne dia uma lu dikambu ne, mbayunyukundja lumu la lulumbi, mbayunyeya ntudjase lu kete yakatshibe Latuyalaka dia mbisha washenyu, Abarahama,[167] Isaka[168] la Jakoba.[169]