Read tetala Euhwelu kʼElembe 31 Bible Online

Euhwelu kʼElembe 31 - tetala bible

Euhwelu kʼElembe 31

¹Mose akatetemala mvutela Isariyele aui ane tshe.

²Ndi akawatela ati: Dimi lambuyala deku lukama la akumi ahendi elo. Dimi handjeya nyo-lombola ntu. Ndu Latuyalaka akamvutela ati: We huteho Jorodana nye.[170]

³Latuyalaka, Unyashungu anyu, ndame ayuteho la ntundu kanyu. Ndi ayutulanya wedja tshe weli la ntundu kanyu, ku nyu nyayekita. Jashua ayuteho la ntundu kanyu, uku akati Latuyalaka.

⁴Latuyalaka ayutshela wedja ako uku akandatshela Sihona la Onga, khumi ya dikanga yʼasi Amora, lamʼakandalanya, kame la kete yawo.[171]

⁵Latuyalaka ayunyukimwelawo, ku nyu nyayatshela uku elembe tshe wakamanyudjela.

⁶Nyukikitali, nyuyali la dihunga! Tanyuwaukaki woma, tanyuwatelaki asulu, ne dia Latuyalaka, Unyashungu anyu, ndame ayutsho la nyu. Ndi hunyukimo, kuyanga nyoseka.

⁷Mose aketi Jashua, akawutela la ntundu ka Isariyele tshe ati: Ukikitali, uyali la dihunga! ne dia we kayutsho la wudja one utsha lu kete yakatshibela Latuyalaka washewo dia mbasha ukito, we kayuwakumia lu kete yʼukito.

⁸Latuyalaka ndame ayutatshokaka la ntundu kanyu; ndi ayuyalaka la ye. Ndi hukukimo, kuyanga nkoseka.[172] Tukaki woma, kuyanga nshisha dihunga.

⁹Mose akafundi elembe ene, akawesha elombedi, ana wa Lewi, watembaka oshete wa sheki wa Latuyalaka, ndu dihangamendi tshe dia Isariyele.

¹⁰Mose akawatela ati: Lʼekumelu ka deku esambeli tshe,[173] lʼetena kakawashikike lʼeleku kʼetshungwelu, lu nshi ya waki ya tutumbutumbu,[174]

¹¹lamʼayuyaka asi isariyele tshe dia ndjenama la ntundu ka Latuyalaka, Unyashungu anyu, lu dihuli diayundosonola, kanyalaki elembe ene la ntundu kʼasi Isariyele tshe dia vo mbuka.

¹²Kanyusanganya antu, apami, amantu, ana wa tshitshe, la angendangenda wudjashi lʼatei wʼesumba anyu, dia vo mbuka la mbeka lama mbuka Latuyalaka, Unyashungu anyu woma, la dia nama ololo dia ntsha aui tshe wʼelembe ene.

¹³Ku anʼawo wahatalimbitela, wayuka ndu wayeka lama mbuka Latuyalaka, Unyashungu anyu, woma, tena tshe diayunyuyalaka la lumu lu kete yatanyatshu la ntukita lamʼayunyuteho Jorodana.

¹⁴Latuyalaka akatela Mose ati: Ulungi, nshi yambusukana ya we mvo. Eti Jashua, nyutemali lu luudu lʼesanganelu la dipema, dia dimi ntuwusha okende ami. Ku Mose la Jashua wakatemala lu luudu lʼesanganelu la dipema.

¹⁵Ku Latuyalaka akene lu luudu la dipema lu ekoho ka dingi. Ekoho kako ka dingi kakemala ladiku dia suku dia luudu la dipema.

¹⁶Latuyalaka akatela Mose ati: Ulungi, we utsha ntsho le washo. Ku wudja one wayunela, wayonseka, wayulanya sheki yakamadji la wo, wayekesanela la ditemolatemola diʼangendangenda dia lu kete, lene atawatshu.

¹⁷Ku lushi lako, dimi layuwauka kele ka wulu, layaseka, layuwashe elundji kami, ku vo wayulanyema. Akambu wa kolo efula ndu wʼasui wayuya le wo. Ku lʼetena kako, vo wayumbwana vati: Aha ne dia Unyashungu asu kema lʼatei asu, mbambuya akambu ane wa kolo le su?

¹⁸Mete, dimi layuwashe elundji kami lushi lako, ne dia kolo tshe yayuwutsha lamʼayuwukadimo utsha le ditemolatemola.

¹⁹Kakiane ufundji usambu one, uwetsha asi Isariyele. Uwudji lʼenyo awo, dia usambu ako ndjala omenyi ami le asi Isariyele.

²⁰Lamʼayumakumia lu kete yuludi too lʼawele la usanga, yakamatshibi dia mbisha washewo, lamʼayuwolekaka, ayuwulutaka, ayuwununa, vo wayukadimo utsha le ditemolatemola, wayudikambela ulimu. Ku vo wayomonyola, wayudiaka sheki yami.

²¹Okone lamʼayuya akambu etula wa kolo la ehenyohenyo le wo, usambu one mbayuyala omenyi lʼasami la wo (ne dia vo hawuhame, wayutshikalaka lʼenyo wa tukanula tawo). Dimi mbeyaka sangweyu diasanguyawo lʼetema awo kakiane, ntundu dimi latakumia lu kete yakamatshibi dia mbasha.

²²Okone Mose akafundi usambu one lushi lako, akawetsha asi Isariyele.

²³Latuyalaka akasha Jashua, onʼa Nuna, okende,[175] akati ati: Ukikitali, uyali la dihunga,[176] ne dia we kayukumia asi Isariyele lu kete yakamatshibi dia mbasha; dimi layuyalaka la ye.

²⁴Lamʼakashndiya Mose nfunda aui wʼolembe one lu buku,

²⁵Mose akatela asi Lewi, wakatembaka oshete wa sheki wa Latuyalaka, ati:

²⁶Nyose buku ne diʼelembe, nyudikitsha lʼumamu wʼoshete wa sheki wa Latuyalaka, Unyashungu anyu, dia dio ndjala omenyi loko dikambu dianyu.

²⁷Dimi mbeyaka nti: Nyu nyeko akanga wʼuhendudi la ete wulu. Enda, naka nyu nyeko la uhendudi le Latuyalaka lamʼekemi la lumu lʼatei anyu elo, keti huki lambuvo!

²⁸Nyusanganya dihangamendi tshe dia wudja la elombodi anyu wa ta la ntundu kami dia dimi ntatshi aui ane lu atui awo, ku layuwaetela ulungu la kete emenyi.

²⁹Dimi mbeyaka nti: Lʼokongo wa nyoi kami, nyu nyayutsha kolo, nyayetola uma lu mbuka kakamanyudjangela. Ku elanyelu kayuya le nyu lu nshi yayayi, ne dia nyu nyayutshaka kene keli kolo lu ashu wa Latuyalaka. Nyu nyayuwukia kele uma lʼulimu wa anya anyu.

³⁰Mose akatela ului tshe wa Isariyele aui wʼusambu one, edja ndu lamʼakawashili, ati: