Read tetala Euhwelu kʼElembe 32 Bible Online

Euhwelu kʼElembe 32 - tetala bible

Euhwelu kʼElembe 32

¹Ulungu li, uhuke tui keli ntekete! Kete li, ulungi aui uma lʼunyo ami!

²Wetshelu ami walokaki uku mvula, Aui ami walokaki uku lopepe, Uku tshokotoko ya mvula lu adiyu wʼomongela, Uku lunyuki la mvula lu adiyu wʼetali!

³Ne dia dimi layusanya lukumbu la Latuyalaka. Nyutumbuli Unyashungu asu!

⁴Dive dia wuki, ulimu andi weli uluwanyi; Ne dia mbuka yandi tshe yeli sambu kʼololo. Unyashungu a kolamelu, aha la kolo, Ndi eli ololo ndu usimbwi.

⁵Vo wakayalanya le ndi, Vo kema anʼandi ntu, ne dia vo wakayala la awadi. Vo weli lolonga la kolo ndu lahasimbwi.

⁶Undi nyu nyambukitshiya Latuyalaka unungu wa dikambu ne, Nyu akanga a dinginya ndu waha la yimba? Aha ndi keli shenyu la utungi anyu, Lakanyutungi ndu lakanyushikike uka?

⁷Nyuhoki nshi yʼedjedja, Nyukani yimba dia deku dia nonga efula. Nyumbuli washenyu akambu ane, ku vo wayunyumanyawo fundu; Ndu esumbi anyu, ku vo wayunyutelawo.

⁸Lamʼakasha KhumʼUlungu wedja kete ukito, Lamʼakandatanya ana wʼantu. Ndi akashikike elelu a wedja Lu yediko yʼefula kʼana wa Unyashungu.[177]

⁹Etenyi ka Latuyalaka keli wudja andi, Jakoba keli etenyi kandi kʼukito.

¹⁰Ndi akutani lʼusui wa shenga, Ndu lʼusui wa shenga weli la adikitu a woma. Ndi akudingi, akawumbi ololo, Akulami uku onʼa su.

¹¹Uku atuhashahashaka pungu kefu kato, Atutuhuhahuhaka ladiku dia anʼato, Atutusimbulaka ahafu ato, atutuwaosaka, Atutuwaembaka ladiku dia sala yato,

¹²Mbakalombola Latuyalaka ndame wudja andi, Nduku etemolatemola kʼasi wedja kaki kame la ndi.

¹³Ndi akawudiyaka lu ahuli wa ladiku wa la kete, Ku Isariyele akalekaka diango uma lu dikambo; Ndi akuhihiaka usanga wʼuma lu dive, Ndu iso uma lu dive dia wulu.

¹⁴Okone we akalekaka mateka wa ngombe, la awele wʼekoko, Kame la wata wʼesongo wʼekoko ndu a waumi wʼekoko, Ngombe ya Bashana la mbudi, Kame lʼepunga wuleki amena — Ndu lʼashi wa tilili wʼelua wakanyanokaka wanu.

¹⁵Keli Jeshuruna akanuni, ku akatomboko; We akanuni, akayala wuki, akayala dimba ashi atu! Ku ndi akaseke Unyashungu, lakutungi, Akonyola Dive dia wuki dia panda kandi.

¹⁶Vo wakawukia kandjema ne dia ditemolatemola diʼangendangenda, Wakawukia kele lʼakambu awo wa wononyi,

¹⁷Vo wakalambula djimu dieli kema Unyashungu,[178] Ndu ditemolatemola diakiwo kumbeya. Ee, ditemolatemola diʼeyuyu diambuyala paka nshi nye, Diaki washenyu kumbuka woma.

¹⁸We akaseke Dive dia wuki diakakutungi, La ambuhela Unyashungu lakakutuya.

¹⁹Latuyalaka akenyi dikambu ne, akuki kele, Ne dia ohenyohenyo wa anʼandi wʼapami la wʼamantu.

²⁰Ndi akati ati: Dimi layuwashe elundji kami, Dimi layenda uku ayuyala ekumelu kawo; Ne dia vo weli wudja wa kolo, Ana waha la kolamelu.

²¹Vo wambumbukia kandjema[179] le wane waha etemolatemola; Wakambukia kele ne dia dikishi diawo diʼanyanya. Okone ndu dimi layuwautsha kandjema le wudja waha wudja; Layuwautsha kele le wudja waha la yimba.[180]

²²Ne dia dja ya kele kami yamboheta wulu, Yambulunguya pulu ndu lʼesi a Dihuli diʼedu, Yambulunguya kete la diango diayo, Yambulunguya atshina wʼekungu.

²³Dimi layomotsha kolo diwenga ladiku diawo; Dimi layushila pitu yami tshe lu mbatsheta.

²⁴Vo wayonda la ndjala, wayushila la luhaladi lʼetshumbelu, Ndu la kandji ya lolengo. Dimi layatumela nyama ya ngala La diango diayakutula dia lolengo dia lu ditshu.

²⁵Lʼandja, vo wayushila la yombo; Ku lu mvudu, la woma: Akambu ane wayuya le olongo a pami ndu le usekaseka wʼemuma, Le onʼashashi ndu le usumbi.

²⁶Dimi lutulanga mvuta nti: Mbahandjuli etali, Nshisha euhwelu kawo lʼatei antu.

²⁷Keli dimi lakuki hyediya yʼote yʼutunyi woma, Ne dia atunyi awo watukunga lu tukanyi tawo, Ne dia vo watukuta vati: Lunya lasu leko wulu, Latuyalaka kuntsha akambu ane tshe.

²⁸Vo weli wudja wakashisha yimba, Ndu waha la ewu.

²⁹Utunduyala wayali la yimba, vo wutulimbitela dikambu ne, Vo wututshikitanya akambu awo wa ndjihelu la wʼekumelu.

³⁰Ngandi ukuki untu otoi mbitshanya antu kinunu, La antu ahendi ndo ta lʼantu nunu dikumi, Aha tshikima Dive diawo dia wuki ambasundja, Latuyalaka ambakimo?

³¹Ne dia dive diawo kema uku Dive diasu dia wuki, Ndu atunyi asu vame wambuyala esambudi.

³²Ne dia ekodi awo wʼelua weli kuno yʼuma la Sodoma La yʼuma lu dikambo dia Ngomora; Elua awo weli elua wa lolengo, La sandji diawo dieli ululu;

³³Wanu awo weli lolengo lʼelui, Ee, lolengo la wulu lʼakhuha.

³⁴Lolengo lako halumbami lasuki la mi, Haludihami lu aumbelu ami uka?

³⁵Somboya eli dikambu diami,[181] ndu difutu, Lamʼayoselo ekulu awo! Ne dia lushi lʼelanyelu kawo aya suki, La elumbwelu kawo kambuya esadi.

³⁶Latuyalaka ayamela wudja andi; Ayuka ekambi andi ketshi[182] Lamʼayundena ati: Wulu awo ambushila, La nduku otoi wekeko, fumbi kana luyadjasedi.

³⁷Ku ndi ayumbula ati: Lendʼeli ditemolatemola diawo, Dive diakawashamaka,

³⁸Diakalekaka wata wa nyama yʼelambu awo, Diakanokaka wanu wʼelambu awo wa dinono? Dio diuneli, dianyukimanyia, Dio diayali elamelu kanyu!

³⁹Nyeyi nyati: Paka dime, keli Unyashungu, Nduku etemolatemola keko kame la mi, Dimi katudiakaka ndu kateteka la lumu, Dimi katuhumuyaka ndu katokonoyaka. Nduku leya mpotola engo uma lu lunya lami.

⁴⁰Ne dia dimi lambeme lunya lami utsha lʼulungu, Lambutshiba nti: Uku wemi la lumu pundju!

⁴¹Naka layudja yombo yami ya ngadimo diesa, La lunya lami layukime sambu kʼololo, Dimi layosomboya atunyi ami, Layusuya wane watumpetshaka

⁴²Dimi layete pitu yami dikila tu, Yombo yami yayutundutunduya emunyi awo — La dikila diʼadjakemi la dia fumbi, Diʼuma lʼete wʼewandji wʼutunyi.

⁴³Nyu wedja, nyanduli wudja wa Latuyalaka,[183] Ne dia ndi ayosomboya dia dikila diʼekambi andi,[184] Ayosomboya atunyi andi, Ku ndi ayutungela kete yandi la wudja andi ekesanelu.

⁴⁴Mose akayi akasanyiya antu aui tshe wʼusambu one, ndi la Jashua, onʼa Nuna.

⁴⁵Lamʼakashndiya Mose nteketa aui ane tshe le Isariyele,

⁴⁶ndi akawatela ati: Nyulami aui ane tshe wamumunyutela elo lʼetema anyu, dia nyu mbatela anʼanyu, dia vo nama la ntsha aui tshe wʼolembe one.

⁴⁷Ne dia dikambu ne kema dikambu dia tshitshe le nyu, dio dieko lumu lanyu. Uma lu dikambu so mbayuyala nshi yanyu efula lu kete yatanyatshu dia ntukita lamʼayunyuteho Jorodana.

⁴⁸Ku lushi lako, Latuyalaka akatela Mose ati:

⁴⁹Umbeli lʼukungu one wʼAbarime, Ukungu a Nebo, weli lu kete ya Moaba, welanedi la Jeriko; kutendi kete ya Kanana, yamumusha asi Isariyele sangu.

⁵⁰Kutuvu lʼukungu watayatshu dia ntumbela, kututshu le washo, uku akavu onanyo Arona lʼUkungu a Hora, ndu uku akandatshu le washi,

⁵¹ne dia nyu nyakashisha mbetawo le mi lʼatei wʼasi Isariyele, lu ashi wa Meriba ka la Kadesha, lʼusui wa shenga wa Zina; ne dia nyu konemiami uku one leli ekila lʼatei wʼasi Isariyele.

⁵²We ayutena kete la ntundu kaye, keli we hukuma leko, lu kete yambumusha asi Isariyele.[185]