Read tetala Euhwelu kʼElembe 33 Bible Online

Euhwelu kʼElembe 33 - tetala bible

Euhwelu kʼElembe 33

¹Otshoko wakatshokola Mose, untu Unyashungu, asi Isariyele ntundu ka nyoi kandi one.

²Ndi akati ati: Latuyalaka akayi uma la Sinai, Ndi akâhutwela uma la Seire, Akâhetela ngaingai uma lʼUkungu a Parana. Ndi akayi uma le nunu dikumi diʼekilami La dja yaheta lu lunya landi la pami.

³Ee, ndi akuki wudja andi ngandji; Wane tshe wakakndiama le ndi, waki lu lunya landi. Vo wakayeli wanya aye, Watulungulaka elombwelo uma le ye,

⁴Lamʼakatudjela Mose olembe, Uku sangu le ului wa Jakoba.

⁵Ku Latuyalaka akayala khumʼekanga ka Jeshuruna Lamʼakasanganyema ete a wedja, Wauhu tshe wa Isariyele kame.

⁶Rubena ayali la lulumbi, tavokaki, Antu andi tawuyalaki yema tshitshe!

⁷Ndi akati aui ane lu dikambu dia Juda ati: Latuyalaka li, uki diui dia Juda, Ukaluya utsha lu wudja andi. Anya andi wayali wulu, Ukimanyia dia nembia atunyi andi!

⁸Ndi akati lu dikambu dia Lewi ati: Usha Lewi loyembo lʼaloho “Uluwanyi,” La loyembo lʼaloho, “Usasi,”[186] le ulangimi aye, Yako yakayedika la Masa,[187] Yakayadji tamu lu ashi wa Meriba.[188]

⁹Lewi akati dia shi la nyangu ati: Dimi kumbaenda. Ndi kumbeya anangu ati: Analingu mbewo, Ndi kunimbitela kuyanga anʼandi hita, Vo wakakitanyiaka diui diaye. Ndu wakalamaka sheki yaye.

¹⁰Vo wayetshaka Jakoba adjangu aye, La Isariyele elembe aye; Vo wayukitsha malashi la ntundu kaye, La elambu tshe wa lutshumba ladiku dia ediakelu kaye.

¹¹Latuyalaka li, otshokole ukundji wa Lewi! Eta wo ulimu wʼanya andi! Owediawedia ekongo wʼapetshi andi, A waku watuhetshaka, vo tawunelaki ntu.

¹²Ndi akati lu dikambu dia Bendjamina ati: Ulangimi wa Latuyalaka, ayudjaseka ki lasuki la ndi. Latuyalaka ayukumbaka yanyi tshe, Ayudjaseka lʼaheka andi.

¹³Ndi akati dikambu dia Josefu ati: Latuyalaka atshokole kete yandi, La eshasha wuleki ololo wa lʼulungu, Ndu wa la tshina dia kete,

¹⁴La elua wuleki ololo wa unya, La diula dia diango ngondo la ngondo.

¹⁵Ndi ayitshokole la diango diuleki amena dia lʼekungu wʼedjedja, La diango diuleki efula dia lʼakuna wa pundju.

¹⁶Ndi ayitshokole la eshasha wuleki ololo wa la kete, ndu efulanelu kayo, Ndu ololo wa one lakadjashi lu dikumbu, Etshoko ene wayali lʼote wa Josefu, Ladiku dia dembo dia kusu dia lʼote wa uwandji wʼanangu!

¹⁷Osongo a ngombe andi wʼumi wʼenundu weki la lutumbu; Seki yawo yeli uku seki ya ndjati. La yo, mbayundutshutshiya wedja, vo tshe, utsha lʼekumelu ka kete. Seki yako mbeli nunu dikumi dia Efarayima. Ndu yo yako mbeli nunu dia Manase.

¹⁸Ndi akati lu dikambu dia Zebuluna ati: Zebuluna, ongenangenaki lu kendo yaye, Ku we Isakara, ongenangenaki lu mvudu yaye yʼapema!

¹⁹Vo wayeta antu dia ndja lʼekungu awo; Leko katuwulambulaka elambu wʼololo, Ne dia vo wayuhihaka ongonyi wʼashi a waki, La ekundji wushami wa lokongo.

²⁰Ndi akati lu dikambu dia Ngada ati: One latufudiaka Ngade, atshokwami! Ngade atudjaseka uku tambwe; Ndi atotetshatetshaka lunya ndu lombo lʼote.

²¹Ndi akayasonwela kete yuleki ololo, Leko kakalamema etenyi kʼolombodi wa ta; Ndi akayi le ete a wudja; La Isariyele mbakandatshi elembe Ndu adjangu wʼololo wa Latuyalaka.

²²Ndi akati lu dikambu dia Dane ad: Dane eli onʼa tambwe, Latulimboka uma la Bashana.

²³Ndi akati lu dikambu dia Nafetali ati: Nafetali li, unduyami lʼakambu wʼololo, Ndu uludiami lʼotshoko wa Latuyalaka, Ukiti uduwa ndu leke la diku dia kushi!

²⁴Ndi akati lu dikambu dia Ashere ati: Ashere atshokwami ladiku diʼana apami; Ndi ayali unangemi le anangu, Atambiya dikaka diandi lu iso.

²⁵Tukengiti taye tayuyala ta mbulu ndu tʼehotela, Uku efula ka nshi yaye, mbayuyala wulu aye.

²⁶Nduku ledimi la Unyashungu, we Jeshuruna, Latembamaka ladiku diʼulungu dia ndjukukimanyia, Ndu lu wuki wuki andi la wangi.

²⁷Unyashungu Latuyalaka eli edjaselu kaye, Anya andi wa pundju weli lungeli laye, Ndi katutshanyaka atunyi la ntundu kaye, Ku ndi akati ati: Washili ushiki.

²⁸Okone Isariyele akadjase lu lutui tshitshi, Eteko ka Jakoba keko tame, Lu kete yʼepunga la wanu wʼeyuyu, Ee, ulungu andi watoloshaka lopopo.

²⁹Isariyele li, ndi diese dieli la nyu li! Nduku wudja wedimi la nyu, Nyu wudja wakashimbamela uma le Latuyalaka, Engawu kʼekimanyelu kanyu, La yombo yʼelembielo kanyu! Antu anyu wayunyolembelembela. Nyu nyayohotshahotsha alunga awo.