Read tetala Euhwelu kʼElembe 34 Bible Online

Euhwelu kʼElembe 34 - tetala bible

Euhwelu kʼElembe 34

¹Mose akunela uma lu mandja ya Moaba, akambela lʼUkungu a Nebo, pulu lʼote wa Pisinga, welanedi la Jeriko. Ku Latuyalaka akawenya kete tshe ya Ngiliyade, pulu ndu la Dane,

²Nafetali tshe, kete ya Efarayima la Manase, kete tshe ya Juda pulu ndu lʼAshi a waki a Mediteraneya,

³Nengebe, ndu Landja letawo vati: Ukidi wa Jeriko, usumba wʼatuku, pulu ndu la Zoara.

⁴Ku Latuyalaka, akawutela ati: Uku eli kete yakamatshibi dia mbisha Abarahama,[189] Isaka,[190] la Jakoba,[191] nti: Dimi layuyisha tukanula taye. Dimi lambukenyayo la ashu aye, keli we huteho utsha leko.

⁵Okone Mose, ukambi wa Latuyalaka, akavu leko lu kete ya Moaba, uku diui dia Latuyalaka.

⁶Ku Latuyalaka akukhunde lʼukndi, lu kete ya Moaba, lu welelo wa Bete-Peore. Keli nduku untu leya dihuli dia diumbu diandi edja ndu elo.

⁷Mose aki la deku lukama la akumi ahendi lamʼakandavu. Ashu andi kundjala lungi, wulu andi kunkitakita.

⁸Ku asi Isariyele wakaleli Mose nshi akumi asatu lu mandja ya Moaba. Ku nshi ya delu lʼutanda wa Mose yakashili.

⁹Jashua, onʼa Nuna, akaludiama la nyuma ka yimba, ne dia Mose akatawahi anya andi. Asi Isariyele wakunitanyiaka, wakatshaka uku akatelaka Latuyalaka Mose.

¹⁰Uma lu nshi sho, nduku umvutshi akatumbi lu Isariyele uku Mose, lakenana la Latuyalaka lʼelundji lʼelundji.[192]

¹¹Mete, nduku laki uku ndi lu tulimbetelu tshe la akambu wa mamba wakutumi Latuyalaka, dia ntutsha lu kete ya Edjibitu, le Farayo ekambi andi tshe, ndu lu kete yandi tshe,

¹²ndu lu wulu tshe wa mamba la etsha a waki ndu a woma wakatshi Mose lu ashu wa Isariyele tshe.