Read tetala Euhwelu kʼElembe 5 Bible Online

Euhwelu kʼElembe 5 - tetala bible

Euhwelu kʼElembe 5

¹Mose akakonge Isariyele tshe; akawatela ati: Isariyele lii! Nyulungi elembe la adjangu wanyutelami elo dia nyu mbaeka, mbalama ndu mbatsha.

²Latuyalaka, Unyashungu asu, akadji la su sheki la Horeba.

³Latuyalaka kumbidja sheki nye la washesu, keli ndi akadji la su sheki, shu tshe weli la lumu elo.

⁴Latuyalaka akateketa la nyu lʼelundji lʼelundji lʼukungu, uma lʼatei wa dja.

⁵Dimi lakemala lʼetena keku lʼasanyu la Latuyalaka, dia nyutela diui dia Latuyalaka, ne dia nyu nyakuki dja woma, ndu nyu kumumbela lʼukungu. Ndi akati ati:

⁶Dimi keli Latuyalaka, Unyashungu anyu, lakanyutundja uma lu kete ya Edjibitu, uma lu luudu la lohombo.

⁷Tuyalaki la ditemolatemola la ntundu kami.

⁸Tuyaselelaki nduku ekishi kuyanga efanelu kʼengo kemotshi keli ladiku diʼulungu, kana keli la tshina la kete kana keli lʼashi.

⁹Tudikhuselaki adui, tuditemolaki,[28] ne dia dimi Latuyalaka, Unyashungu aye, leli Unyashungu a kandjema, latosomboyaka wengiya a washi le ana, edja ndu lolonga la satu kana lolonga la nei la wane watumpetshaka.

¹⁰Ku dimi latenyaka wane watumbukaka ngandji la watulamaka elembe ami ngandji ka shikaa, edja ndu nonga nunu.[29]

¹¹Tudimulaki lukumbu la Latuyalaka, Unyashungu aye, udimuladimula:[30] ne dia Latuyalaka hete one ladimula lukumbu landi udimuladimula aha la unungu.

¹²Uhoki lushi la mumuya, dia lulamaka ekila, uku akakudjangela Latuyalaka, Unyashungu aye.[31]

¹³Ukambaki ulimu nshi shamalu, kutshaki elimu aye tshe.

¹⁴Keli lushi lʼesambeli, leli lushi la mumuya ka Latuyalaka, Unyashungu aye. Tutshaki ulimu lushi lako,[32] we, onʼaye la pami kana la umuntu, ukambi aye a pami kana a umuntu, ngombe kaye, punda kaye, kana nyama kaye kemotshi, kana ongendangenda ludjashi lu luudu laye, dia ukambi aye a pami la ukambi aye a umuntu mumuya uku we.

¹⁵Uhoki wati: We aki fumbi lu kete ya Edjibitu, ku Latuyalaka Unyashungu aye, akakutundja la lunya la wulu ndu lʼusimbwi uma leko. Diako mbakakudjangela Latuyalaka, Unyashungu aye, dia namaka lushi la mumuya.

¹⁶Olemiaki sho la nyo,[33] uku akakudjangela Latuyalaka, Unyashungu aye, dia nshi yaye ndjala efula ndu dia we ndjala la ongenongeno lu kete yambukusha Latuyalaka, Unyashungu aye.[34]

¹⁷Tudiakaki.[35]

¹⁸Tunanaki luseka.[36]

¹⁹Tuvaki.[37]

²⁰Tumamanyiaki unyaye unungu.[38]

²¹Tokomiaki[39] wadi a unyaye. Tokomiyaki luudu la unyaye kana ekambo kandi, ukambi andi a pami kana a umuntu, ngombe kandi kana punda kandi, kuyanga engo kekina ka unyaye.

²²Oso eli aui wakateketa Latuyalaka la diui dia wulu le ului anyu tshe, ladiku diʼukungu uma lʼatei wa dja, wa dingi ndu wa udjima a tshududu ndi kumbahe nduku diui dikina. Ndi akafundi lu pasi pendi diʼave, ku ndi akambishadio.

²³Lamʼakanyuki diui uma lʼatei a udjima, ne dia ukungu tshe waki lu mpeta dja, nyu, ete a wauhu anyu tshe la dihangamendi dianyu nyakasukana le mi.

²⁴Ku nyu nyakati nyati: Enda, Latuyalaka, Unyashungu asu, ambutenya lutumbu landi ndu wuki andi, la shu takuki diui diandi uma lʼatei wa dja. Elo kambutena Unyashungu ateketa lʼuntu, ku untu ako mbeyaka ntshikala la lumu!

²⁵Ku kakiane, ngandi ukukisu mvo? Dja ya mamba ku yuyanga ntutshumba. Naka shu tayutetemala mbuka diui dia Latuyalaka, Unyashungu asu, shu tayuvo.

²⁶Untu akona akuki diui dia Unyashungu a lumu ateketa lʼatei wa dja uku shu, ku ndi ntshikala la lumu?

²⁷Usukani, we, utulungi kene tshe kayuta Latuyalaka, Unyashungu asu. Weme kuyututeli kene tshe kayundutukutela. Shu tayukilunga, ndu tayukitsha.[40]

²⁸Latuyalaka akuki aui anyu lamʼakanyamvutelaka. Ku ndi akamvutela ati: Dimi laknki aui wa wudja one, wakawakutedi. Kene tshe kakawakutedi keko dimena.

²⁹Utunduyala vo wayalaki la etema ene etu, wa vo mbukakami woma la nkutanyiaka elembe ami tshe, dia vo ndjala la ongenongeno pundju ndu vo ndu anʼawo li!

³⁰Utshu, utuwateli wati: Nyukaluli lu mvudu yanyu yʼapema.

³¹Keli we, utshikali la mi lane, ku layukutela aui, elembe, la adjangu wayuyutuwaetsha, la vo ntetshaka lu kete yamumuwasha sangu.

³²Kanyutshaki uku akanyudjangela Latuyalaka, Unyashungu anyu. Tanyetolaki lu lunya la pami kana lu lunya la lomoso.

³³Kanyokendakendaki lu mbuka tshe kakanyudjangela Latuyalaka, Unyashungu anyu, dia nyu ntshikala la lumu, dia nyu ndjala la ongenongeno, ndu dia nshi yanyu ndjala efula lu kete yayunyukita.