Read tetala Euhwelu kʼElembe 6 Bible Online

Euhwelu kʼElembe 6 - tetala bible

Euhwelu kʼElembe 6

¹Onʼeli olembe, aui la adjangu wakati Latuyalaka, Unyashungu anyu, dia nyetsha, dia nyu ntatshaka lu kete yatanyatshu dia ntukita;

²dia nyu mbuka Latuyalaka, Unyashungu anyu woma, la namaka am andi la elembe andi tshe wamumunyudjangela, nyu la an anyu la ekana anyu nshi tshe ya lumu lanyu; ndu dia nshi yanyu ndjala efula.

³Isariyele li! nyuhukami elembe ene dia mbetsha, dia nyu ndjala la ongenongeno, ndu dia nyu nfulanela efula, uku akanyutela Latuyalaka, Unyashungu a washenyu lamʼakandanyulaki kete yuludi too lʼawele la usanga.

⁴Isariyele li! nyuki. Latuyalaka, Unyashungu asu, ndame keli Latuyalaka.[41]

⁵Ulangi Latuyalaka, Unyashungu aye, lʼutema aye tshe, la lumu laye tshe, ndu la wulu aye tshe.[42]

⁶Aui ane wamumukudjangela elo, wayali lʼutema aye.

⁷Kuwakokomiyaki anʼaye, kuwatelakewo lamʼudjashiye lu luudu laye, ndu lamʼatayakendakendaka lu mbuka, lamʼetamiye, ndu lamʼetoye.

⁸Kekeleki lu anya aye djimbitelu. Vo kawuyali lʼasa ashu aye uku tohondo tatuwolotaka lu fumu.

⁹Kuwefundi lu dikoho dia la suku dia luudu laye, ndu lu kuki yaye ya waki.[43]

¹⁰Lamʼayunyukumia Latuyalaka, Unyashungu anyu, lu kete yakandatshibela washenyu Abarahama,[44] Isaka,[45] la Jakoba,[46] dia nyusha, kame la esumba a waki ndu wʼamena, wakinyu kumpika,

¹¹mvudu yuludi too la diango tshe diʼololo, diakinyu kundudia, eshima wakatshimama, wakinyu kuntshima, ndu dikambo diʼekodi wʼelua la eweli, wakinyu kumune, ndu lamʼayunyolekaka ndu lamʼanyulutaka,

¹²kanyewo, nvutukuhela Latuyalaka lakanyutundja uma lu kete ya Edjibitu, uma lu luudu la lohombo.

¹³Kanyukaki Latuyalaka, Unyashungu anyu, woma, kanyukambelaki ulimu,[47] ndu kanyutshibaki lu lukumbu landi.

¹⁴Tanyotemolaki ditemolatemola diʼuma lʼatei a ditemolatemola dia wedja weli lʼutshimba anyu,

¹⁵ne dia Latuyalaka, Unyashungu anyu, leli lʼatei anyu, eli Unyashungu a kandjema. Kele ka Latuyalaka, Unyashungu anyu, katukufulanela le nyu, ku ndi nyulanya uma ladiku dia kete.

¹⁶Tanyedikaki Latuyalaka, Unyashungu anyu,[48] uku akanyawedika la Masa.[49]

¹⁷Kanyulamaki elembe wa Latuyalaka, emenyi andi la adjangu andi, wakandanyutela.

¹⁸Kanyutshaki akambu wʼusimbwi ndu weli ololo lu ashu wa Latuyalaka, dia nyu ndjala la ongenongeno, ndu dia nyu nkuma lu kete yʼololo yakatshibela Latuyalaka washenyu dia nyusha,

¹⁹lʼokongo wa mbitshanya atunyi anyu tshe uma la ntundu kanyu, uku akandalaki.

²⁰Lamʼayukumbula onʼaye lu etena kayayi ati: Na kitshimudi kʼemenyi, welu la adjangu wakanyudjangela Latuyalaka, Unyashungu asu na?

²¹Kuwuteli wati: Shu taki fumbi ya Farayo lʼEdjibitu, ku Latuyalaka akatutundja la lunya la wulu uma leko.

²²Latuyalaka akenya asi Edjibitu, Farayo la luudu landi tshe tulimbitelu la akambu wa mamba, a waki ndu wa delu, la ntundu kʼashu asu.

²³Ku ndi akatutundja uma leko, dia ntela lu kete yakandatshibela washesu dia ndi ntusha.

²⁴Latuyalaka, akatudjangela dia shu ntsha elembe ene tshe, ndu mbuka Latuyalaka, Unyashungu asu, woma, dia shu menaka olo nshi tshe, ndu dia ndi ntutshika la lumu uku wesu elo.

²⁵Naka shu tayutsha elembe ako tshe ololo la ntundu ka Latuyalaka, Unyashungu asu, uku akandatudjangela, shu tayuyala eluwanyi.