Read tetala Euhwelu kʼElembe 7 Bible Online

Euhwelu kʼElembe 7 - tetala bible

Euhwelu kʼElembe 7

¹Lamʼayunyukumia Latuyalaka, Unyashungu anyu, lu kete yatanyatshu la ntukita, ndu lamʼayundutshanya wedja efula la ntundu kanyu, asi Hiti, asi Ngiringase, asi Amora, asi Kanana, asi Perizi, asi Hiwi, ndu asi Jebuse, wedja esambeli[50] wunyuleki efula ndu wulu,

²ndu lamʼayunyukimwela Latuyalaka, Unyashungu anyu, wo, nyu nyayuwale-mbia. Dieli la nyu dia mbashila ushiki; tanyudjaki la wo sheki, tanyuwaukaki ketshi.

³Tanyutshukanaki la wo, tanyutshukamiaki anʼanyu wʼamantu le anʼawo wʼapami, kana ntshukela anʼanyu wʼapami anʼawo wʼamantu.

⁴Vo watukukadimula anʼanyu wʼapami uma le mi diaha vo ndjelami, dia vo ntemola ditemolatemola. Ku kele ka Latuyalaka ndjufulanela le nyu, la ndi nyudiaka esadi.

⁵Keli kanyatsheli okone: kanyunyukuli diakelu diawo, kanyatshatsha pingu yawo, kanyunyukuli dikishi diawo diʼAshere, ndu kanyutshumbi difanelu diawo dia losela lu dja.[51]

⁶Nyu nyeli wudja wʼekila le Latuyalaka, Unyashungu anyu. Latuyalaka, Unyashungu anyu, akanyosonola dia nyu ndjala wudja andi hita[52] lʼatei a wedja tshe weli ladiku dia kete.

⁷Aha ati: Nyu mbuleki wedja ekina tshe efula, mbakanyuki Latuyalaka ngandji ndu mbakandanyosonola. Mete nyu mbuleki wedja ekina tshitshe.

⁸Keli Latuyalaka atunyulangaka, ndu ndi atulamaka etshibelu kakandatshibela washenyu. Diako mbakandanyutundja la lunya landi la wulu, mbakandanyutshungula uma lu luudu la lohombo, uma lu lunya la Farayo, khumʼekanga ka Edjibitu.

⁹Okone nyeyi nyati: Latuyalaka, Unyashungu anyu, keli Unyashungu. Ndi eli Unyashungu a kolamelu, latulamaka daka la ngandji ka shikaa le wane watuwukaka ngandji, ndu watulamaka elembe andi edja ndu nonga kinunu.

¹⁰Keli, ndi atufutaka wane watuhetshaka lʼelundji lʼelundji, difutu dia mbalanya.[53] Ndi huheko untu latuhetshaka, ayufuta lʼelundji lʼelundji.

¹¹Okone nyulamaki aui, welu la adjangu wambumunyudjangela elo ololo, ndu nyatshaki.

¹²Ne dia nyu nyambulunga adjangu ane, nyambalama ndu nyambatsha, Latuyalaka, Unyashungu anyu, ayunyulamela sheki la ngandji ka shikaa, yakandatshibela washenyu.

¹³Ndi ayunyuka ngandji, anyunyotshokola, ayunyufudia. Ndi ayotshokola anʼanyu la dinela dia lu kete yanyu, epunga anyu, ashi anyu wʼelua, la iso ndu efulanelu ka ngombe yanyu la kʼesongo anyu wʼekoko lu kete yakandatshibela washenyu dia nyusha.

¹⁴Nyu nyayotshokwama uleki wedja tshe. Nduku pami kana umuntu layuyala ekumba lʼatei anyu, kuyanga nyama ndjala dunga lʼatei a dungalunga dianyu.

¹⁵Latuyalaka ayunyunyiya elandu tshe. Ndi hunyutumela nduku ulandu otoi wʼuma lu elandu wa kolo waki lʼEdjibitu weyanyu. Keli ndi ayetumela waku tshe watunyuhetshaka.

¹⁶Kanyulanya wedja tshe wutsha nyukimwela Latuyalaka, Unyashungu anyu. Tanyuwaukaki ketshi, ndu tanyotemolaki ditemolatemola diawo, ne dia dikambu so diatukuyala djunga le nyu.[54]

¹⁷Undu, nyu nyayuta lʼetema anyu nyati: Wedja ene tuleka efula; ukundi ayuteya mbatshanya?

¹⁸Tanyuwaukaki woma. Keli nyuho uku akatshela Latuyalaka, Unyashungu anyu, Farayo la Edjibitu tshe.

¹⁹Nyuho ahimbelu wa mamba, tulimbitelu la akambu wa mamba, lunya la wulu ndu lʼusimbwi wakenyi ashu anyu lamʼakanyutundja Latuyalaka, Unyashungu anyu. Osoku mbayutshela Latuyalaka, Unyashungu anyu, wedja tshe wukanyu woma.

²⁰Latuyalaka, Unyashungu anyu, ayatumela kuyanga ahuma a wulu, edja ndu waku wayutshikala ndu wayunyushama, wa-mbulanyema.

²¹Tanyuwaukaki woma: Latuyalaka, Unyashungu anyu, Unyashungu a wuki ndu wukama woma, eko lʼatei anyu.

²²Latuyalaka, Unyashungu anyu, ayunyutshanyia wedja eku weli la ntundu kanyu yema, yema. Tanyadiakaki lʼetena otoi, ne dia nyama ya lʼukunda yatukufulanela, ku yo ndja le nyu.

²³Keli Latuyalaka, Unyashungu anyu, ayunyukimwelawo, ndu ayuwafutanya wulu, edja ndu vo, wambulanyema.

²⁴Ndi ayukimo khumi ya dikanga yawo lu anya anyu. Ku nyu nyayushisha kumbu yawo lʼesi a ulungu. Nduku pami kayuyala la wulu wa memala dia ndo la nyu, edja ndu lamʼayunyalanya.

²⁵Kanyutshumbi difanelu dia losela dia ditemolatemola diawo lu dja. Tanyokomiyaki fesa kana paunyi yeli ladiku diadio, kuyanga nyu ndjaoselayo, ne dia nyutukutala lu djunga loko. Yo yeli wononyi le Latuyalaka, Unyashungu anyu.

²⁶Tanyotshiyaki engo ka wononyi lu mvudu yanyu, nyutukudjama mananu uku engo kako. Nyukihetsha wulu, nyukiuki wononyi, ne dia to keli engo ka mananu.