Read tetala Euhwelu kʼElembe 8 Bible Online

Euhwelu kʼElembe 8 - tetala bible

Euhwelu kʼElembe 8

¹Kanyulamaki la kanyutshaki elembe tshe wamumunyutela elo, mbayunyuyala la lulumbi, mbayunyufulanela ndu mbayunyukuma lu kete yʼukito yakatshibi Latuyalaka dia mbisha washenyu.

²Nyuho mbuka tshe kakanyolombola Latuyalaka, Unyashungu anyu, deku akumi anei ne lʼusui wa shenga, dia nyukitshakitsha la nyedika, dia mbeya uku aki lu etema anyu, kana nyu nyatulamaka elembe andi kana kema.

³Ndi akanyukitshakitsha, akanyuvusha ndjala, ku akayunyulesha mana yakinyu kunimbitela ndu yaki washenyu kumbeya, dia nyetsha ati: Untu hayala la lumu ne dia ma tu, keli ndi mbeyaka ndjala la lo, ne dia aui tshe watumba uma lʼunyo a Latuyalaka.[55]

⁴Ahondo wolotshinyu kundjala emusu, ekulu anyu kumvuda lu deku akumi anei ne.

⁵Nyeyi lu etema anyu ntu nyati: Latuyalaka, Unyashungu anyu, akanyekiya uku atekiyaka untu onʼandi.

⁶Okone nyu nyayulamaka elembe wa Latuyalaka, Unyashungu anyu, lu nkendakenda lu mbuka yandi ndu lu mbuka woma.

⁷Ne dia Latuyalaka, Unyashungu anyu, utsha nyukumia lu kete yʼololo, kete yeli la ekedi wʼashi, teko la tokoko, tatokelaka uma lʼekedi ndu uma lʼakuna;

⁸kete yʼepunga ndu yʼasami, yʼekodi wʼelua ndu yʼetamba wa fingu la dikomi, kete yʼeweli ndu usanga;

⁹kete yayunyolekaka mbu ya nde tena tshe, yahanyuhumba nduku engo, kete yeli ave ayo mbulu. Lu akuna ayo kayunyutshimaka ehotela.

¹⁰Okone nyu nyayolekaka, nyayulutaka, ku nyayutumbulaka Latuyalaka, Unyashungu anyu, ne dia kete yʼololo yakandanyusha.

¹¹Kanyewo, nyutukuhela Latuyalaka, Unyashungu anyu, diaha nama elembe andi, adjangu andi, la aui andi wamumunyutela elo.

¹²Lamʼayunyolekaka, ndu lamʼayunyulutaka, lamʼayunyuhika mvudu yʼamena la mbidjase loko,

¹³ndu lamʼayunyena ngombe yanyu la ekoko anyu wambufulanela, fesa la paunyi yanyu yambuyala efula, ndu diango tshe dieli la nyu diambufulanela,

¹⁴kanyewo, etema anyu watukutakula, ku nyu ndjuhela Latuyalaka, Unyashungu anyu, lakanyutundja uma lu kete ya Edjibitu, uma lu luudu la lohombo;

¹⁵lakanyolombola lʼusui one wa shenga a wuki ndu wa woma, lenʼeli elui wa lolengo la kutu, la ahuli wʼufumbu ndu waha la ashi, ndu lakanyutundjiya ashi uma lu dive dia wulu,

¹⁶lakanyulesha mana lʼusui, yaki washenyu kumbeya, dia nyukitshakitsha la dia nyedika, dia ndjunyutshela ololo lu nshi yʼekumelu.[56]

¹⁷Nyewo, nyutukuta lʼetema anyu nyati: Khudu kasu la wulu wʼanya asu mbakatukundjiya ekundji ene.

¹⁸Kanyuhoki Latuyalaka, Unyashungu anyu, ne dia ndi katunyushaka wulu wa nyu mbekundja, wa nkikitsha sheki yandi yakandatshibela washenyu, uku weyo elo kene.

¹⁹Naka nyu nyambuhela Latuyalaka, Unyashungu anyu, la nyambuyela ditemolatemola, naka nyu nyambudikambela ulimu ndu nyambuditemola, dimi lambunyewula lu seke nti: Mete, nyu nyayuvo.

²⁰Nyu nyayuvo uku wedja watadiaki Latuyalaka la ntundu kanyu, ne dia nyu kunkitanyia diui dia Latuyalaka, Unyashungu anyu.