Read tetala Euhwelu kʼElembe 9 Bible Online

Euhwelu kʼElembe 9 - tetala bible

Euhwelu kʼElembe 9

¹Isariyele li, nyuki! Elo, nyuteho Jorodana dia ntohotola wedja wunyuleki waki ndu wulu kete, esumba a waki la wudingami kumbu pulu ndu lʼulungu,

²wʼantu a waki ndu etali, asi Anaka, weyanyu ndu wakanyuki lukumu lawo wata vati: Akona eya memala la ntundu kʼasi Anaka?

³Okone nyeyi elo nyati: Latuyalaka, Unyashungu anyu, ayokendakenda la ntundu kanyu uku dja ya dikita. Ndi kayalanya, kayakitshakitsha la ntundu kanyu. Ku nyu nyayuwatshanya, nyayadiaka esadi, uku akanyulaki Latuyalaka.

⁴Lamʼayuwatshanya Latuyalaka, Unyashungu anyu, la ntundu kanyu, tanyutaki lʼetema anyu nyati: Ne dia uma lu ololo asu mbambutukumia Latuyalaka lu kete yʼukito nye. Keli ne dia kolo ka wedja ene, mbatawatshanya Latuyalaka uma la ntundu kanyu.

⁵Nyu hanyeyi nkita kete yawo ne dia ololo anyu la uluwanyi wʼetema anyu. Keli paka ne dia kolo ka wedja ene mbatawatshanya Latuyalaka, Unyashungu anyu, uma la ntundu kanyu, la dia nshikike diui diakatshibela Latuyalaka washenyu Abarahama, Isaka la Jakoba.

⁶Okone nyeyi nyati: Aha ne dia ololo anyu mbambunyusha Latuyalaka, Unyashungu anyu, kete yʼololo nye dia nyu yikita; ne dia nyu nyeli wudja wʼete wulu.

⁷Nyuho, tanyuhelaki uku akanyukia Latuyalaka, Unyashungu anyu, kele lʼusui wa shenga. Nyu nyakayahendwelaka Latuyalaka umaka lushi lakanyatumbi lu kete ya Edjibitu, edja ndu lamʼambunyukuma lu dihuli ne.

⁸Nyakukia Latuyalaka kele la Horeba. Ku ndi akanyuki kele, akalangi nyudiaka.

⁹Lamʼakamambela lʼukungu dia ntosa pasi diʼave, pasi dia sheki yakadji Latuyalaka la su, dimi lakatshikala lʼukungu tanyi akumi anei la etshu akumi anei,[57] dimi kondema kuyanga no ashi.

¹⁰Ku Latuyalaka, akambisha pasi diʼave pendi diakafundami la luhita la Unyashungu ndu diaki la aui tshe wakanyutela Latuyalaka lʼatei wa dja lʼukungu lushi lakandasanganya ului wʼantu.

¹¹Lʼekumelu ka nshi akumi anei la etshu akumi anei kakambisha Latuyalaka pasi diʼave pendi, pasi dia sheki.

¹²Ku Latuyalaka akamvutela ati: Uneli, uhulo esadi uma lane, ne dia wudja aye wakayatundja uma lʼEdjibitu wambunganela. Vo wambetola esadi uma lu mbuka kakamawadjangela. Vo wambuyatshela efanelu ka lolelola.

¹³Latuyalaka akamvutela ntu ati: Dimi menaka nti: Wudja one, weli wudja wʼete wulu.

¹⁴Unkimo dime mbadiaki, nshisha lukumbu lawo lʼesi ulungu. Ku layutunga wudja ukina wuleki wudja one wulu ndu efula uma le ye.

¹⁵Ku dimi lakakalula, lakahulo uma lʼukungu wakadikitaka dja tshu, lakakimedi pasi dia sheki lu anya ami ahendi.

¹⁶Dimi lakendi, menyi ku nyakatshela Latuyalaka, Unyashungu anyu, kolo. Nyu nyakayatshela yana ya ngombe ya lolelola. Nyu nyaketola esadi uma lu mbuka kakanyudjangela Latuyalaka.

¹⁷Dimi lakayakimedi pasi pendi, ku lakadikadja uma lʼanya ami, lakadiuli lu ashu anyu.

¹⁸Dimi lakakhusama la ntundu ka Latuyalaka uku etena ka ntundu, tanyi akumi anei la etshu akumi anei. Dimi konde ma kuyanga no ashi, ne dia kolo kakanyatshi lamʼakanyatshi kene keli kolo lu ashu wa Latuyalaka, dia mbukia kele.

¹⁹Dimi laki la woma[58] dia mena kele la ududu wakanyuki Latuyalaka, edja ndu ndi akalangi nyudiaka. Keli Latuyalaka akambukela ndu lʼetena keku.

²⁰Latuyalaka akuki Arona kele efula, akalangi mbudiaka, ku dimi lakolombela Unyashungu ndu lʼetena keku.

²¹Ku dimi lakose engo keku ka kolo, osongo a ngombe wakanyatshi, lakakitshumbi lu dja. Lakakitshutshuna edja ndu lamʼakatayala ufushi utu, ku lakakadja ufushi ako lʼokedi watuhuloka uma lʼukungu.

²²Nyu nyakaleki mbukia Latuyalaka kele ndu la Tabera,[59] la Masa,[60] ndu la Kiborota-Hatava.[61]

²³Ndu lamʼakanyutumi Latuyalaka la Kadeshe-Baranea[62] ati: Nyutshu, nyutukiti wudja wamumunyusha,[63] nyu nyakahendula diui dia Latuyalaka, Unyashungu anyu.[64] Nyu kumbetawo kuyanga nkitanyia diui diandi.

²⁴Nyu nyatuhendwelaka Latuyalaka umaka lushi lakamanyeyi.

²⁵Dimi lakakhusama la ntundu ka Latuyalaka tanyi tako akumi anei la etshu akumi anei, ne dia ndi akati ati: Layâdiaka.

²⁶Ku lakalombe Latuyalaka nti: Khumadiondjo Latuyalaka li, tulunyaki wudja aye ndi ukito aye wakayatshungula uma lu wuki aye ndu wakayatundja uma lʼEdjibitu la lunya laye la wulu!

²⁷Uho ekambi aye Abarahama, Isaka, la Jakoba. Tendaki ote wulu wa wudja one kuyanga uhedia awo kana kolo kawo,

²⁸ne dia akanga a kete yakayatundja watukuta vati: Latuyalaka kema la wulu wa mbalombola lu kete yakandalaki, ndu ndi mbahetshaka, diako mbakandatundja dia ntadiaka lʼusui wa shenga.

²⁹Vo weli wudja aye la ukito aye wakayatundja uma lʼEdjibitu la wulu aye wa mamba ndu la lunya laye lʼusimbwi.