Read tetala Joani 11 Bible Online

Joani 11 - tetala bible

Joani 11

¹Pami kemotshi aki la hemo, lukumbu landi Lazaro, usi Betaniya, ngelu ka wa Mariya la Mata onangu.[46]

²Mariya oso, lakakiti Khumadiondjo malashi, lakakitula ekulu andi la divu diandi,[47] Lazaro onangu kaki la hemo.

³Ku akadiyendi wakatumi diui le Jesu vati: Khumadiondjo, ulungi, one latuyulangaka, eko la hemo.

⁴Keli lamʼakuki Jesu diui so, ndi akati ati: Hemo keso aha ka nyoi, keli ne dia lutumbu la Unyashungu, ne dia Onʼa Unyashungu atumbwami lu dikambu diako.

⁵Jesu akukaka Mata la onangu Lazaro ngandji.

⁶Ku lamʼakanduki ati: Ndi la hemo, ndi akadjase lene akindi nshi hyendi.

⁷Lʼokongo diku, ndi akatela ambeki andi ati: Tutshu la Judiya ntu.

⁸Ambeki wakawutela vati: Umbetsha, asi Juda waki lu nyanga nkuka ave nshi nye, ku we utatshu utsha leko ntu?

⁹Jesu akâkaluya diui ati: Aha eshidi dikumi la ehendi mbeli lu lushi otoi? Naka untu ayokendakenda la yanyi, ndi hatakana ne dia ndi menaka yanyi ya andja ane.

¹⁰Keli naka untu ambokendakenda lʼutshu, ndi ayutakana, ne dia yanyi kema lʼutema andi.

¹¹Akambu aso mbakandati. Lʼokongo diku, ndi akawatela ati: Ongenyi asu Lazaro ambetama lu dio. Dimi lambutsho keli ntuwemuli uma lu djo.

¹²Ambeki wakawutela vati: Khumadiondjo, naka ndi oso ambetama lu djo, keti ndi ayokono.

¹³Jesu akati dikambu dia nyoi kandi, keli vo wakakani vati: Dia mbetama djo mbatandi.

¹⁴Ku Jesu akahunwela ati: Lazaro akavwi.

¹⁵Dimi lambongenangena dia dikambu dianyu, ne dia dimi taki leko, dia nyu mbetawomi. Tutshu le ndi.

¹⁶Ku Tomasi, letawo vati: Diasa, akatela anyandi ambeki ati: Nyeso tutshu, katutuvu la ndi.

¹⁷Lamʼakayi Jesu, ndi akatani Lazaro aya nshi nyei lu diumbu.

¹⁸Betaniya aki lasuki la Jerusalema, uku kilometere shatu.

¹⁹Asi Juda efula wakayi le Mata la Mariya dia ndjasamba lu nyoi ka onengewo.

²⁰Ku lamʼakuki Mata ati: Jesu kayayi, ndi akatshu dia ntulungula, keli Mariya akatshikala udjashi lu luudu.

²¹Ku Mata akatela Jesu ati: Khumadiondjo, utuyuyala lindu, tshiki onalingu kumvo.

²²Ndu kakiane, dimi mbeyaka nti: Unyashungu ayukusha tshe kayuyolomba.

²³Jesu akawutela ati: Onanyo ayulo.

²⁴Mata akawutela ati: Dimi mbeyaka nti: Ndi ayulo lu eulwelu ka lushi lʼekumelu.

²⁵Jesu akawutela ati: Dimi leko eulwelu la lumu. One lambetawo, kuyanga ndi ayuvo, ayuyala la lumu.

²⁶One leli la lumu, lambetawo, ndi havu pundju. We mbetawoka diui so?

²⁷Ndi akawutela ati: Elu, Khumadiondjo. Dimi lambetawo nti: We eko Kristu, Onʼa Unyashungu. Ndi kayayi la kete.

²⁸Lamʼakandati osoku, ndi akatshu, aketi Mariya onangu lu usheshe, akawutela ati: Umbetsha one aketa.

²⁹Lamʼakanduki diui so, ndi akunela esadi, akatshu le ndi.

³⁰Laso ku Jesu atakumi la ngelu, keli eki lene akasangana Mata la ndi.

³¹Asi Juda waki la Mariya lu luudu, wakasambaka. Lamʼakawawenyi ambunela esadi, ambutumba, vo wakuyeli. Vo wakakani vati: Ndi ambutsho la diumbu dia ntulela.

³²Lamʼakayi Mariya lene aki Jesu, lamʼakandawenyi, ndi akako lʼekulu andi. Ndi akawutela ati: Khumadiondjo, utunduyala we aki lindu, tshiki onalingu kumvo.

³³Lamʼakawenyi Jesu alela, ndu asi Juda waki la ndi walela, ndi akakhumi lʼutema; akanyangi wulu.

³⁴Ndi akambula ati: Lendi akanyukhunde na? Vo wakawutela vati: Yeti, utendi.

³⁵Jesu akaleli.

³⁶Ku asi Juda wakati vati: Nyendi okone akandulanga!

³⁷Keli amotshi wakati vati: Untu one akasenya kanga tshungu, ndi ntutundeya nshimbela ndu untu one, diaha ndi mvo?

³⁸Ku Jesu akayi la diumbu, ayakhumi ntu lʼutema. Diumbu diako diaki wuku a lu dive. Dive dimotshi diakadifela.

³⁹Jesu akati ati: Nyunya dive. Mata, kadiya one lakavu, akawutela ati: Khumadiondjo, udu aya sulu, ne dia aya nshi nyei loko.

⁴⁰Jesu akawutela ati: Dimi hakutedi nti: Naka we ayetawo, we ayena lutumbu la Unyashungu?

⁴¹Ku vo wakanya dive. Jesu akedia ashu, akati ati: Papa, lambukuka lusaka ne dia we mbukelakami.

⁴²Dimi lakeyi nti: We atumbukelaka nshi tshe. Keli lambuta diui ne, ne dia ului wʼantu wunyingi, wetawo vati: We kakantumi.

⁴³Lamʼakandati osoku, ndi akati la diui dia wulu ati: Lazaro, tumba!

⁴⁴One lakavu akatumbi ombami ahondo wa diumbu, ndu lʼanya ndu lʼekulu. Elundji kandi kakombami la kitambala. Jesu akawatela ati: Nyuwombole, ndi atshu.

⁴⁵Asi Juda efula, wane wakayi la Mariya, wakenyi dikambu diakatshi Jesu, wakawetawo.

⁴⁶Keli amotshi wakatshu le Afarise, wakawatela akambu wakatshi Jesu.

⁴⁷Elombedi a waki la Afarise wakasangana, wakambwana vati: Atshasu na? ne dia untu one ntshaka tulimbitelu efula.

⁴⁸Naka shu tayutshika okone, keti antu tshe mbetawo. Ku asi Romo wayuya, wayosa kete yasu la wudja asu.

⁴⁹Keli omotshi lʼatei awo, lukumbu landi Kayifasi, laki olombedi a ladiku eleku keso, akawatela ati: Nyu hanyeyi nduku dikambu.

⁵⁰Nyu hanyukani yimba nyati: Eko ololo dia untu otoi mvwela antu, dia antu wa wudja tshe tawuvokaki.

⁵¹Ndi kumvuta diui so dikambu diandi ndame. Keli ne dia ndi aki olombedi a ladiku lʼeleku kako, mbakandati diui ati: Jesu kayumvwela wudja.

⁵²Aha paka dia wudja one utu, keli dia nsanganya ana wa Unyashungu wakadiangana, vo wayali ului otoi.

⁵³Uma ka lushi loso, vo wakadji sheki dia mbudiaka.

⁵⁴Jesu komenene ntu lʼatei wʼasi Juda. Keli ndi akamo uma leko, akatshu lu leke la lasuki lʼusui, lʼusumba wetawo vati: Efarayima. Ndi akahangi leko, ndi la ambeki andi.

⁵⁵Elekanelu kʼasi Juda kaki lasuki. Antu efula wakamo lu beke diawo. Vo wakatshu la Jerusalema la ntundu ka Elekanelu dia ntuyaedia.

⁵⁶Ku wakayangi Jesu, wakemala lu etemwelo, wakambwana vati: Akananyu na? Nyati: Ndi huya lu dambu?

⁵⁷Elombedi a waki la Afarise wakadjanga vati: Naka untu mbeyaka lenʼendi, ndi atuteli, keli kawutuwundi.